الموضوع: مشوار 20,000 كم مع الصني الجديدة, وكلام كتير يهمك

بسم الله الرحمن الرحيم



أول شئ أحب أرحب بكل الأعضاء الجدد اللي ربنا رزقهم بالنيسان الجديدة وربنا يكرمكم بيها ويرزقكم خيرها ويكفيكم شرها


تاني حاجة, عتاب شديد جداً لكل من أعرفهم هنا ويعرفوني وفضلوا المدة الطويلة دي كلها ما يسألوش عليا , وكنت غايب بسبب ظروف شدة مرضي ومرض زوجتي وبعد ما ربنا شفانا انشغلت جامد في عملي وماقدرتش اشارك في أي حاجة لعدم توافر أي وقت لأي شئ , الحمدلله رب العالمين


تالت حاجة , العربية دلوقتي معايا وعاملة 21 ألف كيلو تقريباً , علشان كدة كل الكلام اللي هاقوله هنا عن خبرة مش عن إفتاء مصري بغير علم , وربنا يقدرني واحاول احكي فيه كل حاجة اعرفها عن العربية دي مع مشواري الطويل بيها , ربنا يسترها ويكملها معانا بالستر والصحة والعافية


هاحاول هنا احكي عن كل جزء في العربية على حدة واشرح لو كان له مزايا أو عيوب وازاي نحافظ عليه أو نتقي شره , وبالتالي هامسك العربية حتة حتة من أول الفوانيس لحد الإكصدام الخلفي ! , لكن كل ده هايكون بعد شرح ملخص للصيانات المتتالية اللي عملتها في التوكيل وكانت آخرهم امبارح



1- ملخص صيانة الألف كيلومتر :



مسكوا الزيت والفلتر وغيروه (طلبت تغيير زيت 5 آلاف كيلومتر معدني بس علشان اغيره تاني بسرعة علشان يشيل أي رواسب مانزلتش خلال أول ألف كيلومتر) , بيحصل إعادة معايرة لعداد لفات المحرك علشان يعكس قراءة صحيحة بعد تطبيع الأجزاء المعدنية, وخلصت بسرعة وتوكلت على الله



ملخص أداء العربية خلال أول ألف كيلومتر:


السحب مش سريع

صوت الموتور كان عالي إلى حد ما

الفرامل بتصدر صوت غريب عجيب كأني راكب مقطورة , طلبت فحصها في صيانة الألف أقنعوني انه صوت تطبيع التيل مع الطنابير (كلام كذب وأثبتنا كذبه بعد كدة)



2- ملخص صيانة الـ 5 آلاف كيلومتر:

غيرنا زيت وفلتر تاني , طلبت ان الزيت يكون تخليقي 10 آلاف كيلومتر , عملوا رجلشة لفرامل اليد , صنفروا الطنابير بدعوى ان عليها تراب وهو اللي عامل صوت المقطورة !!



ملخص أداء العربية خلال الـ 5 آلاف كيلومتر:


السحب بدأ يظهر , ومعدل التسارع علي

صوت الموتور هدي وبقى أحلى

صوت الفرامل اختفى ومابقاش بيظهر إلا نادراً , لو كانت العربية فيها أكتر من راكب أو لو دخلت بيها وسط مية




3- ملخص صيانة الـ 10 آلاف كيلومتر:


الزيت ماكانش محتاج تغيير

الفرامل اتنضفت بالهوا (كل ده بيقوللك الطنابير عليها تراب ) على أساس يعني اني بامشي في شوارع حريرية والمفروض الطنابير ماتتربش !!

