الموضوع: اخيرا ربنا كرمنى بابيزا

المشاركة الأصلية كتبت بواسطة nesr6060

شكراا لردودكم يا رجاله ومعلشى اتاخرت شويه لان انا خدت العربيه وطلعت طريق الفيوم كانت جامده جداا وثابته بس امشكله ان وانا راجع بليل مره واحده سمعت صوت خربشه فى الموتور وبيروح لما بدوس ديبرياج وواحد صاحبى قالى دى بليه الدبرياج تلاقيها باظت او عاوزه تتزيت بسبب الرمل انتوا رايكوا ايه وياترى لو هغيرها اجيبها منين وعامله كام والاهم من ده العربيه على السريع مبتستتهلكشى بنزين بس مره واحده بلاقى داد البنزين نزل مش عارف ايه السبب والكلام ده وانا ماشى جوا البلد مستحيل يكون استهلاكها كتير كدا يعنى انا روحت الفيوم تقريبا كان اكتر من نص التانك مليان ولما رجعت لاقيت معيش بنزين واطريت امون فى الرمايه على عكس الانوس مع صاحبى استهلاكى للبنزين قليل جدااا وهى 1500 سى سى وانا عربيتى 1300 سىسى

فعلا ده صوت بلية دبرياج
انا بصراحة اول مرة اسمع انها ينفع تتزيت لأنها المفروض انها فى قلب الجيربوكس
بس عموما امشى بيها كده ومتخافش لأنك لو حبيت تغيرها هتضطر انك تغير معاها الاسطوانة والديسك لأنهم يفضل انهم يتغيروا مع بعض عشان يبقوا نفس العمر + ان مصنعية فك الفتيس لوحده 120 جنيه

بالنسبة للمقارنة فى استهلاك البنزين بين عربيتك وعربية تانية لازم تراعى الاتى:
1- عربيتك اى نعم 1300 بس كربراتير, اللانوس 1500 انجيكشن ومعروف ان استهلاك الكربراتير اعلى من الانجيكشن
2- عربيتك وزنها اثقل وانسيابيتها اقل ومقاومتها للهواء اعلى من اللانوس وكل ده يفرق فى الاستهلاك
3- الاحمال اللى بتكون فى العربية وقت حساب الاستهلاك اكيد مش زى بعض, طبعا لو انت حمولتك اعلى يبقى هتستهلك اكتر
4- طريقة سواقتك وسرعتك اكيد غير طريقة سواقته وسرعته ودى من الاسباب الرئيسية فى الاختلاف فى حساب الاستهلاك

نصائح لتقليل استهلاك البنزين:
1- تأكد من نظافة الكربراتير والبيكات وفلتر البنزين وفلتر الهواء والبوجيهات
2- ظبط كهربة الموتور من الاسبراتير
3- تأكد من ضغط الاطارات
4- النقل بين الغيارات يكون بين 2800 الى 3200 rpm
5- السرعة الاقتصادية من 80 الى 100 كيلومتر فى الساعة
6- راعى ان تكون اوقات ملىء البنزين فى الصباح الباكر او فى المساء لأن درجة الحرارة العالية بتساعد على تقليل كثافة البنزين فى تانكات محطة البنزين اللى بتكون مدفونة فى الارض وبالتالى البنزين يتبخر