الموضوع: ميجان ولا فيكترا فى الثبات

ياباشا الاتنين افشخ من بعض فى الثبات

المشاركة الأصلية كتبت بواسطة solly1979

انا هقول خبرتى فى سواقة اوكتافيا a4 لمدة سنتين وميجان بانوراما لمدة سنتين والعربيتين فابريكه برة وجوة
الثبات مع الالمانى اعلى شويه على 180 وانت طالع تحس انك قاعد على الارض
الغرز على سرعات عاليه فوق ال 160 الميجان تفوق الاوكتافيا اطول وارخم فى الغرز
الوقوف المفاجئ من سرعات عاليه بتكلم عن 170 او 180 الميجان ما شاء الله تفوق بمراحل
قطع الغيار
الميجان اقل فى حاجات كتير
الاوبشنز
الميجان حدث ولا حرج ما شاء الله كل حاجه تتمناها فى عربيه موجود
الاوكتافيا معدمة الاوبشنز ABS + 1 Air bag only
والله مكنت بلاقى مكان احط فيه الموبيل ههههه
التسارع
من 0 - 100 الميجان تفوق
من 100-180 الامانى بيجمع بسرعه اوى
السرعه القصوى
الاوكتافيا 200 اخرها كذا مرة
الميجان 190 وكان حساس الانجكشن بايظ والسحب ققل بعد التصليح مجربتش بس متهيئلى 220 مستريح
للاسف مركبتش اوبل بس يارب اكون افدك اكيد انت عارف الفرق بين الاوبل و الاوكتافيا a4 وممكن تحكم

الكلام ده زى الفل، انا مسوقتش المانى موديلات جديدة الحقيقه بس ركبت الvectra 2008 بس للاسف كانت بتاعت الشركة و كانت مقفوله على 120 بس هى انشف من الميجان بس ثبتاها اعلى على السرعات العاليه، انا معجتنيش الميجان فوق ال160 او 170 الحقيقه بس still انا مجبتش السرعات ديه بعربيه تانيه عشان احكم عشان انا مش بجرى غير بعربيتى.

من خلال الشد مع الاوكتافيا الميجان تعدى لحد ال120 او 130، بعد كده الاوكتافيا تجيبها و تعديها لحد ال180 :) و لما تدوس خالص و تجيب ال 200 بالميجان هتعدى الاوكتافيا تانى :) و الvectra تقوم مريحة ال2 على جنب و تعدى هيا ;)

قطع غيار الميجان بقت منتشره اوى و اسعارها معقوله يعنى فى range الاوروبى عامة و اللى بيفهموا فيها بقوا كتير اوى برضه، معدتش لغز زى اول ما نزلت، بس برضه محدش يحط ايدة فيها الا واحد بتاع ميجان و الا هيشخرملك العربيه :)

هى المقارنة صعبة اوى الحقيقة، بس بالرغم من ان انا معايا الميجان و من عشاقها بشده، بالرغم من الحركات البايخة بتاعتها، انما الالمان هما اصل العربيات و مفيش حد يقدر يتفوق عن الأصل ابدا

المشاركة الأصلية كتبت بواسطة creative_art

السلام عليكم ورحمة الله ..

كنت محتاج منكم مساعده صغيره و إن شاء الله واثق انى هلاقي المساعده الجاده هنا ..

أخوكو زائر من منتدي الأوبل .. معايا فيكترا B موديل 1997 ..

وطبعا الاوبل غنيه عن التعريف .. كامله من كل حاجه ..

نظرا لأسباب معينه ابرزها انى عايز عربيه ناعمه ومريحه
وده مش معناه ان الاوبل وحشه بس هي عربية شغل و dynamiques اكتر منها راحه ونعومه

فكرت انى ابيعها واجيب ميجان 2 .. والأفضل تكون هاتشباك ..


الاستفسار بتاعى بمنتهي البساطه محتاج حد يكون ركيب المانى ومعاه ميجان حاليا ... وجرب يعني ايه المانى وهتكلم بالتحديد فى نقطة الثبات ..


وللعلم ثبات الاوبل للي ميعرفش خلاها تعتبر من افضل العربيات علي مستوي العالم ..

كنت عايز اعرف الفرق قد ايه بين ثبات الاتنين ( ميجان & فيكترا ) ... مدي دقة التوجيه .. ال Handling & traction على السرعات فوق ال 180


وربما يكون سوألي غريب شوية لانى بالفعل شفت ردود ملاك كتير ان الميجان ثابته وكل حاجه ..


بس كل ده اتمسح من دماغى من مجرد ماجربت الفلوانس بتاعت والدي ..

او قولت ممكن يكون المعيار بتاعى انا مختلف .. وانا بقيس الثبات بشكل خاطىء ..

وهي عربيه جميله واصدار خليجي من تقفيل شركة NISSAN ..