رجلشة لفرامل اليد

عمل تغيير تبادلي للكاوتش على شكل حرف X



ملخص أداء العربية خلال الـ 10 آلاف كيلومتر:


السحب ممتاز (لكن مش من الصفر )

التسارع جميل من فوق سرعة 60 فقط , غير كدة بطئ

الاتزان كويس طالما انت واخد بالك من ضغط الكاوتش




بعد ألفين كيلومتر , لقيت صوت العربية بدأ يعلى وتزمجر مني لما احاول اتسارع بيها , قلت الزيت محتاج تغيير,


رحت حطيت منظف دورة بنزين , STP, ورحت بعد كدة جبت زيت ليكوي مولي مناسب ليها
LIQUI MOLY - Motor oils, Additives, Car care - Approved motor oil for Mercedes-AMG


وبناءً على نصيحة مدير الشركة نفسها حطيت حاجة اسمها Engine Flush

ده المفروض وظيفته تنضيف المحرك من أي رواسب كان سايبها الزيت القديم , لكن:

السادة الأعضاء هنا حذروني من استعماله تاني لأنه - من وجهة نظرهم - شديد على المحرك وممكن ياكل الأجزاء الداخلية والجوانات وما إلى ذلك


المهم ان الزيت ده كان غالي حبتين (عبوة 5 لتر بحوالي 295 جنيه) , لكن بيقعد 12 ألف كيلومتر بدون تغيير


إحساسي وانا سايق بعدها:

صوت الموتور اختقى تماماً !! (حتى الآن الزيت متغير من أكتر من 8500 كيلو ولا زال الصوت مختفي في ظروف غامضة) , بيظهر بس لما احب ازود لفات المحرك جامد بعد كدة بيروح مع انتظام السرعة




4 - ملخص صيانة الـ 15 ألف كيلومتر:


صيانة خفيفة جداً تقريباً مادفعتش فيها حاجة , مجرد التشييك العادي (اللي ماجبتش سيرته في الصيانات السابقة وبيكون مجرد التأكد من سوائل التبريد والفرامل ومستوى الزيت وضغط الهواء في الكاوتش وتنضيف فلتر الهواء والأنوار والتكييف - وبعد كدة بيلعبوا في كل الزراير يتأكدوا انها شغالة)




نيجي بقى للي حصل بعدها , تم تلقي اتصال من توكيل السبع بيقولوا أخبار صوت الفرامل إيه قلتلهم بيطلع أحياناً , قالولي المفروض ان عربيتك من ضمن الإنتاج اللي "صاجة التيل الخلفي" فيه معيوبة


ولمن لا يعلم , صاجة التيل الخلفي هي البيت اللي بيتحط جواه التيل الخلفي للفرامل وبيكون راكب على الطنبورة الخلفية , والمكان بيحتوي على سوست وأجزاء ميكانيكية مختلفة , وتكلفة الفردة الواحدة 2700 جنيه , يعني الجنبين اتكلفوا 5400 جنيه وتم تغييرهم في الضمان بالكامل , مع توجيه الشكر للشركة انها انتبهت للخطأ وصلحته رغم التكلفة الباهظة (بالمناسبة : زيت الفرامل كله بينزل وقت تغيير الصاجة دي , وبتحتاج ساعتين عمل , يعني غيروا زيت الفرامل كمان).



بدأت احس بضعف عام في كفاءة الفرامل الأمامية , واسمع صوت الصفارة العادية بتاعت التيل , وكان المركز لفت نظري وقت تغيير الصاجة الخلفية ان التيل الأمامي قرب يخلص وقدامه حوالي ألفين كيلومتر




ملخص صيانة العشرين ألف كيلومتر


تم تغيير فلتر الهواء (150 جنيه)

تم تغيير تيل الفرامل الأمامي (450 جنيه للقطعتين)

تم تركيب حساسات ركن (450 جنيه بالتركيب)

تم عمل Activation للإنذار , بيعدلوا في Software العربية , المهندس اتصل بيا وقاللي هايتكلف 200 جنيه (مركز السبع زهراء المعادي ) وكان ردي ان دي حاجة انا دافع تمنها في العربية مش مطلوب مني أدفع تمنها تاني , قاللي علشان تعديل السوفتوير وكلام مش مقنع بالمرة , بس اضطريت ادفع صاغراً لأن ماعنديش وقت أروح مكان تاني واتخانق , لكن الكلام ده للتحذير من التكاليف الوهمية , وبلغت خدمة العملاء عندهم باستيائي الشديد من كدة, الله أعلم إيه بقى رد فعلهم الهلامي

