في الاغلب انت بتسوق من غير ما تبص في المرايات الجانبيه و احتمال تكون المرايات خاصه اليمين محتاجه تتظبط كويس علشان تسهل لك الرؤيه لأي حاجه معديه جنبك. احسن حاجه تضبط بيها المرايه الجانبيه ان نصفها من الداخل يبقي جايب يادوب الرفرف و بقيه المرايه جايبالك بقيه الشارع و انك و انت سايق تبقي عينك علي المرايه اللي في النص و بعدين تلمح المرايات الجانبيه كل شويه علشان تشوف المسافه اللي بينك و بين العربيات اللي حواليك و كمان لو حد كان بيحاول يطلع من يمينك تبقي عينك عليه علشان تتفاداه لو كسر عليك و كذلك اللي جاي من شمالك. الموضوع بيبقي اسهل في الطرق السريعه لانك بتبقي بتجري براحتك و مفيش زحمه إنما في الزحمه هتلاقي ناس بتحدف عليك و لذلك بتحس اكتر بالمشكله اللي وارد جدا يكون سببها اللي حواليك و لذلك عن طريق النظر في المرايات الجانبيه هتبقي عندك الصوره كامله . نقطه كمان مهمه و نصيحه ما تعديش بين عربيتين من مكان علي قد العربيه بالضبط لانك مش ضامن اللي جنبك مركزين و لا لأ و كذلك مدي قوه أعصابهم فممكن ينزعجوا من الموضوع ده فتختل عجله القياده من أيدهم او قد يقتربوا منك اكتر فالمرايه تتخبط منك فيهم فحاول تسيب مسافه اضافيه بالعرض بينك و بين العربيات اللي حواليك للطوارئ و ما تزنقش نفسك بين العربيات و لا تتخطي من اليمين العربيات اللي ماشيه جنبك
المفضلات