افيدونى فى تغيير الرادياتير

**alking_2006** · 03-03-2013 10:59 AM

السلام عليكم

رجاء التفاعل مع الموضوع و افادتى
حاليا محتار فى تغيير الرادياتير للماروتى

ناس بتشكر فى الرادياتير النحاس و ناس لأ
ناس بتشكر فى الرادياتير الالومنيوم الصينى و ناس لأ
ناس بتشكر فى الرادياتير الالومنيوم الهندى الاصلى و ناس لأ

مش عارف اجيب ايه
علما بأن الرادياتير النحاس عامل حوالى 450 و بردو الرادياتير الالومنيوم الهندى الاصلى ب 450 عند سوزوكى سنتر و طبعا الصينى هيبقى سعره اقل
لكن سؤالى عن الكفاءة (سواءا جوا البلد او عند السفر الطوالى على سرعة)
علشان هغيره اخر الاسبوع دا

و شكرا

**mesaharaty** · 03-03-2013 12:19 PM

أهلا بالـ
</B>alking_2006
خلاص قررت تغير الرادياتير ؟
طيب ربنا معاك وبالتوفيق
أنا لو مكان حضرتك ومحتار حاسأل نفسى سؤال :
هل الرادياتير النحاس شكله وتقسيمته بتكون هى هى بتاعت الإستاندارد بتاع العربية ولا بيتعمل تعديل عليه ؟ فلو كان بيتعمل تعديل يبقى بلاش وفى الحالة دى أختار الرادياتير الهندى وأركبه وأعتنى عناية فائقة بعد كده بدورة التبريد والمياه فى العربية لحماية وصيانة الرادياتير .

هذا والله أعلم .

بالتوفيق

**lidosasa** · 03-03-2013 01:08 PM

أنا لسه مغير رايداتير لنحاس
وعموماً هو تكلفتة أقل من اللى حضرتك قلته أنا مغيره بالمصنعية من اسبوعين ب 350 جنيه غير المياه الزرقا . وهو مش بيتعمل للعربية أى تعديل لتركبيه وبيتركب عليه المروحة القديمة بدون مشاكل .
الإنطباع الأولى ليا شخصياً
إن مفيش فرق كبير يذكر بينهم غير فى إن النحاس بيفقد الحرارة أسرع من الألمونيوم معايا . يعنى فى الألمونيوم لما كانت المروحة تشتغل ينزل المؤشر لقبل النص بشوية فى النحاس بتنزل لحد التلت الأول من المؤشر تقريباً . وللعلم المالك القديم للسيارة لم يكن مهتماً بدورة التبريد وكان الرادتير القديم مصدى وحالته تعبانة فيجوز إن دى مش ميزة فى النحاس الجديد وإنما فرق فى الإهتمام أو عدم الإهتمام بدورة التبريد ونضافتها .
الموضوع محير بالفعل
لكن لو نويت على الألمونيوم أهم حاجة تاخد بالك منها كويس وإنت بتشتريه سمك مواسير التبريد لآنها كل ما كانت أرفع وأكثر فى المنحنيات كلما حملت ماء أقل داخلها مما يزيد فى فقدها للحرارة وبالتالى كانت أكفأ فى التبريد . وكل ما كانت المواسير طخينة ومنحنياتها أقل كلما حملت كمية ماء أكبر مما قلل من فقدها للحرارة وبالتالى تقل قدرتها فى التبريد ( ودى مش تجربة شخصية ولكنها منقولة عن أحد أعضاء المنتدى الذى تعرض لمشاكل فى التبريد بسبب راداتير مواسيره طخينة شويه ومنحنياته قليلة وتوصل فى الأخير إلى هذه الملاحظة ولما غير الرادتير أنتهت للأبد مشكلته مع التبريد )
أهم حاجة سواء إخترت نحاس أو ألمونيوم إنك تهمتم بدورة التبريد وتملى مياه زرقا موبيل وتزود بمياه مقطرة وابعد تماماً عن مياه الحنفية وكله حيبقى تمام بإذن الله .

**Amr Axel** · 03-03-2013 03:52 PM

بص يا باشا نصيحة خليك في الالومنيوم زي اللي نازل فيها
و متخليش حد يقولك الريداتير الأصلي لما تلاقي عليها علامة سوزوكي و التيكت و الرقم ساعتها يبقي أصلي مش اي ريداتير هندي يتقال عليه الأصلي ساعات بيكون لعب في الكلام و المقصود زي الأصلي في التصميم و الشكل
ممكن تشوف منفذ بيع قطع غيار مودرن موتورز في الدقي و شوف سعره كام انا كنت هناك و القطع للالتو بتاعت سوزوكي الاصلية فعلا و بالرقم و متبرشمة و القطعة نفسها مطبوع عليها و اعرف ان ليدرز بيجيب برده الأصلي بتاع التوكيل فشوف الاتنين دول و و سوزوكي سنتر و قارن و ممكن يوم المقابلة ان شاء الله نتكلم اكتر