الموضوع: دوره التبريد و الحر

السلام عليكم
تحيه للقائمين و المشاركين في المنتدي .. صراحتا اتعلمت منه كتيير جداا
الحمد لله من شهر اشتريت فيات بونتو 2003 و ربنا يكفينا شرها و شر الطريق
طبعا انا لسه معملتش سرفيس للعربيه كل الي عملته غسلت دوره التبريد و حطيت فيها مايه خضرا من 15 يوم تقريبا
الحمد لله العربيه (حتي الان) مفيهاش مشاكل .. لكن النهارده ظهرت حاجه خضيتني .. كالعاده في الزحمه قبل اي بنزينه و الاحظ عداد الحراره متجنن و عالي جدا و طبعا الموتور بقي بيسقف لما اطلع علي الاول من السخونيه ... وقفت و نزلت فتحت الكبوت وبصيت لقيت فيه تنقيط مايه خضرا من تحت الموتور جنب فلتر الزيت ؟؟؟!!! طبعا مش شايف مصدر التسريب لكن دا كان الواضح قدامي .. و طبعا الردياتير مفيهوش اي تسريب واضح و الخراطيم سليمه .. المايه بتنزل منين مش عارف ؟؟!!
مشيت عليها كدا بالعافيه ﻷول بنزينه فتحت القربه و طبعا زودت مايه . العربيه مخدتش غير نص لتر فقط .. قفلت و مشيت بردو بتسخن بطريقه غريبه .. وصلت تاني بنزينه فتحت الكبوت .. مفيش تنقيط مايه نهااائي (شغل عفاريت) .. فتحت القربه و زودت المايه خدت تقريبا 3 لتر مايه ؟؟!! يعني كانت فاضيه ؟!!!
و من بعدها شغاله عادي الحمد لله .. طبعا عديت ع الميكانيكي .. بعد الفحص بيقولي مفيش تسريب العربيه مفيهاش حاجه .. نسخن في العربيه .. مفيش مشكله .. نفحص الزيت عشان نتأكد من جوان وش السلندر .. الزيت عادي جدا .. زي العسل الاسود بس فاتح شويه (طبيعي)
..!! المشكله منين .. مش عارف !! ممكن تكون طرمبه مايه ؟؟!! و لو طرمبه هتسرب شويه و تقف شويه ؟؟!!
انا عايز اعرف سبب الموضوع دا ايه .. ﻷنه مقلق جدا خصوصا في الحر دا
و طبعا دي اجابه اسئله تساعد في التشخيص
و شكرا مقدما
عدد الكيلو مترات 84000 عمل السيرفيس خلال ايام
لا يتم تزويد الزيت
شكل العادم عادي
البوجيهات .. بحاجه للتغير مع السيرفيس
الفلاتر .. فلتر زيت /بنزين جديد
استهلاك البنزين طبيعي / الشكمان طبيعي
الفرامل جيده
السيور تجدد مع السيرفيس
بطاريه و دينمو حاله جيده
قواعد ماتور بحاجه للتجديد

تم بحمد الله تحديد مكان التسريب ... ماسوره المياه الخارجه من الطرمبه .. الماسوره مهترأه و الباروما مخليها مخرمه .. لما الضغط يعلي يبتدي التسريب