تم عمل Rotation للكاوتش زي اللي حصل في صيانة الـ 10,000


رجلاش لفرامل اليد





-----------------------------------------------------------------------------------------------------


لحد كدة وكان ده ملخص الصيانات المتتالية , نيجي بقى للتجربة العامة مع العربية على مدار المسافة الطويلة المقطوعة بيها:


أولاً: الإضاءة:


كشافات العربية كويسة جداً ومفيدة على المدى الطويل , خصوصاً ان كل العربيات نازل معاها كشافات إضافية (اصطلح الناس على تسميتها بكشافات الضباب , لكن هي عملياً لا تصلح للضباب)

ملحوظة : الناس فاكرة ان النور الطبيعي بيكون منور لما اللمبة الزرقاء في التابلوه تنور !! فعلياً ده النور العالي حضرتك وده بيستعمل في الطرق السريعة ذات الاتجاه الواحد فقط يا فندم !! ... كدة هاتلاقي كل اللي قدامك بيدعي عليك


النور العادي للعربية كويس , متوجه بشكل أكبر ناحية اليمين لمراعاة المشاه أثناء السير الجانبي , يعني العربية بتنور كشافاتها اليمين بشكل أقوى علشان ده الجنب اللي "المفروض" بيكون عليه مشاة , ولازم تاخد بالك منهم ومن تصرفاتهم المفاجئة الغير مبررة في أحيان كتيرة


نور الضباب مش قوي , ولا ينفع أي كشاف في اختراق الشبورة , كل الحكاية ان كشافات الضباب الفعلية بيكون لونها مايل للاصفرار علشان الطول الموجي للضوء يكون أفضل في مدى الرؤية , نفس فكرة ان الكشافات الخلفية لونها أحمر علشان تظهر وتبان لأطول مسافة ممكنة

عملياً , باستعمل نور الضباب للكشف عن المستوى المنخفض للطريق واكتشاف المطبات والحفر والمفاجآت السعيدة اللي مالية شوارع المحروسة !! , وباستعمله للسير بسرعات منخفضة وقت الزحمة وباطفي النور العادي علشان ماضايقش اللي قدامي لأن العربية عالية عن عربيات الناس ونورها بيضايقهم , ودي ملحوظة تتاخد في الحسبان , ادي الطريق حقه وحافظ على الناس اللي حواليك


المساحات :


ممتازة جداً جداً جداً , طالما كل يوم بترفع المساحات وتنضف التراب المتحوش تحتها , وبتخلي الشفرات المطاطية نضيفة علشان الزجاج مايتجرحش , هاتلاقي المساحات وأداءها ممتازين جداً , خصوصاً وقت المطر الشديد , السرعات المختلفة اللي فيها خلتها ماشاء الله ممتعة وقت ماكانت شغالة , وباستعملها في تنضيف الزجاج بالمية وقت ماكون مستعجل وماعنديش وقت المعه


أداء المحرك:

المحرك بالنسبة لحجمه يعتبر ممتاز , التسارع والسحب بيتخلف من فترة عمرية للمحرك إلى فترة أخرى زي ماسبق وذكرت فوق , خصوصاً في الآلاف الأولى للكيلومترات

التسارع مش قوي , ودي حقيقة لازم نذكرها , بيكون تسارع ممتاز فوق سرعة 60 , أما تحت كدة فبيكون متوسط خصوصاً عند البدء من الثبات على المطالع , وهاحكيلكم ليه


العربية مصممة للتوفير في استهلاك الوقود , علشان كدة وزنها خفيف , وسعتها اللترية في الشرق الأوسط 1500 سي سي , في حين ان فيه منها 1600 و 1800 في أمريكا , وكومبيوتر العربية مبرمج على ضخ الوقود بشكل يحقق حركة "عادية" مع استهلاك "ممتاز" للبنزين

