الموضوع: سؤال عن تيل الفرامل الأمامي .. لانسر 2013

المشاركة الأصلية كتبت بواسطة dragon78

السلام عليكم

مش هاطول عليكم ياجماعه .. باختصار انا كنت الاسبوع اللي فات في صيانة الـ 10 آلاف لعربيتي

فوجئت بالمهندس بيقولي "عربيتك محتاجه تيل فرامل أمامي .. عامل 600 جنيه" .. بس انا ماكنتش عامل حسابي طبعا

وبعد سؤالي لكذا واحد أعرفه بيقولوا ان لسه بدري على تغيير التيل أنا يادوب لسه كاسر الـ 10 آلاف بحاجه بسيطه

سؤالي هنا بقى هو : هل تيل الفرامل لو فعلا فيه مشكله واتاكل بدري كده يبقى ده كده يدخل في الضمان ؟

بمعنى ان لو العربيات اللي زي عربيتي كلها بتغير على بعد الـ 10 آلاف بكتير يبقى كده عربيتي كان فيها مشكله من الأول , وأعتقد اني قريت في الكاتالوج ان الحاجات اللي مش داخله الضمان هي البطاريه بس اللي عليها ضمان سنه . والباقي 36 شهر

ياريت اللي عنده معلومه يفيدني بيها ياجماعه ويقولي أعمل ايه

مع العلم انا أول ماروحت الصيانه ماكنتش باشتكي من الفرامل خالص .. لسه يادوب امبارح اللي ابتديت اسمع صوت صفاره خفيفه أوي كده ومش بتصفر على طول .. أحيانا بس لما بادوس فرامل تقيله شويه .

وشكرا مقدما لكل اللي يهتم ويرد عليا .

تحيـــــــــــــــاتي

فعلاً سعر التيل الاصلي غالي بس بيحافظ على الأمان و الطنابير ولاكن...... ممكن تجيب التيل الاصلي من محل خارجي و اي ميكانيكي يركبهولك العملية مش محتاجة توكيل....
انا شخصياً و انا بعمل صيانة لعربيتي في مركز الرواس فرع وسط البلد..الفني قال لي ان التيل ممكن يستحمل 3000 ك تاني و سالت على سعر الجديد قال 600 جنيه غير المصنعية و الضرائب........
فواحد صديقي دلني على محل في شارع اابحر الاعظم بيبيع قطع الغيار الاصلية و بسعر جيد
رحت له و اشتريت ب 450 جنيه... التيل الاصلي ذو اللون الاخضر...
و انا بغيره كل حوالي 35000 كيلو مش 10000 كيلو ...ليه

حاول تروح مكز صيانه غيره و شوف حيقول لك ايه

أنا معايا الفيرنا 29000 كم و لسه ما غيرتش التيل

أكيد دي مشكله خامه التيل و قارن بين خامه التيل اللي عندهم و اللي فى محلات قطع الغيار

المشاركة الأصلية كتبت بواسطة as_samman

فعلاً سعر التيل الاصلي غالي بس بيحافظ على الأمان و الطنابير ولاكن...... ممكن تجيب التيل الاصلي من محل خارجي و اي ميكانيكي يركبهولك العملية مش محتاجة توكيل....
انا شخصياً و انا بعمل صيانة لعربيتي في مركز الرواس فرع وسط البلد..الفني قال لي ان التيل ممكن يستحمل 3000 ك تاني و سالت على سعر الجديد قال 600 جنيه غير المصنعية و الضرائب........
فواحد صديقي دلني على محل في شارع اابحر الاعظم بيبيع قطع الغيار الاصلية و بسعر جيد
رحت له و اشتريت ب 450 جنيه... التيل الاصلي ذو اللون الاخضر...
و انا بغيره كل حوالي 35000 كيلو مش 10000 كيلو ...ليه

المحل اسمه اية وفين بالضبط فى الشارع

انا برده كنت جايب عربيتى زيرو وغيرت التيل على 10 الف الخلاصه بقا التيل اللى بتيجى بى العربيه
بيقا التيل الاخضر وممكن يتكون العربيه لسا ناشفه عشان كده ممكن يكون ده سبب فى ان التيل يخلص بسرعه
بعد كده العفشه بتريح واكيد انتا حسيت ان العفشه فرقت بعد ال 10 الف ده تحليلى الشخصى.
السبب التانى بقا ان التيل اللى هتلاقى عندك هو التيل الاخضر اللى هو 450 فى بقا تيل تانى بيركب لبومه برده فى التوكيل لونه رمادى ده الى انا غيرته بعد ال 10 الف ده فضل معايا 35000 كيلو لازم تصمم وانتا فى الصيانه وتشوفه بعينك ان اللى هيركب الرمادى لان ناس كتير اوى فعلا اشتكت ان التيل الاخضر بيخلص فى 10 الف كيلو بس
بعد تركيب التيل الرمادى لازم تغيره كل 30 الف ده عشان تحافظ على الطانبير لان التيل ده مبيتكلش بسهوله
و لو مشيت عليه اكتر من 35000 كيلو هيبدء ياثر على الطانبير.
انا لسا مغير تيل وجيبته من المتخصصون تمنه 580 جنيه وهتدفع تركيب الورشه ديه فى الامرية واصحبها
شغالين فى توكيل لانسر قليوب (توكيل مصرية)