الموضوع: فرق شااسع ما بين الياباني و الكوري "ملاحظات علي الكارينز "

المشاركة الأصلية كتبت بواسطة formulator

الـ508 تتفوق فـ نقاط كتييييييييييير عن الباسات نفسها (اللى هى top-seller فـ الفئة دى)؟!!
- فـ طبيعى انى هقولك ان السيراتو الجديدة: على المستوى الفنى technically تعتبر "كنبة" جنب الـ308 (اللى فـ فئتها) مش الـ508؟!!! :b4_237:

>> يعنى الـ508 وإختها الـc5 بنقارنهم بالـs60 والـf30-316i مش بالأوبتيما والسوناتا حتى فـ الكورى؟؟!!!

ردا على سؤالك -- رغم عدم إقتناعى بالمقارنة، ولو حتى السعر واحد؟!!

الـ508 أسرع، أثبت، أفضل عزلا (إلا فـ السرعات العالية -وبنقارنها بالألمانى مش الكورى)، وكمان إستهلاك البنزين معقول بالنسبة لوزنها وموتور التربو!
- الأوبشنز والرفاهية: You'll be more than- satisfied with the standard features in psa..!

Rgds،

شكرا جدا لردك السريع ...... وصل المعني بوضوح
مع ان كلمة كنبه دي وقعتني من الضحك لكن مش عايزين حد يزعل مننا

شكرا ليك ولكل اصدقائنا فى الموضوع

بص يا استاذ محمد كمال...
اللي انت كتبته ده والله العظيم خلاني ادمع....
انا معرفش الكارينز ... بس انا معايا كريستالة 99.. حاليا... وارثها عن والدي الله يرحمه كان استاذ جامعي وانا طبيب اطفال...

الكريستالة معايا وربنا رزقني بمبلغ جبت بريليانس سبلندور 1600 سي سي واللي شجعني اجبها رغم بعض الملاحظات عن وزنها 1390 كيلو المطابق للكارينز بتاعتك...
انا جبت البريليانس حالة زيرووووووووووو 40 الف كيلوبعد شكر جميع اعضاء نايل موتورز صفحة بريليانس ملقتش حد عاب فيها غير ف حاجتين ..
1- سعر اعادة البيع قليل ( ولو انه ف نظري هيرتفع كتير خلال 3 او 4 سنين لان ال في 5 وال اف ار في مكسرين السوق مبيعات... وده نفس اللي حصل مع الكوري من 20 سنة بالظبط.... والدليل ان وانا بغيرلها السيور عند الميكانيكي جالي فيها سعر نهائي بعد ما جبتها ب 5 ايام وكان جاد زيادة عن مجبتها ب 5 الاف جنيه !!!!!!!)
2- انها منيوال ووزنها تقيل ( وده مش مشكلة لاني بحب المنيوال ومش جررررراي اوي ف القاهرة... مبحبش الاتومتيك ولو انه مريح بس بحس اني سايق عربية ملاهي......)

بس اللي خلاني اجبها حجتين:
1- صالونها واسع جدا وعزلها الصوتي والحراري فوق الممتاز
2- وده الاهم انها ميكانيكا يا بانية موثوقة ومجربة والميكانيكي وراني قطع الموتور والفتيس نفسها متسوبيشي اصلي وليس تكنولوجي) وانا اعشق الياباني...


دلوقت لسه معايا الكريستالة برضه...حبيبة قلبي
شالت واتحملت
ويوم بيعها كل ما يقرب بحس احساس الاب اللي مش هاين عليه يجوز بنته...
وبيتلكك للعريس يفركش كتب الكتاب قدام الماذون.....!!!!!!

والله بكل امانة ... اللي بيبيع كريستالة لو باعها لازم يبيعها لراجل يركبها مش لتاجر..
العربية لسه معروض عليا ابيعها وانا واقف قدام كشك ف الشارع وبيجيلي فيها ف المشوار رايح جاي اتنين يطلبوها يوميا بلا مبالغة واللي ركبها هيصدق كلامي....!!!

عشان كده
العربية دي مش للتجار......
انا مقبلش اني اديها لتاجر ....
لاني زي مكون بقبل ان بنتي تمشيي مع شاب ....
لازم يا خدها اللي يصونها....


بس لو انت جبت الكارينز زيرو او كسر زيرو...
ولو كنت صاحب عيلة... يبقى مبروك عليك
افرح بيها...
وممكن تعتبر الكريستالة حبك الاولاني..
والكارينز تبقى مراتك وحب العمر
وعموما انا اكتر واحد حاسس بيك...
بس انا معاناتي والله محدش هيحسها لاني معايا العربيتين...
والكفة اللي هترجح هي اللي تحدده متطلبات اسرتي...
وربنا يهنيك بالكارينز ... ويعوضك فيها خير عن الكريستالة..
والله من قلبي... ربنا يرضيك ...
بس انا هفتكرك انك قلبت المواجع عليا وانا على شعرة....!
وخليت دمعتي نزلت... وانا مادي جدا وواقعي لابعد مدى ... ودموعي عزيزة قوي..

عموما يا استاذ محمد كمال ...
انت معاك الكارينز...
وانا معايا الكريستالة لسه ما بعتهاش...
لو عاوزها متغلاش عليك...
ما دمت مقدرها وهتقدرها ....
فكر ورد عليا ... تحت امرك...

المشاركة الأصلية كتبت بواسطة جيفارا

عموما يا استاذ محمد كمال ...
انت معاك الكارينز...
وانا معايا الكريستالة لسه ما بعتهاش...
لو عاوزها متغلاش عليك...
ما دمت مقدرها وهتقدرها ....
فكر ورد عليا ... تحت امرك...

متشكر جدا يا باشا كلك زوق و الله فعلا كلامك صح اللي ركب الكريستالة و بالذات لو كان جايبها زيرو و محافظ عليها صعب جدا جدا ينساها او يرضي باقل منها و يعلم الله اني عمري ما فكرت ابيعها مع اني طول منا ماشي في الشارع كان في ناس كتير بتطلبها مني بس ربنا اراد انها تتسرق عشان يكون ليا نصيب اجيب الكارينز اللي هيا بردو مش وحشة و انا عارف انها مينفعش تتقارن بالكريستالة بس لازم اللي يغير من ياباني و ينزل لكوري يحس بفرق حتي لما ركبت السيراتو اللي هيا ممكن تتقارن بالكريستالة بردو في فرق