في الطرق العادية ضغطة رجلك هاتخلي العربية ماشية وتسارعها بطئ بس ثابت , ولو قابلك مطلع ومحتاج تتسارع وخليت ضغطة رجلك هي نفس الضغطة: العربية هاتحس انها مش بتتسارع وانها ضعيفة , لكن بص للعداد ولاحظ ان عدد لفات المحرك ثابت لكن السرعة بتزيد ببطء شديد , لو رفعت رجلك وضغطت بشكل أكبر سنة طفيفة , العربية هاتستجيب وتجيب النقلة المناسبة (التالت) وتطلع بسرعة وعداد اللفات هايزغرط , وصوت الموتور هايعلى بشكل كبير , وبالطبع استهلاك الوقود


ملاحظة أخرى:

عدد لفات المحرك المظبوط بيكون 2000 لفة بالتمام والكمال عند سرعة 90 , وبيوصل 2500 عند سرعة 100 , وبيعدي ويوصل 2700 عند 120 , وأكتر من كدة المؤشر هايوصل 3000 عند السير في خط مستقيم بسرعة ثابتة


وانت ماشي على سرعة 80 المفروض عدد لفات المحرك مايزيدش عن 2000 , لو لقيته زايد عن كدة : ارفع رجلك واضغط ضغطة تانية أخف , هاتلاقي العربية استمرت فوق ال 2000 لمدة ثانيتين وبعد كدة تعود إلى رشدها وتظبط الاستهلاك مع السرعة المتوسطة اللي انت جايبها ويرجع تاني عند 2000 أو أقل لو انت أقل من 80 كيلومتر ساعة


عند التسخين:

العربية بتدور على 1700 لفة , تحتاج 30 ثانية وتوصل 1400 لفة , تحتاج دقيقة كمان وتقرب من الـ 1000 لفة , في المجمل : بتحتاج دقيقتين علشان تمشي بيها مرة واحدة وتمشي بالسرعات اللي على مزاجك , لكن بتحتاج 30 ثانية فقط علشان تتحرك بيها ولكن على سرعات منخفضة فقط (مش أكتر من 40) لمدة دقيقتين

لما تسخنها كويس (اكتر من دقيقتين قبل التحرك) هاتلاحظ هدوء صوت المحرك طوال فترة رحلتك, جرب وشوف بنفسك



استهلاك البنزين :


ممتاز للغاية , حطلها بنزين 92 فقط وكل 10 آلاف كيلومتر حطلها منظف دورة محرك STP , التانك 41 لتر .... بيعمل 600 كيلومتر ويتبقى 3 لتر كمان !!


التفويلة الواحدة بتمشيني ما لا يقل عن 550 كيلومتر مشغل التكييف وماشي سريع وبطئ في طرق سريعة ومتوسطة ومزدحمة , مش باحرق ومش بازود بنزين عالفاضي ومش بازمجر بالموتور


متوسط الاستهلاك اللي بيظهره كومبيوتر العربية بيكون متوسط الكام دقيقة اللي فاتوا ,,, حضرتك أكيد كنت وقفت حبة وجريت حبة وعملت كذا حركة يخلوا المتوسط يعلى أو ينزل ... وبالتالي ده مش مقياس لحساب متوسط استهلاكك الفعلي .... احسبها بالورقة والقلم من ساعة ما تملى التانك للآخر لحد ماتروح تملاه تاني , وشوف عملت كام كيلومتر بالكمية اللي استهلكتها ...ساعتها بس تعرف استهلاكك الحقيقي


الفرامل:


ممتازة , وهافضل اقول كدة للصبح (على الرغم من عيوب التيل والصاجة الخلفية)


لكن, علشان تفضل فراملك ممتازة (وخصوصاً لو كنت أوتوماتيك مش مانيوال) , محتاج تتبع التالي:


أول شئ , تيل الفرامل ناشف وخامته سيئة , متفقين على كدة وده قدرنا لحد ماربنا يحلها من عنده, بس خلينا نوصل لحل يمشينا بيه فترة محترمة


لازم نعرف ان أداء التيل بيعتمد بشكل كلي على أسلوبك في القيادة , خصوصاً في الزحمة, وبناءً عليه خلينا نشوف هانعمل إيه


