الموضوع: نيسان صنى ولا الياريس من حيث الوسع

اليارس :اوسع فى الكنبة الخلفية وفى كل الكراسى عموما عن الصنى
موتور اليارس احسن كصناعة وتكنولوجى من الصنى
موتور اليارس بيعمل فى الصفيحة من 300 الى 320 فى ال 20 لتر بنزين 92
توكيل تويتا احسن بمراحل
الصنى: الصنى احلى وبرستيج فى الشكل طبعا من اليارس
قوة الموتور على السرعات العالية اكبر من اليارس طبعا موتور 1600
موتور الصنى بيعمل 200 الى 225 فى ال 20 لتر بنزين 92 ومشفتش حد معاة صنى عمل معدل احسن من كدة
الكنبة الخلفية ضيقة بطريقة ملحوظة
ثبات احسن من اليارس بس على حساب الخلوص وعايز اقولك ان مساعدين الصنى من كتر ماهى ناعمة ومريحة ممكن لو ركبت2 ورا تحك فى بعض المطبات واكررها بعض وليس الكل ما بالك 3
طبعا عيوب التقفيل اللى البعض اشتكا منها : عيوب فى السنتر لوك عيوب فى التكيف الكاسيت السى دى احيانا بيبوظ ساعات العربية مش بتدور
وطبعا الكاوتش سئ جدا................ولك حرية الاختيار

بصراحة ردك على حقيقى كان ممتاز علشان كدة أنا هأثق برأيك فى الحيرة اللى أنا فيها ما بين ياريس, سيراتو, أوبترا ,ماتريكس الجديد,سيتى خصوصا انى طويل وأريدها فى نفس الوقت عائلية
وأيضا اقتصادية لو كنت مكانى تفضل أيه

تلفت الادارة نظر الأخ عضو المنتدى الى ان اللون الاحمر مخصص للاستخدامات الادارية فقط-شكرا لتفهمكم

انا انصحك بالعربية كيا سيراتو واسعة وجميلة

انت عارف انا كل ما اشوف الصنى بتعجبنى موت بس والله واحد صاحبى كان جاب واحدة مانيوال فى بداية التجميع المصرى وكان التكيف بيشتغل سخن بس مش بيسقع وراح التوكيل وظبطة وهوة هوة كان بيشتكى من السنتر اللى ساعات بيعلق ......وواحد تانى مرة عدة بالعربية على حديدة مدورة على الارض مفيهاش اى مسامير او حاجة الكاوتش فرقع والكاسيت السى دى عندة باظ.....والصراحة معرفش غير الاتنين دول ....ولما دخلت على منتدى الصنى هنا لقيت ناس كتير بتشتكى من كدة فحسيت ان الشكوى والموضوع جماعى وليس مقتصر على حالتين ....وطبعا يا سبعاوى انت ادرى احنا بنتعلم منك.....وجزاكم الله كل خير

من خبرتى طبعا مش فى العربيات لكن فى اللف فى السوق وتجربتى مع اليارس والسيفيك هقولهالك بكل صراحة وباختصار ولك حرية الاختيار
اشترى لانسر بومة 1600 اتوماتيك كلاسيك او هاف اوبشن
سعر الكلاسيك 109 والوكيل اول مرة يعملها بقى عندة دلوقتى الهاف اوبشن زيادة 5 جنوط وكاسيت اصلى وفوانيش شبورة ب 111
انا ما صدقتش غير لما روحت وشفتها تقريبا عندهم مخزون وعايزين يبيعوة
وابعد عن الخليجى .........خليك مع التوكيل وموضوع استهلاك البنزين دة نسيبى انا واحد صديقى بيعمل فى الصفيحة من 210 الى 250 فى الصفيحة بس عمرة ما بيحرق بالعربية ولا بيعمل كيك دون
وصدقنى وان شاء الله عمرك ما هتندم عارف لية:
شارى عربية 1600 موتور قوى هيسعفك فى اى وقت
شكل جميل ومحدش اختلف علية
هتعرف تبيعها فى اى وقت
قطع غيارها مغرقة الدنيا
برستيج وتنفع شبابى وعائلى كمان
والسعر بتاعها كويس وراكب السوق
ياراجل دة الالنترا بتاعت العم غبور مانيوال فاضية بقت 104 الف ومفيهاش حاجة ...طبعا فاضية يعنى مفيش ايرباج ولا اى بى اس
والسيراتوا حلوة بس ما ينفعش تتحط مقارنة مع الانسر
اليارس حلوة وهية معايا بس بلاش خليك فى الانسر احسن واسمع كلامى
الصنى حلوة بس خلينا بردك نبعد عن الشر ونغنيلةوالرينج قريب سوبر الصلون ب103....لانسر هاف سبورت ب 111
الانسر الجديدة غالية ....الكرولا الجديدة جامدة بس غالية اوى ب 147 والسيفيك ب 155 فالرينج بعيد
اللى هيقولك بقى مازدا ولا سوبارو ولا سيتروين ولا اى حاجة فى رينج 120 الف ابعد ابعد ابعد
وبينى وبينك لو هتفكر ماتروحش غير لانسر 1600 يارس مانيول او اتوماتيك وحسب الاوبشن اللى انت عايزهم وماتفكرش فى حاجة تانية وريح دماغك....واستخير الله قبل الشراء