بس للأسف الشديد ثباتها وتحكمها عالطريق غير مرضي بالمره .. متوسط ومش زي الالمانى خالص والتعويم فيها للصبح ... بالاضافه الى ان تصميم العفشه الخلفيه زي السيراتو ممكن يغدر بيك ويقلبك فى اي لحظه

فا لو تسمحولي اتقل عليكم شوية بانى عايز مقارنه سريعه بين ثبات الاتنين ... وهل الفرق كبير وفي صالح مين ( بناء على تجربه )

وللعلم انا بتكلم على HARDCORE على الطريق مش مجرد كبس بنزين ...

يعني طريق غير ممهد .. غرز ديقه .. وعلى سرعات 160 ونت طالع ..

وكمان لو تسمحولي بكمان سوأل لو عايز ميجان 2 سيدان سقف بانوراما تعمل كام ... والسقف البانوراما دي ايه عيوبها وايه الاوبشن الى بتبقي نازله بيه الكاتيجري دي ..

ولو عايز هاتشباك بتعمل كام برضه .. وهل فيه عيوب للهاتشباك ( سمعت انها فرنساوى ) ..

وسوأل اخير بالنسبه للمانيوال ايه نظامه فى العربيه دي ... وهل هلاقيله ديسك واسطوانه وسعرهم هيعمل كام

اسمحلى انا بقى اسألك سؤال عشان نستفيد منك برضه :) انت حكمت ازاى على تصميم العفشة الخلفية بتاعت السيراتو انها ممكن تخليك تقلب فى اى وقت؟ عشان النقطة دية ambiguous شويه بالنسبالى!

الميجان البانوراما هى اعلى فئة فيها كل حاجة، ممكن تبص على الموضوع ده http://www.nilemotors.net/Nile/22988-ii.html هو فية الاوبشنز الاساسيه فى الميجان عشان فيه حاجات تانية الناس اكتشفتها بعد كدة :)

سعرها كام دية بقى على حسب الموديل، لو 2006 مثلا و حالتها نضيفة مش هتقل عن 65 باى حال من الاحوال و الا يبقى صاحبها بيرميها على الارض

انا معايا المانيوال، و مغيرلها الديسك و الاسطوانه و البليه و كله تمام، موجودين برضة فى كل حتة، السعر تقريبا كانوا ب 600 جم او 650 للطقم كله valeo فرنساوى

المشاركة الأصلية كتبت بواسطة medori

اسمحلى انا بقى اسألك سؤال عشان نستفيد منك برضه :) انت حكمت ازاى على تصميم العفشة الخلفية بتاعت السيراتو انها ممكن تخليك تقلب فى اى وقت؟ عشان النقطة دية ambiguous شويه بالنسبالى!

لا ياباشا ربناا مايجيب ambiguous ولاحاجه .. قبل كل شىء بغض النظر عن الجانب الهندسي فا انا كان تحت ايدي 3 عربيات سيراتو .. واحده تخص والدي اول ماطلعت 2009 فئة ex جنط 16 وواحده بتاعت ابن عمى 17 sx وواحده بتاعت صديقي 17 sx ست سرعات ..
والعربيه بلاش اقول ثباتها سىء بس هي تكلفة انتاجها متوسطه وعلى قد فلوسك بتاخد اداء ..

وده ليه ابعاد هندسيه كبيره اطلاعى المحدود ممكن ميغطيش الموضوع

بس منتهي البساطه بص لنظام التعليق بتاع السيراتو من ورا وبص على الاوكتافيا a5 والفيكترا ..

العفشه الخلفيه فى السيراتو مصممه على اساس Torision beam وده بمنتهي البساطه فى نظري كارثه لانه على السرعات العاليه مبيديش مساحه للعجله الخلفيه فى انها تتمدد وتفرش عالطريق عكس الالمانى والاوروبي بشكل عام .. وده من احد اسباب ان عفشتها ناشفه

بمعني اصح العفشه كلها مربوطه حته واحده ولو اخدت مطب عالطريق انت ونصيبك ..

بس هو في الاول وفى الاخر انا مش بعيب على السيراتو بس هي تكلفة انتاجها كده لا تسمح بانهم ينزلو عربيه فيها تعليق خلفي ماكجفرسون او مالتي لينك

ولو عايز تعرف اكتر عن الموضوع ممكن تبحث على النت عن الفرق مابين

Torision Beam Coupled Axe وده الى نازل فى السيراتو

Torision Z link suspension و ده نظام التعليق المعتمد فى معظم الدول الأوروبيه وده بيدي ثبات عالى جدا ومعمر وبالمناسبه دي العفشه الى كانت نازله فى الاسترا والكروز وال A4 لما تشوفها من بره نفس الشكل بس الاداء مختلف تماما

وفى الاول وفى الاخر الثبات لا يقاس بتصميم العفشه فقط والا كانت اللانوس ثباتها زي الاوبل على الرغم انها فيها نفس التكنولوجي بتاعت VECTRA A ولكن هوا بعوامل كتير زي ايروديناميكس و ال weight destribution

وعموما هوا الحديث يطول في الموضوع ده انا بس حبيت ارد على سوألك واوضح النقطه لو كلامى فيه غموض شوية ..

