ما تيجو نبقي شعب محترم

**MMamdouh** · 07-08-2008 03:22 AM

المشاركة الأصلية كتبت بواسطة bosyfadl

و بعدين انت مش واخد بالك ان لو كل واحد فينا عمل اللي عليه صح اساسا مش هيبقي في مشاكل الحكومة تحلها؟؟؟؟؟؟؟؟؟؟

معلش حسالك سؤال مهم هنا يا بوسى... طيب و اللى نلاقيه مش ماشى على النظام حنعمل فيه ايه؟؟؟

لو كل مواطن محترم الحكومة حتصرفلة طبنجة يضرب بيها كل واحد بيكسر القانون يبقى ماشى الكلام و فكرتك تبقى هايلة

لكن لما ابقى انا و انتى و هو ماشيين على النظام و يجى واحد يخالف النظام و يدوس على القانون و ياخد حق مش بتاعة و ممكن اوى يكون حقى او حقك هو اللى اتاخد و ميبقاش فيه ردع و الدنيا تمشى عادى كدة يبقى كلامك مش منطقى

يا ست بوسى اذا كان اللى بيكسر اشارة عايزين يحبسوة و اللى غرق 1033 واحد خد براءة... يبقى الحكومة ليها دور مؤثر فى الموضوع ولا لا؟؟؟؟

MMamdouh

**Bossy_Fadl** · 07-08-2008 03:39 AM

المشاركة الأصلية كتبت بواسطة MMamdouh

معلش حسالك سؤال مهم هنا يا بوسى... طيب و اللى نلاقيه مش ماشى على النظام حنعمل فيه ايه؟؟؟

لو كل مواطن محترم الحكومة حتصرفلة طبنجة يضرب بيها كل واحد بيكسر القانون يبقى ماشى الكلام و فكرتك تبقى هايلة

لكن لما ابقى انا و انتى و هو ماشيين على النظام و يجى واحد يخالف النظام و يدوس على القانون و ياخد حق مش بتاعة و ممكن اوى يكون حقى او حقك هو اللى اتاخد و ميبقاش فيه ردع و الدنيا تمشى عادى كدة يبقى كلامك مش منطقى

يا ست بوسى اذا كان اللى بيكسر اشارة عايزين يحبسوة و اللى غرق 1033 واحد خد براءة... يبقى الحكومة ليها دور مؤثر فى الموضوع ولا لا؟؟؟؟

MMamdouh

طبعا الحكومة ليها دور و كل حاجة

بس يعني بدون الدخول في حوارات هتخليهم يبعتولنا البوليس دلوقتي علي بيتي و بيتك

انا كلامي كله بيتلخص في حاجة واحده

لو كل واحد عمل اللي علييييييييييييييييييه البلد هتتغير و لو بنسبه خمسين في الميه

و بعدين فكرة ايه اللي هايله يا ممدوح؟

هو النظام و احترام القواعد في كل شيء بقي مجرد فكرة يحتمل تنفيذها او لا؟

مع احترامي بس النظام عمره ما كان فكرة

النظام اسلوب حياة زي ما قولت

و انا برضه مصره ان لازم كل واحد يعمل الصح و يلتزم بالنظام

و لو قعدت تبص علي اللي مطلوب من الحكومة هتلاقيه كتير اوي و هتطلع الحكومة مديونلنا بكتير

