الموضوع: تجربتى .... (( أنا والنتشة والشاهين ))

السلام عليكم ورحمة والله وبركاته

(( أنا والنتشة والشاهين ))



طبعا انا دوخت السبع دوخات فى 3 شهور الأخيرة من يوم موضوع الصبابات

http://www.nilemotors.net/

وانا مليش شغلانه غير العربية ومشاكل العربية الغريبة اللى بتحصل تباعاً أرخمهم مشكلة التنتيش الغريب اللى ظهرت فجأة وكنت حكيت عنها فى نهاية الموضوع ده

http://www.nilemotors.net

روحت لكذا ميكانيكى اللى يقولى مشط واللى يقولى بنزين مغشوش واللى يقولى عربتيك زى الفل ... وزى ما قولتلكم قبل كده النتشة ديه ظهرت بعد شغل واحد متخصص كربراتير فى طنطا ومشهور جدا والعربيات واقفه عليه طوابير اسمه هانى الله ينتقم منه وروحتله كذا مرة علشان مشكلة النتشة ديه وقعد يأكدلى انها مش مشكلة كربراتير وديه مشكلة ميكانيكى أروح للميكانيكى يقولى روح لبتاع الكربراتير ... طيب ياعم اعملها انت يرد عليا مليش فيه ... الله يخربيوتكم انتوا الاتنين

احد اصدقائى معاه لانوس شار عليا بميكانيكى تانى جربه واتبسط منه ... والميكانيكى ده بعدى عليه وبشوفه شغال فى عربيات بتكح تراب من الشكمان كلها عربيات خلصانه من بره ومن جوه وحالها يصعب على الكافر وعمرى ما شوفت عربية شكلها محترم واقفه على ورشته ... بصراحة من منظره اخاف انه يمسك فوطه زفرة ويمسح العربية مش انه يفتح الكابوت ويلعب في الماتور والكهرباء ... بس صديقى اكدلى اد ايه الراجل ده كفؤ وظبطله عربيته اللانوس ... بقيت مستغرب قوى من كلام صديقى

لما الدنيا قفلت فى وشى ومشكلة التنتيش زادت وبقت لا تطاق ومش عارف الاقى حل قولت مبدهاش بقى مهى خربانه خربانه اجرب الميكانيكى ده وربنا يستر

روحتله امبارح وقولتله انا شاكك فى المشط ورداخ البنزين ... جرب الرداخ لقاه بيدى ضغط كويس .. قالى فعلا مشط ... واشتريت مشط جديد وكلى امل ان ديه نهاية الأحزان وهرتاح بقى واعرف انام ... لما ركبنا المشط والعربية لقيتها لسه زى الزفت

نفسيتى انهارت

واعصابى باظت

والله كنت عاوز اعيط

كنت عاوز ارميها فى اقرب ترعة

أو ألبسها فى اقرب شجرة

ولما قالى نوديها لكهربائى اعصابى باظت اكتر

يادى النيلة هيقطعوا فى الضفيرة

ويبوظوا السليم

أخويا كان معاه دوجان موديل 96 وكانت الكهربا عنده زى الزفت وداخ عند الكهربائية ومفيش فايده

وبعدين يا اخونا مش عارف اشوف شغلى

ومش عارف انام

واعصابى بايظة

والعربية مأثرة على حياتى كلها سلبيا بدل ما تريحنى وتوفر وقتى لاقيت اللى بيحصل العكس فى الفترة الأخيرة وكانت قبل كده زى الفل ومريحة جدا

وفى اليومين اللى فاتوا بالذات كانت العربية زى الزفت تقطيع وتنتيش غريب الشكل وببقى ماشى خايف حد يلبس فيا ولو ماشى فى الزحمة الناس بتقعد تشوحلى ومش عاجبهم ان العربية واقفه فى سكتهم ... الغريب اللى مش لاقيله تفسير لحد دلوقتى ان العربية قطعت خالص منى وكان فيها اخر 15 لتر ... حطيت 2 لتر بس دارت ومشيت وروحت وجيت ولما خلصوا عملت نفس الحركة وكل شوية اديها بوء بنزين والحال يمشى