المشاركة الأصلية كتبت بواسطة Formulator

أكيد الفكترا B أثبت :)
بس الميجان-II بردو عربية ثباتها عالى.. والهاندلينج بتاعها فـ السرعات الصغيرة-إلى-متوسطة أفضل من الأوبل!
- فـ السرعات العالية الأمور بتتغير تماما: الفكترا B بتوطى أوى عـ الأرض، والـTraction/الـGrip أعلى من الميجان طبعا؟!!
(عن تجارب لفكترا B2 2.016v CDX -عربية أخويا)

ماتنسوش ان شاسيه الفكترا كان بيستحمل مواتير لحد 2.8 V6.. يعنى أكيد أثقل وأجمد!
- الفكترا B2 دى كنا بنجيب بيها 240 كم/س -- الميجان آخرها 190-200: فلااااااااازم يبقى فيه فرق فـ العفشة والـplatform؟!!

بالنسبة للمقارنة- ميجان مع السيراتو: لا تجوز أصلا
>> لأن الـSetup الأوروبى مختلف عن الكورى فـ وضعية الدامبرات والسوست عـ الدنجل/التورشن؟!!
سواء الأوروبى كان Watt's link أو Z زى الأسترا J الجديدة..
أو كان semi-independent زى الأسترا H والميجان-II

فـ نخرج السيراتو برا الكلام نهائى :) عشان بس نعرف نقارن :))

>> المقارنة مع الفلوينس (vs ميجان-II)
طبعا الميجان تتفوق فـ الهاندلينج والثبات، لكن الفلوينس/ميجان-III تتفوق فـ النعومة فقط!!

كمان الـsetup بتاع الفلوينس -للأسف- مش أوروبى؟؟!!! ده يابانى صرف زى النيسان والتويوتا:
الـTorsion-beam مفيهاش الـTwist/Curvature بتاع العربيات الأوروبى!
+ انها أصلا عربية كبيرة وطويلة >>> مش بتاع جرى Spirited زى الميجان؟!!

>> بالنسبة للألفا156/147
بردو -برا المقارنة- بس بالإيجاب -- مش بالسلب زى السيراتو؟!! ههههههههههههه
عشان الألفا عفشة قدام double High-wishbone زى الفيررارى
وورا Multi-link بـSetup يعتبر Sophisticated أوى لعربية كومباكت فـ الفئة دى!

رأيى الأخير:
- لو عاجباك الميجان: هاتها ومش هتبقى disappointed
وممكن تبقى تركب كاوتش Traction AA أو حاجة سبورت، أو -لو تقدر- ليها أطقم دامبرات Bilstein (من غير السوست الـEibach عشان ماتنشفش)..
you will really like it

Rgds،

كومنتك فوق ال professional والواحد بيبقي مبسوط لما يلاقي حد يتعلم وياخد معلومات منه .. انا بدرس بزنس انجلش بس عندي حب اطلاع عالى الحمدلله ومجمع قدر لا بأس منه من المعلومات

وعموما انا كنت برد لما اتسالت انت ازاى من العفشه الخلفيه تقدر تحدد ثبات واستجابة العربيه فى مواقف ال distress لانى كنت بقول على العفشه الخلفيه للسيراتو سيئه كما الحال فى الفلوانس ..

وفعلا كلامك مظبوط فى نقطة ان الفلوانس تتفوق فى الراحه وان ال setup بتاعها يابانى صرف ده انا ابصم على كلامك بالعشره .. لان الى معانا Renault fluence sm3 ودي تصميمها يابانى بالكامل عدا بعض الاجزاء صناعة شركة سامسونج وهي مريحه سلسه عالطريق بس مفيش تحكم الألمانى خالص .. انا بالأوبل باخد ملفات الصحراوي على 190 بدون ادني احساس بالقلق عشان كده كنت لازم اسأل عنها وهل هحس بفرق ولا لأ ..


وعموما من كلامكوانا فعلا حبيت الميجان وهبتدي من بكره ان شاء الله ادور على واحده لحد ما عربيتي تخلص وابيعها ..

على الرغم انا كن من طموحاتى انى اجيب BMW E36 او E34 بس للأسف بعد ماجربت الالمانى القديم فى المستعمل عرفت انه مش هيعمر معايا خصوصا انا بسافر اكتر من 6 مرات فى الشهر

انا الحقيقه مستمتع جدا بالموضوع ده و بكميه المعلومات اللى فيه. انا لسه شارى فلوانس و كنت بفاضل بينها و بين الانترا ، بس اخترت فلوانس علشان الامان و الثبات على حد ما قرأت فى المنتدى، فانا حابب اسمع رأى الخبراء فىثبات الالنترا.
يا رب ما اكنش اخترت غلط.

تخياتى.