فهنلبس كلنا نضارات سودا و هنشرب قهوة ساده و هنتفرج علي نشرة 9

و نموت اخر الليله من الاكتئاب

يبقي انا شايفه انك تعمل اللي عليك و بسسسسسسسس

ماليش دعوة بقي اذا كان غيري ده مبيفهمش و لا غبي و لا مترباش علي الصح

و الله لو ده حصل هتلاقي البلد بتتغير سنه ورا سنة

مش عارفه بس دي وجهة نظري

و انا طول عمري باقتنع باللي اتربيت عليه

**Bossy_Fadl** · 07-08-2008 03:47 AM

المشاركة الأصلية كتبت بواسطة mkhalifa73

انا معاك هو ده الصح ملناش دعوه بحد كل واحد يعمل اللي عليه ويبدا بنفسه وملووش دعوه بحد تخيل لو كل واحد عمل كده وخلاه في نفسه اكيد هيبقي في حاجه كويسه
انا عن نفسي كنت وانا سايق بشتم وبسب وبلعن وبشد (بحااااااااااااارب)
بس لقيت الموضوع مش مستاهل يا عم اللي عايز يعدي يغور انا هسوق باعصاب هاديه ومش هتنرفز مش هتنرفز ايوه انا كل لما بركب العربيه بقول كده لنفسي انا مش هتنرفز النهارده وبعدين انا عايز اقولكوا حاجه
في حاجه اسمها سواقه العربجيه اللي هيه سواقه النقل والمكروباص والميني باص والاتوبيس
تصدقوا بالله انا مكنتش بسكت لاى حد لحد مره واحد رخم عليا ومسبتوش الا لما جبته وذليته ماشي ورايا بالراحه ومعرفش يطلع مني علي طريق اسكندريه الصحراوي قبل الرمايه ولما دخلت ميدان الرمايه جبته جنبي علشان اتشفي فيه
ووالله من اول ما نطق استغربت جدا لقيت متخلف عقليا وعمللي فيها عبيط وبيضحك ضحكه بلهاء والله مكملتش معاه كلام وسبته ومشيت فجاه وانا بقول لنفسي ايه العبيط اللى انا وقفته علشان اكلمه ده
انا مش عربجي ومش هسمح لنفسى ادخل منافسه مع واحد عربجي
اصلا مش هبصله ولا كانى شايفه

بصراحه عجبتني اخر جمله في كلامك جدااااااااااااااااااااا

انا بحترمك من غير ماشوفك عشان احترامك لنفسك

كويس انك وصلت للنهايه دي

انا مش عربجي و مش هاسمح لنفسي ادخل منافسه مع واحد عربجي

احترامي و تقديري ليك

المشاركة الأصلية كتبت بواسطة Akram

محمد ممدوح ...
ازيك يا باشا ,,,
كلامك صح بس ده حال البلد ,
احنا بنتكلم على دعوة للحل , حتى و لو كان حل جزئي ,
و إزاي ممكن نحل المشاكل دي لو كل واحد قال البلد حالها بقى كذا و طالما مفيش رقيب يبقى إعمل اللي انت عايزة ووووووو.......
انت كون رقيب على نفسك و ابدأ بنفسك و بس ....
كل واحد يبدأ بنفسه .....

مش هاقدر اقول اكتر من كده

دعـــــــــــــــــــــــ ــــــــــوة للحــــــــــــــــــل

احيي فيك روح التفاؤل دي يا اكرم

**MMamdouh** · 07-08-2008 10:22 AM

مرة تانية.... كل اللى بتقولوه صح.... بس برة مصر

جوة مصر قواعد الحياه مختلفة عن اى حتة

انا مش بقول ان انتوا غلط.... مصر هى اللى غلط... و بالتالى القواعد اللى بتنطبق فى كل حتة فى الدنيا مبتنطبقش هنا

سؤال صغير

اى واحد فيكم بيسافر برة... بيبقى ملتزم ولا همجى؟؟
بيبقى ملتزم

بتبقوا ملتزمين ليه؟؟ هل دى طبيعتكم ولا خوف من العقوبة؟؟
لا مش خوف... احنا طبيعتنا كدة

طيب لما يسافر واحد همجى؟؟
حيبقى ملتزم بردة

اشمعنى بقى؟؟
لان برة فيه قوانين صارمة و بتتطبق على الكل... فالهمجى غصب عن عينة حيلتزم بالقوانين خوفا من العقوبة

هى دى النقطة اللى انا بتكلم فيها من الصبح... مفيش حاجة اسمها عودة النظام بنسبة 50%... النظام نظام... اما موجود او مش موجود

يعنى اما كلنا نلتزم او كلنا نقضيها... مينفعش المحترمين يلزموا و الهمجية يبقوا هما بشوات المجتمع بخرقهم للقانون و حصولهم على حقوق مش بتاعتهم (اللى هى حقى و حقك)

و على فكرة المشكلة مش فينا (الناس اللى عايزة النظام)... المشكلة فى اللى بيكسروا النظام.... احنا سهل علينا قوى نبقى منظمين لاننا فاهمين ان النظام حضارة لكن اللى بيتعامل بهمجية مبسوط لان الهمجية بتديلة مكاسب زيادة فى ظل غياب عقوبة رادعة

انا مش حقدر اتعامل بالنظام طالما اللى بيغلط مبيتحاسبش... اه مش حبقى بلطجى ولا عربجى و لا همجى لكن لما تبقى الدنيا سلطة حاضطر اخش فى السلطة عشان حقى ميضعش... و طبعا من غير كلام لو فيه موقف او مكان التعامل فيه بنظام فا انا ححترم النظام