1- التيل كل ما بيسخن كل ما مدى تآكله بيزيد , يعني ماتفرملش بقوة على سرعات عالية , ولازم تعرف ان شغل الحرق والجري والغرز والفرملة المفاجئة هايخلي التيل يموت في مرحلة الطفولة

2- فرملتك تكون متقطعة , مش تنزل سرعتك من 100 إلى الصفر بضغطة واحدة , سيب مسافة للتيل يتهوى ودرجة حرارته تنخفض

3- في الزحام , ماتمشيش على الفرامل , ودي مخصوصة لأصحابنا اللي معاهم أوتوماتيك , بمعنى : انك في الزحمة بتخلي رجلك عالفرامل والعربية بتندفع تحت كبح الفرملة بشكل جزئي , فهي ماشية لكن لمبة الـ Stop منورة , كل ده انت عمال بتاكل في التيل بتاعك مع كل حركة منهم , التيل للفرملة فقط مش علشان تخليها ماشية بتتمختر فوق كوبري 6 اكتوبر !! ... فرمل ووقفها تماما, وخليك ماسك فراملك , لكن وقت ما الزحمة تتحرك سيب العربية أو اضغط بنزين , ولما الزحمة تتوقف تاني فرمل تماماً , ارفع رجلك تماماً من على الفرامل لما تحب تتحرك , واضغط فراملك علشان التوقف فقط ...كدة تحافظ على التيل (علشان الملحوظة دي هي السبب الرئيسي في تآكل التيل في جميع العربيات)


4- مع كل صيانة نضف التيل بالهواء وماتسيبهوش يتراكم عليه طين ورواسب , هو كفاية عليه الرواسب اللي جواه وجاية معاه من الهند !!

5- سكوتك عن صوت صفارة التيل وضعف أداء الفرامل هايخليك بعد كدة تفقد الطنابير , لأنها هايتكون عليها شفة بسبب ان التيل هايكون فيه عالي وواطي لآنه خلاص تآكل وانت مطنشه !!





الكاوتش:


قال من سبقنا فيه الكثير من الشعر , وبالطبع هجاء ... مش مدح


هو كاوتش سيئ لكنه قابل للتعايش , صيني وناشف , صوته عالي , مسكته في الأرض مع الفرملة مش 100% , بيلم طوب وزلط والعربية مافيهاش بيت فوق الكاوتش , دي عالصاج على طول , وبالتالي بيعمل سيمفونية الطقطقة مع كل طريق غير ممهد


الكاوتش قابل للتعايش , بس بشروط:

1- هو مش بيحافظ على ضغط الهواء مظبوط , كل أسبوع لازم تشوف الضغط (حتى لو نايتروجين , وماحدش يقوللي الفرق بين الهواء والنايتروجين شاسع لأن الهواء أصلاً 78% نايتروجين !! )

2- لازم تعمل Rotation مع كل صيانة , لما كنت عامل 18 ألف رحت رصصت في بريدجستون وعجبهم انه محافظ على حالته الحمدلله رب العالمين , وقاللي العامل هناك بالحرف "كل ما تعمل روتيشن في المعاد وتخليه مترصص وضغطه مظبوط , كل مايعيش معاك ويعدي الـ 50 ألف من غير مايتاكل"

3- الضغط الطبيعي بيكون قدام 33 وورا 30 , وماتسيبش بتاع الكاوتش يفتي لأن كلهم كانوا عايزين الكل يكون على 30 , الصنايعي المصري لازم يسيب بصمته !

4- أكتر حاجة يصلح لها الكاوتش الماكسيس هي الطرق الغير ممهدة , يعني لو طريقك لطيف وسليم انصحك تغير لكاوتش محترم زي ميشلان أو بريدجستون أو كونتينيننتال , لو طريقك ترابي خليك عالماكسس , ومش هايخذلك لأنه مابيغرزش !!