من خنقتى اشتريت رداخ (طلمبة البنزين)

اشتريتها رغم انى متأكد انها سليمة عندى

بس عاوز اخلص ... قولت يمكن يكون منها

ومرضيتش اجيب الغالية

جبت الرخيصة بـ 70 جنيه قولت اجرب بيها

بس الميكانيكى الجديد ده رفض يركبها

وقالى كده هعمل زى زى غيرى وهكلفك واغرمك على الفاضى وانا متأكد ان العيب مش منها

هههههههههه الآية اتقلبت وامبارح فضلت اتحايل عليه يركب الطرمبة علشان ألغى العيب ده من دماغى

وهوه قافش مش راضى يركبها

واتخنقنا من بعض وقالى خليك لبكره علشان فى ايدى شغل

كان بيعمل كردان عربية خلصانه من العربيات اللى واقفه على ورشتة

وكنت همشى واروح لميكانيكى تانى يركبها

واليوم ضاع على الفاضى امبارح

وشغلى كله باظ وبقيت مروح مش طايق نفسى ومعرفتش انام طول الليل

روحت الشغل الصبح واستأذنت منه وروحت للميكانيكى ده الساعة 10 الصبح

خدها على الطريق فحت وردم

والعربية زى الفل مفيهاش الهوا

ههههههههههههه

بقيت هتتهبل

فين على ما بدأ يظهر فيها تنتيش خفيف وطفت منه على السلانسية

قولتله العفريت راح ومش هيرجع الا لما اركبها انها

جيت اسوقها فوجئت ان العربية زى الفل

ههههههههههههههه

فين وفين على ما بدأت تعك وتقطع

بقى محتار شوية ... شوية يقولى هنركب طرمبة البنزين وشوية يقولى مش هركبها وبعدين قالى خلاص انا عرفت العيب ... العيب فى الكربراتير يابيه

قولتله الكربراتير اتنظف عند اخصائى كربراتير

وبتاع الكربراتير اللى نظفته عنده اكدلى ان العيب اللى فى العربية مش كربراتير وقالى انها عيب كهربا

وابن اللذين كان لاهف منى 120 جنيه

حار ونار فى جتته

وياريت خدهم وشاف شغله بضمير

ده بقيت كل ما اروحلوه كإنه شاف عفريت

قالى اسمع كلامى العيب اللى عندك فى بوابة الكربراتير الأولى

فك الكربراتير وبدل بكات البنزين مكان بعض (مش فاهم الموضوع ده يعمل ايه او ايه فايدته ياريت اللى بعرف يقولنا)

وعمل رجلاش لبوابة الكربراتير بالمفك

الموضوع اخد 3 دقائق

والعربية بعدها اتحيت من جديد والنتشة اختفت تماماً وصوت الماتور هدى والتسارع بقى بسم الله ماشاء الله الله اكبر

والحمد لله جربتها كتير ولفيت كتير رجعت لأيام مجدها ... ياااااااااااااارب ديمها نعمة واحفظها من الزوال واحرسها من العين وباركلى فيها والسامعين اجمعين واسترها معايا ومعاكم يااااااااااااااارب

وربنا يستر ومتظهرش مشكلة تانية علشان انا استويت خلاص هههههههههههههههه
ملحوظة أول ما روحت لاقيت السنتر معلق ومش راضى يطفى هههههههههههههههه

ببعد اللى حصلى ده والنظرة السابقة اللى كنت ببصها على الميكانيكى قبل وبعد التعامل معاه .. إفتكرت الفيديو ده

https://www.youtube.com/watch?v=6pfAmJR2tP8

اشوفكم الحلقة الجاية