على فكرة انا مش بدعو للبلطجة... انا بدعو لعمل وقفة حازمة مع من يستهترون بالنظام.... يعنى من الامثلة البسيطة فى كارفور و انت واقف على طابور الكاشير ساعة و بعد ما توصل و تيجى تحاسب تلاقى واحد امور بيقولك اصل انا معايا حاجات قليلة و حقف فى الطابور كتير... يعنى انت ابن باشا و احنا ولاد البطة السودة مثلا؟؟

حصلت معايا شخصيا بس الست اللى طلبت الموضوع دة كانت بتكلم الولد الكاشير و هو اللى طلب منى... طبعا اديتة وش جبس محترم و مفتحتش بقى... و هو من نفسة اخد حاجتى من سكات و حاسبنى الاول

مثال تانى فى الباركنج... لما بركن بسيب بوز العربية برة شوية... عشان ميجيش واحد خفيف يركن قدامى بالعرض و يعشق عربيتة و يحبسنى وراة... اه مش منظر عاطفى بس المضطر يركب الصعب

لما يبقى طريق رايح جاى و اتجاهك مقفول و تلاقى واحد فهلوى دخل عكس لحد ما بقى فى وش الناس اللى فى الاتجاه المقابل... انا بفضل زانقة فى الحارة العكس اللى هو فيها و مبدخلوش قدامى ابدا... بسيبة زى الكلب فى مكانة و بتمنى الكل يعمل دة عشان يجبرة انه يرجع بضهرة لاخر الطابور عشان يتعلم الادب... بس للاسف بيطلع فيه واحد عندة زوق اكتر من اللازم و بيعدية قدامة و بالتالى اكنة بيكافئة على خطائة و دى بمثابة دعوة لتكرار الموضوع

احد اضيف ان لو كانت العقوبة بتتطبق على الكل و اللى زى دة اترزع مخالفة سير عكس الاتجاه كان اتعلم الادب... لكن للاسف هو بيعمل الغلط و الناس المحترمة بتكافئة على غلطة بسلامة نية... انا ارفض انى اكافىء المخطىء و ارفض اكون ضحية عدم الالتزام بالقوانين

MMamdouh

**mohamed ismail** · 08-08-2008 01:22 AM

المشاركة الأصلية كتبت بواسطة bosyfadl

ده الكلام الصح

فعلا انا شايفه ان كل حد عمال يستسهل و يعلق اخطائه و اخطاء الكل علي شماعه

يا جماعه ياريت نبص لنص الكوبايه المليان شوية

و نتاكد ان لو احنا فينا الخير كل حاجة هتبقي كويسه و صح

Good point و الله

بجد حاجة حلوة اوي لو تحصل مننا كلنا

بس المهم الناس تقتنع اننا بنحاول المساعده بس

لحسن انا شخصيا لو حد قالي كده هصوت و اسيبه و اجري

هههههههههه

جزاك الله كل خير علي المبادرة الحلوة دي يا اسامة

و ربنا يقدرنا كلنا علي فعل الخير

معاك حق التغيير لازم يكون نابع من جوه طبعا

و اللي بيقول حاجة و بيعمل غيرها او بيكون جواه غيرها يبقي منافق

ارد عليك انا بقي و اقولك وجهة نظري و اقولك انا باتصرف ازاي في كل موقف من دول

انا اول واحده عندك برفض اي واسطه من اي نوع

انا كنت باشتغل في شركة اجنبيه كبيرة جدا

و كان قدامي وظيفه تحفه بمرتب خيالي

كان مطلوب فيها الكواليفيكيشنز بتاعه خالي

و المدير مكانتش بتروحله السيفيهات غير عن طريقي

يعني السي في اللي هوديهولو هو اللي هيتعين

و اقسم بالله ان خليت خالي يتقدم زي اي حد و يبعت السي في بتاعه

و حطيته في وسط السيفيهات و مقولتش للمدير ان خالي من ضمن المتقدمين

بلاش

حاجة تانية

انا بابايا مستشار كبير لمجموعة شركات اجنبيه

كل الناس قالتله ماتاخد بوسي معاك في الشركة

قالهم انا مبحبش الواسطه عاوزة تيجي تقدم تيجي زي اي حد

قولتله و انا باقولك يا بابا اني لو قدمت و قبلت ياريت محدش يعرف في الشركة اني بنتك عشان اتعامل زيي زي اي حد

