الموضوع: ميجان ولا فيكترا فى الثبات

السلام عليكم ورحمة الله ..

كنت محتاج منكم مساعده صغيره و إن شاء الله واثق انى هلاقي المساعده الجاده هنا ..

أخوكو زائر من منتدي الأوبل .. معايا فيكترا B موديل 1997 ..

وطبعا الاوبل غنيه عن التعريف .. كامله من كل حاجه ..

نظرا لأسباب معينه ابرزها انى عايز عربيه ناعمه ومريحه
وده مش معناه ان الاوبل وحشه بس هي عربية شغل و dynamiques اكتر منها راحه ونعومه

فكرت انى ابيعها واجيب ميجان 2 .. والأفضل تكون هاتشباك ..


الاستفسار بتاعى بمنتهي البساطه محتاج حد يكون ركيب المانى ومعاه ميجان حاليا ... وجرب يعني ايه المانى وهتكلم بالتحديد فى نقطة الثبات ..


وللعلم ثبات الاوبل للي ميعرفش خلاها تعتبر من افضل العربيات علي مستوي العالم ..

كنت عايز اعرف الفرق قد ايه بين ثبات الاتنين ( ميجان & فيكترا ) ... مدي دقة التوجيه .. ال Handling & traction على السرعات فوق ال 180


وربما يكون سوألي غريب شوية لانى بالفعل شفت ردود ملاك كتير ان الميجان ثابته وكل حاجه ..


بس كل ده اتمسح من دماغى من مجرد ماجربت الفلوانس بتاعت والدي ..

او قولت ممكن يكون المعيار بتاعى انا مختلف .. وانا بقيس الثبات بشكل خاطىء ..

وهي عربيه جميله واصدار خليجي من تقفيل شركة NISSAN ..

بس للأسف الشديد ثباتها وتحكمها عالطريق غير مرضي بالمره .. متوسط ومش زي الالمانى خالص والتعويم فيها للصبح ... بالاضافه الى ان تصميم العفشه الخلفيه زي السيراتو ممكن يغدر بيك ويقلبك فى اي لحظه

فا لو تسمحولي اتقل عليكو شوية بانى عايز مقارنه سريعه بين ثبات الاتنين ... وهل الفرق كبير وفي صالح مين ( بناء على تجربه )

وللعلم انا بتكلم على HARDCORE على الطريق مش مجرد كبس بنزين ...

يعني طريق غير ممهد .. غرز ديقه .. وعلى سرعات 160 ونت طالع ..

وكمان لو تسمحولي بكمان سوأل لو عايز ميجان 2 سيدان سقف بانوراما تعمل كام ... والسقف البانوراما دي ايه عيوبها وايه الاوبشن الى بتبقي نازله بيه الكاتيجري دي ..

ولو عايز هاتشباك بتعمل كام برضه .. وهل فيه عيوب للهاتشباك ( سمعت انها فرنساوى ) ..

وسوأل اخير بالنسبه للمانيوال ايه نظامه فى العربيه دي ... وهل هلاقيله ديسك واسطوانه وسعرهم هيعمل كام

الألفا والبوكسر خارج المنافسه ياباشا وهما تاني اختيار بعد الميجان لعلمك ده حلم عمري .. انا بس بسال عن الميجان لان والدي قالي شوفها لو كويسه هاتها ..

بالنسبه لحرام تقارن الاوبل بالميجان .. انا مش فاهم انهى الى حرام فى انهي يعني الاوبل الى وحشه ولا الميجان ؟؟
وهل حضرتك جربت معاها الفيكترا b ولا c لان ال c عفشتها معدله شوية والثبات اعلي فى المنحنيات من ال b

انا اعتقد انا الاوبل اكثر ثباتا من الميجان

الاتنين ممتازين جدا
انا جربت الاتنين بس الميجان بتتحرك على الطريق اكتر من الاوبل
مش عارف اوصفها ازاى بس بتحس بالطريق عالى وواطى اكتر من الاوبل
بس انا شعرت ان الميجان مريحه اكتر
الاوبل بركبها كتير جدا
الميجان سوقتها مرة واحدة فقط
فرامل الميجان حستها اقوى من الاوبل

المشاركة الأصلية كتبت بواسطة solly1979

انا هقول خبرتى فى سواقة اوكتافيا a4 لمدة سنتين وميجان بانوراما لمدة سنتين والعربيتين فابريكه برة وجوة
الثبات مع الالمانى اعلى شويه على 180 وانت طالع تحس انك قاعد على الارض
الغرز على سرعات عاليه فوق ال 160 الميجان تفوق الاوكتافيا اطول وارخم فى الغرز
الوقوف المفاجئ من سرعات عاليه بتكلم عن 170 او 180 الميجان ما شاء الله تفوق بمراحل
قطع الغيار
الميجان اقل فى حاجات كتير
الاوبشنز
الميجان حدث ولا حرج ما شاء الله كل حاجه تتمناها فى عربيه موجود
الاوكتافيا معدمة الاوبشنز ABS + 1 Air bag only
والله مكنت بلاقى مكان احط فيه الموبيل ههههه
التسارع
من 0 - 100 الميجان تفوق
من 100-180 الامانى بيجمع بسرعه اوى
السرعه القصوى
الاوكتافيا 200 اخرها كذا مرة
الميجان 190 وكان حساس الانجكشن بايظ والسحب ققل بعد التصليح مجربتش بس متهيئلى 220 مستريح
للاسف مركبتش اوبل بس يارب اكون افدك اكيد انت عارف الفرق بين الاوبل و الاوكتافيا a4 وممكن تحكم

الكلام ده زى الفل، انا مسوقتش المانى موديلات جديدة الحقيقه بس ركبت الvectra 2008 بس للاسف كانت بتاعت الشركة و كانت مقفوله على 120 بس هى انشف من الميجان بس ثبتاها اعلى على السرعات العاليه، انا معجتنيش الميجان فوق ال160 او 170 الحقيقه بس still انا مجبتش السرعات ديه بعربيه تانيه عشان احكم عشان انا مش بجرى غير بعربيتى.

من خلال الشد مع الاوكتافيا الميجان تعدى لحد ال120 او 130، بعد كده الاوكتافيا تجيبها و تعديها لحد ال180 :) و لما تدوس خالص و تجيب ال 200 بالميجان هتعدى الاوكتافيا تانى :) و الvectra تقوم مريحة ال2 على جنب و تعدى هيا ;)

قطع غيار الميجان بقت منتشره اوى و اسعارها معقوله يعنى فى range الاوروبى عامة و اللى بيفهموا فيها بقوا كتير اوى برضه، معدتش لغز زى اول ما نزلت، بس برضه محدش يحط ايدة فيها الا واحد بتاع ميجان و الا هيشخرملك العربيه :)

هى المقارنة صعبة اوى الحقيقة، بس بالرغم من ان انا معايا الميجان و من عشاقها بشده، بالرغم من الحركات البايخة بتاعتها، انما الالمان هما اصل العربيات و مفيش حد يقدر يتفوق عن الأصل ابدا