معلش كنت اقصد هاف سبورت مش هاف اوبشن

يا أستاذ أحمد عزت ألف شكر على الدراسه الحلوة دى وعموما أنا خضت الوضوع دراسه وبحث ولقيت ان أنسب عربية هى الياريس ويكفينى هذة الدراسه من أحد الزملاء وياريت ان كان فيه تصححه علشان أعرف راسى من رجلى
لقد قمت بشراء السيارة ياريس فول أوبشن مانيول موديل 2007 بعد بيع سيارتى تويوتا عيون 1999 وأستطيع أن أقول تقيمى بعد تجربتى الفعلية للسيارتين أن
1)السيارات اليابانية بصفة عامة سيارات عملية جدا جدا بدليل أننى عندما بعت التويوتا عيون بعد 8 سنوات لم أقم بتغيير أى شئ فى السيارة نهائيا ما عدا الفلاتر و السيور وبعتها وهى سليمة 100%.
2)لا توجد عربية أقتصادية فى أستهلاك البنزين مثل اليابانى و أقصد هنا الاستمرارية بعد عدة سنوات من الاستخدام و أيضا عند السرعات العالية .
3)أخى معة تويوتا أستارلت 1994 لم يقم بتغيير سوى مساعد واحد فى 13 سنة ولسة مغير طقم شمبر
4)بالنسبة للقوة السيارة ياريس عزمها أكبر بفارق واضح جدا و أوسع كثيييير.

عندما قررت شراء سيارة جديدة تصفحت النت فى مواقع كثيرة بحثا عن سيارة ياباتى تكون مبيعتها عالية و سعرها معقول وتقيم خبراء السيارات عالميا لها مرضى فكانت السيارتين ياريس و هوندا فيت Honda fit ونتيجة لان توكيل و أداء تويوتا بالنسبة لى ممتاز للغاية فقررت بلا تردد أختيار الياريس مع العلم لا يوجد الا مواقع قليلة للغاية تتحدث عن اللانسرالشكل القديم ولكن الشكل الجديد 2008 موجود.
أهم نقاط التميز
1.موتور ياريس نفس موتور كورولا 2007 الذى يعمل بكفاءة منذ 2001 وأحد أصدقائى معة كورولا 2002 عامل بيها 240000 كم بدون أى شكوى نهائيا و هو موتور VVT-I (VARIABLE VALVE TIMING WITH INTELLIGENCE) AND DOUBLE OVERHEAD CAM AND THE FUEL INJECTION IS TOYOTA MULTIFUEL INJECTION.
2.العفشة و الجيربوكس والفرامل هما بتوع الكورولا بدون أى تغير نهائيا
3.نقطة الخلاف الوحيدة أن الباور فى اليارس كهربائى بدل الزيت (الهيدروليك) ودة أحدث تكنولوجيا حالية و التى سوف تنزل فى الكورولا 2008 وتعتبر من عوامل خفض استهلاك البنزين.
4.شكل الياريس لن يتغير قبل 5 سنوات.
5.السيارة وسعة جدا من الداخل وتأخذ 5 أفراد بسهولة جدا والشنطة معقولة جدا.
6.السيارة ثابتة جدا جدا على الطريق حتى مع الحمل الزائد لقد أختبرتها بنفسى عند 145 كم/ساعة مع التكيف.
7.التكييف لايؤثر مطلقا على الموتور سواء عند سرعات قليلة أو عالية و كفاءتة ممتازة
8.السيارة مرتفعة عن الارض و أعتقد ان دى ميزة.
9.التسارع ممتاز
10.الاكصدامات كثير من الناس يشتكى أنة ضعيف و لكن أثناء قيادتى للسيارة عند سرعة 60 كم سرحت ودخلت فى عربية دايو لانوس كانت أمامى وقفت فجاءة و أنا نازل أشوف المصيبة دى كانت عينى على الدايو حيث أننى الغلطان لقيتها سليمة مفيهاش أى حاجة و العربية بتاعتى سليمة برضة على الرغم أنى كنت بسمع قبل مشتريها أن الاكصدام أسوأ حاجة ولكن أنى أشهد الله أن الاكصدام دة كان ميزة كبيرة حيث أنة مرن بحيث يمتص الصدمات.
11.السيارة باريس حاصلة على أعلى الدرجات فى أختبار التصادم 5 نجوم
12.تجربتى الفعلية مع الياريس بالنسبة لاستهلاك البنزين داخل البلد وفى الزحمة 275-285 كم/ 20 لتر, أما على الطريق السريع فقد استهلكت من الاسكندرية الى الزقازيق حوالى 180كم/10 لتر أى حوالى 360 كم/ 20 لتر (360 كم/ صفيحة) استهلاك رائع مع العلم أن ميزة اليابانى أن أستهلاكة تقريبا بيبقى ثابت لعدة سنوات دة عن خبرة و تجربة بالاضافة أن الاستهلاك ثابت عند السرعات العالية عكس الكورى.

العيوب التى واجهتنى
1)صوت الهواء عالى عند فتح الزجاج على السرعات العالية ولكن عند غلق الزجاج لاتسمع أى شئ سواء الموتور أو الهواء هدوء تام.
2)التابلوة كبير الحجم ولكن الشركة الام تقول أنة للامان حيث يكون موقع السائق بعيد
3)الدهان بتاع العربية يتأثر بسهولة عن طريق الخدوش

النتيجة النهائية
أننى قررت شراء الياريس لان فيها كل مميزات الكورولا 2007 و 2008 وبسعر أرخص 20000 جنية عن 2007و 50000 عن 2008 بالاضافة أنها مناسبة لميزانيتى.