الموضوع: هي الناس مصممه تعصب الواحد؟!!؟

الموضوع وما فيه ان اختي طلبت ان اوصلها مكان معين في الزقازيق
طبعا امبارح كنت عامل شوية شغل في العربيه وشوية تعديلات بقيت العربية افضل بكتير من حيث السحب ونعومة الموتور وكل لشئ "ربنا يبارك فيها"
المهم رايح انا وهي وبنتها الصغيره والبنت الصغيره عندها سنه وكام يوم
بيني وبين الزقازيق بظبط 21 كيلو من المدينه الي انا فيها للزقازيق
بسم الله
او حاجه ربنا كرمني بسرفيس قفل عليها الطريق واضرب كلاكس يا حاج يا سيدي سيدي وصالك المهم اضطرني ان ارجع لورا حاجه بسيطه وبالفعل رجعت لقيت الي ورايا حاسب يا اعمي قولت انا دغدغت عربيته وانا مش حاسس
نزلت لقيت بيني وبينه زي نص متر "راجل كبير في السن قد ولدي ويمكن اكبر" قولتله انا اسف يا حاج بس عربية حضرتك سليمه قالي وانا هستني لحد لما تخبطها قولتله معلش يا حاج انا اسف
طلعت ومشيت
وصلت بلد اسمها صفط
وفي مطب هناك المهم لقيت 128 طالعه من ورا ميكروباص قاطع الطريق وداخل البلد وانا جي في المقابل دوست فرامل وعشان ماشي برحتي وقفت بمسافه محترمه لقيته وقف في نص الطريق وبصلي كدا بصه بصراحه خوفت دا انا كنت بدور علي طفاية السجايره استخبي فيها من البصه
وعدي الطريق برحته اوي اوي اوي مستني اني اقوله حاجه
بس قولت احرق دمه اكتر واضحك
لقيت الباشا لف بعربيته وجي يجري ورايا "طبعا انا ماشي برحتي دا جي من ورا كلاكسات ونور عالي واقف يله والكلام دا كنت وصلت للمطب الي في اخر البلد دي وبعدها مسافه كويسه تنفع للجري
قولتله تعالي يا حماده طالع من علي المطب علي الاول وكنت علي التراب الناعم والعربيه فركت فركه بجد محترمه وحرقت علي العربيات وواخد اغرزتين وجبته ورايا في غرزه حلوه اوي
دخل ورايا وجبته جمبي بقينا 3 عربيات انا وهو ومكيروباص في نفس الاتجاه وعربيه جمبو جيه في الاتجاه المقابل
ههههههههههههههههههههه
البس يا حماده عشان خرجين
وفضلت ركنه صف تالت لحد لما الجامبو كبست قمت مسقط التالت وحارق عليه
حماده مستحملش الصدمه لف ورجع
قولنا كفايه كدا لعب بقئ وصلنا الزقازيق وخلصنا الورق وكل حاجه تمام
مروح البيت
طلعت من الزقازيق بعد قاعة لجونا
لقيت ميكروباص صيني جي طاير وكلاكسات وهوب طاخ في الاكصدام انا ماشي بيني وبين التراب مفيش متر وماشي بسرعه 60 تقريبا
نزلت لقيت الاكصدام سليم بس الفانوس مكسور "تقريبا اتكسر من الخضه"
خلاص ياسطي حصل خير اركب وامشي ودا مصمم ان انا كنت لازم اوسع ليه الطريق
وقالي عباره كدا "مبتعرفوش تسوقو بتسوقو ليه"
انا سمعتها من هنا واتجننت دا انا عندي رخصه من قبل الميلاد ايام لما كانت بتتطلع منحوته علي حجاره وبدلوها لينا بورق بردي
المهم سبته مشي وانا ماشي عادي من طبيعة السواقين انهم بيقفو لو حد شاور ليهم كل شوية يجي يعدي مني كلاكسات
ايه يا عم انت بطل الكلاكسات في مصر كنا وصلنا بلد اسمها اكوه بعد اكوه دي في وصلتين حلوين في الشد بيفصلهم مطب
قولت تعال نشوف مين الي مبيعرفش يسوق وهوب دخل غرزه لقاني بعدي منه صف تالت وداخل غرزه بعدها من علي اليمين كان واحد ماشي بعربيه 504 في نص الطريق وواحده تانيه من علي الشمال وساحب وصلنا اول مطب
طلعت المطب برحتي وهو ورايا
جه جمبي وبيحرق وانا بشد معاه بس الار بي ام عندي مكنش بيوصل 4
وطلعت منه بشكل لطيف غرزه من قدامه وسبته ومشيت
المشكله ان الناس دلؤقتي بتسكت والناس بتتمادي في الغلط يا ريت بنسكت والناس بتسكت
يعني حماده لو كان عدي الطريق باحترامه ومحصل حاجه انه يجري ورايا ؟؟
ولو هو بيعرف يسوق اساسا زي الناس مكنش عدي التعديه دي ومكنش حط نفسه صف تالت معايا
سواق الميكروباص لازم احط عليك عشان تعرف ان انا بعرف اسوق؟!؟
وكل من هو مشي برحته وعلي جمب ميعتبرش سواق؟؟
الطريق مش بالجري والشد وربنا
السواق الشاطر دلؤقتي هو الي يوصل بأمان من غير ضرر ولي ضرار
الطريق مش بتاعك لوحدك في ناس حوليك
وربنا يستر طريقنا