ممكن في بعض الأحيان تسمع صوت كأن الكاوتش نايم وانت ماشي عليه , أول حاجة اركن في مكان آمن من البشر و العربيات , وتأكد ان الكاوتش مش نايم , هايطلع السبب في معظم الأحيان هو زلطة / طوبة / لبانة داخلة جوة نقشة الكاوتش , حاول تطلعها بأي حاجة معدنية غير حادة , أو امشي بالعربية على سرعة 100 وهي هاتطير برة لوحدها


الثبات والاتزان والهيكل الخارجي:


عن نفسي ماكانش عاجبني الشكل الخارجي , لكنه مش بالغ السوء , المفروض ان التصميم إيرودايناميكي , وبناءً عليه ممكن العربية تتهز وتترج بيك حتى لو انت واقف علشان فيه مقطورة معدية ولا شوية هوا جامدين قاموا !!


العربية اتزانها كويس لحد 100 كيلومتر ساعة , بتخف بشكل مطمئن وانت ماشي لحد 140 , بعد كدة بتكون بشكل غير مطمئن على السرعات الأعلى من كدة , خصوصاً لو الكاوتش ماكسس


في العواصف الترابية ووقت الهواء الشديد خليك على 100 بالكتير , لأنك لو زودت عن كدة العربية هاتخرج من حارتها لو انت مش متمسك كويس بالدركسيون !! الخفة اللي فيها العربية ممكن تكون حلوة في توفير استهلاك البنزين ... لكنها مش كويسة أبداً في اتزان العربية وقت الهواء الشديد (على الورق بيقولوا ان معامل مقاومة جسم العربية للهواء ممتاز ) لكن فعلياً تأثرها بالهواء شديد وبيخليها غير صالحة للجري وقت العواصف ...عن تجربة



المفروض العربية تكون محافظة على ثباتها عند تغيير الحارات لحد 140 , وأقصاها 100 في الملفات مش أكتر من كدة علشان فيه احتمالية كبيرة لفقدان السيطرة لو خدت ملف على سرعة أكبر من 100



التجهيزات الداخلية :


التابلوه فقير !! حقيقة لا ينكرها إلا متعصب , فكيته حتة حتة علشان كنت عايز اركب فلتر تكييف (وهانجيله بعدين ان شاء الله ) ... وزعلت على اني دافع 100 ألف في عربية التابلوه بتاعها من بلاستك معاد تدويره !! , أول مرة في حياتي اشوف مسامير بلاستك , وتابلوه معمول حتة واحدة كدة مافيهوش قطع تتشال وتتحط !


التكييف ممتاز جداً ... مع ملاحظة ان الكومبريسور مش بيشتغل بكامل طاقته إلا مع تحرك العربية فوق سرعة 40 كيلومتر ساعة , حفاظاً على ضغط الفريون , يعني ماتتوقعش أداء كويس للتكييف في الزحمة في عز الحر , لأنك يا تشغله ساعتين وتفقده للأبد يا تصبر دقايق لحد ماتتحرك بعد كدة يفضل متحافظ عليه على طول (الحكاية دي لازملها حل يا نيسان , مش هاينفع تبرير الحر في الزحمة علشان نحافظ على ضغط الفريون)


فلتر التكييف :

كنت مسافر برة ورحت توكيل نيسان وعرفت ان العربية مالهاش فلتر هواء بينزل فيها , لازم تشتري

وعرفت حاجة كمان , ان الفلتر بتاعها غير متواجد أصلاً


وعرفت حاجة كمان من واحد هندي , ان فلتر العربية الشكل القديم بيركب على الشكل الجديد , (ماعرفش ده بجد ولا كلام هنود , وحلها ان واحد عنده فلتر شكل قديم يروح يركبه في الشكل الجدي ويقوللنا)

اشتريت فلتر من برة وطلع حجمه أكبر من الحجم المطلوب وقصيته , وبصراحة العربية من غير فلتر كان التكييف من غير ريحة , ومع الفلتر ....ريحته طلعت !!! وشلت الفلتر بعد ألفين كيلو وكان زي الطين , غسلته وعقمته في المايكروويف وماشغلتهوش تاني علشان مش ناقصة روايح !!


