الموضوع: تقرير تغيير قواعد الموتور - ابيزا 99 - بالصور

المشاركة الأصلية كتبت بواسطة ehab_mansour

مبروك يا ابو السيد
حرام عليك تمشي بالقاعده الأمامية بالذات كده لأنها عليها كل بداية الطلعات و الشد بالمحرك

القواعد لو بايظة او مهوية شوية او متأكل كاوتشها او الربر اللي متصنعه منه بتخلي المحرك اكنه مخلوع و بيرج في جسم العربية جامد و بيعمل رعشة في عصاية الفتيس مع بداية التحرك و مع الحركة و لما بتمشي بالعربية و تسيبلها الغيار و متدوسش دبرياج و تحب تهدي و ترجع تدوس تاني بتحس بنتش كده او بوش في الية الحركة للعربية مع تقليل و زيادة السرعه بالمحرك و عليه الغيار (بيتهيئلي بتحسوها لأني مش عارف اوصفها اكتر من كده )
كل دي حاجات بتحسها بيكون سبب منها و ليس الأساسي هو القواعد عموما و خاصة القاعده الامامية لأنها هي اللي في وش المحرك و الي في اتجاه سحب العربية و هي اللي عليها الشد و السحب كله
علاقة القواعد و بوظانها بالكبالن فده بيكون بسبب الحاجات اللي قلتها فوق كل ده بيكون بسبب حركة المحرك للامام و الخلف بزيادة بسبب تأكل القواعد و بالتالي بياخد معاه الكبالن رايح جاي مع حركته الغير طبيعية و بيؤثر عليها و خاصة الكبالن الداخلية

ازاي تجرب قواعدك و تعرف بايظة ولا لأ :-

تشد فرامل اليد بقوة و تدور المحرك و تخلي حد يركب و يدي الغيار الأول و هو دايس دبرياج و انت تبص قدام عند المحرك و الكبوت مفتوح و تخليه يسيب دبرياج خفيف و يدوس و لكن مش لدرجة ان العربية تبطل او تتحرك يعني يسيب نص دبرياج و هنا تلاحظ حركة المحرك في مكانه لو لقيته بيطلع لقدام و يرجع لورا كتير (يعني مسافة ملحوظة) يبقي كده القواعد تعبانه و لو لقيته ثابت و بيتحرك حركة خفيفة تبقي سليمة طبعا كل ده و العربية واقفة مكانها و لم تتحرك

التجربة دي تعلمتها من ميكانيكي صديق من المنصورة عندنا هو اللي علمهالي و ظبطلي قواعد الابيزا بيها اكتر من مرة ... مرتني اعاد تربيط القاعدة الأمامية و اضفلها كاوتشة و مرة اخيره غيرهالي تماما و قلي القواعد الخلفية مبيجرلهاش حاجه و نسبة تأكلها بسيطة جدا و تقريبا مش بتحتاج تتغير غير نادرا و اللي بتبوظ و عليها كل شيء هي الأمامية (ده طبعا في الابيزا و الكوردوبا من 94 الي 2002 او ما يشابهها من موديلات لأن موديل فوق 2003 في الابيزا و مثيلاتها و الكثير من الموديلات تم تغيير أماكن القواعد و اصبحت افضل بمراحل من حيث التأثير و اهتزاز جسم المحرك و كذلك الاستجابة و السحب و النعومه و دي من اهم مميزات موديل فوق 2003 عما قبله )

و بالتوفيق للجميع

انا مع الكلام ده 100/100 والقاعده الاماميه الى بيسموها القمبله هيا الى عليها الضغط الاكبر وفعلا ليها تأثير على الكبالن عن تجربه