الموضوع: ازاي تعمل فلوس وتبقى رجل اعمال منغير ولا مليم ؟ "مش اللي بالك فيه خالص"

المشاركة الأصلية كتبت بواسطة Ahmed_Adham

أنا حاسس انك خلصت يا باشمهندس خالد وده وقت المناقشه. أنا شايف ان 99.99% من اللي هيقرو الموضوع هيعجبهم الكلام (مش 100% عشان الاخ اللي دخل يخبط ده) بس ممكن واحد من كل اللي قرو الموضوع احتمال يعمل مشروع صناعي (رجل اعمال) لكن ممكن واحد من كل 100 ممكن يعمل مشروع تجاري صغير (تاجر) او خدمي (زي مغسله سيارات الخ الخ) وده النوع الاسهل بالنسبه لحد معتمدش على نفسه في دخله قبل كده لأني شايف ان النطه عاليه قوي من موظف متطمن الى حد ما لدخله ومش متعود يبقى هوه اللي شايل الهم (من الاخر الساعه 5 بيفصل عن الشغل نهائي) لأنه يبقى "مصنع" بضم الميم وكسر النون.

ده أنا ريقي نشف مع 4 من صحابي عشان نعمل شغل مع بعض وبعد جلسات تفريش للمخ كتير (بنوعيه الموضوع اللي حضرتك كاتبه ده) وازاي الأمان الحقيقي مش في انك تبقى موظف ممكن شركته تتخلى عنه في أي وقت لظروف السوق ولكن الامان الحقيقي هوه انك تقرر امتى تفتح وامتى تقفل ويكون قرارك في ايدك وكل الكلام المشجع اللي من النوع ده اللي بيحفز العقل (شخصيا جاب معايا نتيجه في 2009 وغير حياتي كتير وأخدت مخاطرات مجنونه) ولكن اتنين منهم اقتنعو بالعافيه ودخلتهم معايا في شغل عشان أقصر عليهم السكه وبعد وقت قصير جدا كسلو وركنو! أصل الكلام عن فلوس زياده حلو جدا وتقريبا مفيش حد ممكن ميحبش تزيد فلوسه بس تيجي عند التنفيذ تلاقي الكسل. طب انت مكسل تعمل فلوس زياده وتحسن دخلك أمال النشاط بيجيلك ليه لما تكون رايح تتفرج على ماتش وتتنقع قبل الماتش بست ساعات في الاستاد مستني الحدث الرهيب؟

فممكن خطوه التجاره تبقى خطوه وسط توصل الحلقه يعني الاول أتاجر في الحاجه اللي عايز أشتغل فيها وأفهم الصنعه وبتيجي منين وتتعمل ازاي وأهو لو مسلكتش فيها أبيع البضاعه بتمن ما اشتريتها ويادار ما دخلك شر وأشوف حاجه غيرها وبعدين لما الحال يمشي والمخ يشتغل ويعرف أصول الشغلانه والواحد يبدأ مرحله التصنيع ويبيع جمله وقطاعي وبعد كده كمرحله تالته مرحله الرياده والابتكار اللي هيه حضرتك اتكلمت عنها في الموضوع يعني أشوف ايه اللي مش موجود في الصنعه وأضيفه وأغير حاجات بحاجات أكتر كفاءه او نفس الكفائه بتكلفه أقل وأدخل مرحله الرياده وبعد كده عايز أكمل في دور "المصنع" ماشي عايز أقلب الشغلانه وأدخل في حاجه تانيه بنظام رجال الاعمال ماشي.

طبعا لو فيه أي حاجه هتعملها هتعملها تمويل مباشر من ناحيتك يبقى نصيحتي انك متصرفش أكتر من اللي انت موافق انك تخسره. يعني لو معاك مثلا 50 ألف بس لو خسرت منهم 20 الف ممكن تتأثر ماديا يبقى مسشتغلش بأكتر من 30 ألف وخلي ال 20 اللي هيوجعوك في جيبك من الاول. Don't invest what you can't afford to lose.

مش لازم تبتدي تاجر علشان تبقى رجل اعمال ، كل اللي انا قلته علشان بس تاخد الخطوة الاولى وهي انك يكون عندك شركة والشركة منتجة لمنتج متفرد قابل للتصنيع والتسويق ، وبالتالي بقه عندك بيزنس له قيمة قابل للبيع ، عارف ايه اللي قابل للبيع ؟ مش المنتج في حد ذاته هو الهدف ، الهدف هو البيزنس نفسه