مكان الفلتر في الشكل الجديد:

تحت التابلوه , على الجانب الأيمن تحت الدرج , انزل تحت خالص , على شمالك هاتلاقي غطاء أبيض (وهو الغطاء الوحيد الأبيض داخل صالون العربية) ... يتفك بالأيد , هو ده مكان الفلتر




كماليات يغفل الناس عنها وهي موجودة في نيسان صني الشكل الجديد:


1- الإنذار (محتاج يتفعل في مركز الصيانة)

2- النور بيقفل مع إغلاق العربية بالمفتاح , وبيشتغل لوحده لما تفتح الباب تاني

3- مزيل الضباب الخلفي على الزجاج الخلفي , الزرار المواجه لزرار التكييف

4- أوضاع التكييف المختلفة , الوضع على أقصى يمين البكرة بيسيح الضباب عن الزجاج الأمامي كمان , وبينفع لو معاك حد بيشتكي ان الهواء البارد بييجي عليه , كدة انت ممكن تبرد العربية من غير الهواء ما يؤذي حد

5- المفتاح مش هايطلع من الكونتاكت في العربيات الأوتوماتك من غير ماتكون جايبها الفيتيس على P , والعربية مش هاتدور لو كنت جايب أي وضع تاني غيره

6- Brake Assistant , ده بيكمللك الفرملة لو ضغطت عليها ضغطة مفاجئة لكن ضعيفة , هاتلاقي الدواسة بتنزل للآخر والعربية بتفرمل معاك بشكل ممتاز , وبيفيد لو حد رجله تعبانة أو كان كبير السن أو كانت بنوتة وضغطتها على الفرامل مش قوية





عيوب شديدة محتاجة نظرة من نيسان :


1- الصاج الضعيف جداً , ماينفعش قطة تطبق السقف ولا شاب لطيف ظريف كان قاعد ويا أصحابه يطبق الشنطة

2- تيل الفرامل الهلامي , محتاجين نوع أفضل من كدة وبلاش الهندي المصنوع من بقايا اللبان السحري

3- التابلوه وخاماته الرديئة , محتاجين نظرة لأنها عربية مدفوع فيها فلوس

4- الكاوتش العجيب قاذف الزلط والطوب , مش هايخس عليكما حاجة لو خليتوه ياباني يا نيسان يا ياباني

5- الإنذار ينزل متفعل في العربيات كلها , مش يبقى باب كل ميكانيكي يعمللي منه سبوبة , انا حاسس اننا سنة 1999 ورايح انزل ويندوز ! يعني ايه 200 جنيه مقابل تفعيل إنذار علشان السوفتوير ؟؟!!!

6- الزجاج ينزل بمقاييس مظبوطة , احنا مش بنعمل أزايز كازوزة هنا ... مدى الرؤية الجانبية بيكون مهم جداً ومش معقول يطلع فيها ميول

7- ياريت لو ينزل كوريك محترم عليه القيمة , العربية دي بيشتريها بنات وسيدات ومش هاينفع أبداً أسلوب الكوريك بتاع سنة 1960 ده !!



ده كان ملخص مشواري مع النيسان صني الشكل الجديد , مع ملاحظة صغيرة ان مشواري اليومي لا يقل عن 120 كيلومتر وبيوصل ساعات إلى 250 كيلومتر يومياً ... يعني أقل حاجة في العربية لازم احس بيها

أولا:الحمد لله على سلامتك ويارب تكون فى صحه جيده
ثانيا:أنا مهما هقول مش هقدر اعبرك على مدى اعجابى الشديد الشديد برأيك الموضوعى بدون تحيز او تعصب ولكن بطريقه خلتنى اقرا الموضوع اكتر من مره علشان استفيد من النقط المهمة واللى كلنا ممكن نكون محتاجين اجابه عليها

واعتقد ان لكل عربيه مميزاتها وعيوبها ولو شركه نيسان اعطت الاهتمام لشكوى العملاء اعتقد ان فى تغير كبير سوف يحدث
اخيراا
الشكر واجب لتعبك و طريقه كتابه التقرير الاكتر من ممتع
ارجوا من حضرتك المزيد و المزيد من تقرير ومواضيع نستفيد ونعرف كل ما يدور فى افكارنا لكى نطمئن على قرار اختيارنا