بلاش دي كمان

رخصتي بتاعه السواقه عمري ما فكرت اطلعها بفلوس

عشان لازم ادخل الامتحان و اخد فرصتي

و عمري ما فكرت و قولت لا انا هاسقط و مش هاطلع الرخصه

كل تفكيري كان اني اتعلم سواقه بجد و صح و ابقي عارفه اللي ليا و اللي عليا علي الطريق عشان اطلع رخصه زي اي حد بيسوق بجد

عشان دي حياة ناس اللي احنا ممكن نضيعها لو مبنعرفش نسوق و مطلعين الرخصه وجاهه و نزاهه

و انا لو سقطت هافضل اعيد في الامتحان لحد ما انجح

لكن عمري ما هادفع رشوة لحاجة انا ممكن انجح فيها بنفسي و بمجهودي

و لان ده حرام قبل اي شيء

و بتهيالي تربيتي و ديني عمرهم ما هيسمحولي اني اخرج ابني في المستقبل من غلط هو ارتكبه لمجرد انه ابن حد مهم

لا لازم يدفع تمن غلطاته كويس اوي عشان يعرف الصح من الغلط حتي لو هيتسجن

يارب تكون وجهة نظري وصلتك

و انا اللي اسفه علي الاطاله

اخت بوسي اولا باحيي والدك الراجل المحترم اللي انجب لنا شخصية محترمة جدا زي حضرتك
ويا ريت معظم الناس تتصرف وتفكر زي حضرت وانا باقول يا جماعة فيه امل لاننا امة فيها الخير الي يوم القيامة

استاذ محمد ممدوح عندنا في الهندسة بنعلم للطلبة ان التغير اللحظي مستحيل عمليا وده فعلا حاصل فاعتقد اننا مش ممكن نتغير من حال الي حال في يوم ولا اتنينالموضوع عاوز وقت وممكن نبقي البداية بس منشفش نتيجة ممكن نبقي بذرة بس منحصدش ييجي ولادي وولادك هما اللي يحصدوا
بس يكفينا شرف اننا كنا منالمحاولين لتغيير الوضع

**THEMAYOR** · 08-08-2008 10:16 AM

لو كل واحد فينا بيفكر زيك يا استاذة بوسى انت و السيد الوالد الفاضل اكيد البلد هتبقى كويسه. انا عن نفسى باعمل كده و كان لسه ابن خالتى عايز يشتغل فى الشركة الى انا فيها و بالرغم من ان منصبى فى الشركة يسمح لى بالتوسط له و لكنى اخذت قرارى بانه لو ربنا كاتبله يشتغل معانا هيشتغل بدون ادنى مجهود منى و لو مش كاتبله لو كل الشركة اتوسطت مش هيشتغل. مع العلم ان الوسايط ضيعت عليا اجمل فرص شغل كنت بتمناها بس الواحد مش لازم يقول زى ما عملوا فى انا هاعمل . ده بلد كلها وسايط هى جت عليا لمل اشغل قريبى . كل ده كلام يودى الى الاسوء

و احب اقول للسادة الافاضل الى بتقول لما الحكومة تقوم بدورها نبقى نقوم بدورنا . هم الحكومة مين مش ناس من الشعب يعنى انا و انت . يعنى لو ربنا اكرم واحد فينا و اصبح ممثل عن الشعب او فى منصب قيادى و الواحد ده كويس اكيد هتبقى الحكومة كويسه .

ثانيا الحكومة ليست ممثله فى الوزراء فقط لا غير و انما ممثله ايضا فى الموظفين التابعين للوزرات و الذى يكون اغلب تعاملنا معهم و شكوانا منهم و هم فى الاصل من الشعب .

و من الوارد ان يصدر الوزير قرار خاطى و لكن لو وجد من يصححه له من معاونيه او الشعب سوف يمتثل لهم " مثلما حدث فى مشروع اجريوم " بغض النظر عن كثرة المحاولات التى تمت حتى حدث التعديل .

اعتقد اننا لو صممنا ان نحسن البلد و شكلها و سلوكيات ابنائها مثل تصميم شعب دمياط على رفض المشروع لسوف تتغير ملامح مصر قريبا

طولت عليكم بس الواحد مبيحس بنفسه و هو بيتكلم مع اعضاء مميزين مثلكم

و السلام عليكم و رحمه الله و بركاته

**OlaOsman** · 08-08-2008 11:01 AM

لو كلنا استنينا الحكومة تبقى كويسة و حال البلد ينصلح يقوم احنا كمان حالنا ينصلح بالتبعية يبقى اننننننننننننننسى يا عمرو

بوووووووووووووسيييييييييي ييييييي.. الله ينور عليكي