مثال مستوحى من قصة حقيقة عشتها

تخيل انك عملت زي ما انا قلتلك ، فتحت شركة والشركة عندها منتج فريد فليكن قطعة غيار سيارات متطورة جدا وتحل محل قطعة تقليدية وتعطي نتايج افضل وارخص
وبعدين قمت بتسويق القطعة بين مصنعي السيارات العالميين
وهوب السنارة غمزت ووقعت عقد مع فيات ايطاليا بتوريد القطعة للمصنع لمدة عشر سنين بقيمة 20 مليون جنيه
انت كده نجحت صح ؟
حتعمل ايه الخطوة اللي جاية ؟ حتبتدي تشغل خط الانتاج بقه علشان توفي الطلبيات الشهرية المنصوص عليها في العقد وتعيش بقه وتحلم بالمبالغ الهرية اللي حتتحولك من ايطاليا لحد ما يبقوا 20 مليون بعد عشر سنين ، واحتمال توقع شركة تانية وتالتة وتعيش شغل بقه! ده انت كده تاجر طحن
راجل الاعمال يلعبها ازاي ؟

فتح الشركة انتج المنتج وقع العقد مع ايطاليا بالعشرين مليون ، يرجع مصر يعرض الشركة ببراءة الاختراع بال know how بالعقد بتاع فيات للبيع طبعا لكبار المستثمرين ليكن غبور منصور ابو العينين سوريس. فغبور يعرض عليه 5 مليون جنيه ، راجل الاعمال يبيعله ويقبض ويخلع فورا!

ليه العبيط ضيع 20 مليون قابلين للزيادة علشان 5 مليون ؟

ده مش عبيط ده تفكيره بيزنس مش صناعي تجاري!

ايه اللي يخليه يدخل في متاهة عمالة وانتاج وخامات وتوريد وغرامات تأخير وشروط جزائية ومشاكل مع الضرايب وايش دراه الوضع السياسي والاقتصادي للبلد على مدار عشر سنين
وبعدين ال 5 مليون بناء علي العقد حيوصلهم بعد سنتين ونص ، لا هو يشتري عمره وما يستانش ويشتري دماغه ووجع قلب الصناعة ويديها للي يفهم فيها ويخلي الكبار يلعبوا مع الكبار ويخلع
وغبور كسبان اشترى 20 مليون ب 5 مليون فقط

امال هو عمل كده ليه من الاول طالما مش ناوي يكمل ؟
علشان يبقى عنده شيي له قيمة صالح للبيع ، هو كده اوجد ال5 مليون من تقريبا العدم ، يبقى بميزان البيزنس هو ناجح بنسبة 100%

المشاركة الأصلية كتبت بواسطة shnory

ابورقيه مجابش سيره انك تبيع لبان في المترو بمشروع راس ماله 5 جنيه
بس انت وقدراتك (:

القرصان وصل ، الموضوع باظ! هاهاهاهاهاهاها

المشاركة الأصلية كتبت بواسطة abou_ruqi

لو انت متأكد من كلامك وهما اللي قصروا بالكامل ومفيش تقصير من ناحيتك انت ، يبقى نطلب من المشرف حذف الرابط بتاع الشركة من مشاركتي

متأكد جداا يا فندم وربنا يكفينا شر ظلم الناس .. لما حضرتك تتعاقد على ماكينه وعلى تسويق انتاجك والعقد يقول ان التسليم خلال فتره من 45 يوم - 60 يوم والنقل والتركيب عليهم وتقعد 5 شهور يماطل فيك وميرضاش يسلمك اى مكن وتكتشف بعد 5 شهور انه بيشغل مقدمات الـ 200 متعاقد فى مشاريع كبيره وشغال بفلوسنا فى السوق ولما الناس عملت قلق جامد واتفضح على النت سواء فيس او منتديات ويشتري كام ماكينه كده يغزى بيهم عين الشيطان ويقول للناس تعالوا شيلوا مكنكم انا مش هوصل لحد الدولار غلي وتقوله انا مليش علاقه فى عقد واتفاق ويقولك انسي كل اللى فات وشيل مكنتك وهات باقي تمنها !! والناس اللى تروح تستلم يقولهم مش هنركبها دلوقتى اصبروا علينا وهنيجي نركبهلكم ونشغلهلكم ومن يوم 5 ابريل لحد النهارده مفيش حد الماكينه اشتغلت عنده ومحطوطه فى محلاتهم لا منها اشتغلت وانتجت ولا منهم معاهم فلوسهم ( ما الشركه لهفت باقي تمن الماكينه ) وانا وغيري كتيييير سحبنا المقدمات وفى مره وانا هناك 4 شباب منهم دكتور اتخانقوا وخدوا فلوسهم وتقدر تعمل بحث يا فندم بأسم الشركه وتقرأ اللى هيطلعلك عليها

معلش انا طولت واتكلمت كتير بس لأنك جيت على الجرح انا لسه واخد فلوسي منهم الحمد لله يوم الخميس وللأسف لسه بعاني من الخساير اللى اتسببولي فيها وخلوني اخاف ادخل فى اى مشروع تانى واثق في حد لأخسر تانى من اللى شوفتوا منهم ومعاناة ال 5 شهور