الموضوع: عيب خبيث !

الحمد لله الذي بنعمته تتم الصالحات

تم بفضل الله وحده ثم دعائكم لي حل المشكلة

المشكلة أبسط مما تتخيلون ولكنها كانت خطيرة بالفعل

كنت في شغل خارجي اليوم وعند رجعوعي للشركة كنت أشم رائحة بنزين بسيط بين الحين والأخر قادم من التكيف.....كنت فاكر إن ده عادم من السيارات الأمامية والريحة تروح وترجع تاني.....لم أركز في المشكلة دي وكملت طريقي عادي.....
المهم بعد ما ركنت العربية وماشي جنبها شمت نفس رائحة البنزين الخفيفة......قولت لأ دي كده مش عادم والرائحة جاية من عندي.....قاعدت ألف حول العربية أشمشم على رائحة البنزين جاية منين.....لقيت الرائحة جاية من عند الكابوت ناحية اليمين ( ناحية كومبرسور التكيف ).....فتحت الكبوت والرائحة كانت ظاهرة أوي.....إفتكرت مسطرة الرشاشات بتسرب بنزين بسيط أو المانافولد بها شرخ بيسرب أو خراطيم تغذية البنزين بها قطع أو شرخ......فضلت ماشي ورا الرائحة لغاية ما عرفت مصدرها وكانت المفاجأة.......

حد سمع قبل كده عن Purge Valve ؟......ده صمام كهرباء بيركب في علبة كربون خلف الفانوس اليمين......يصل به خرطوم متصل إلى أعلى المانافولد وفيشة كهرباء تتحكم في قفله وفتحه......الصمام سليم متقلقوش مش هو ده إلي عامل المشكلة......العلبة الكربون إلي بيركب عليها الصمام متصلة بماسورة حديد إلي تنك البنزين......أبخرة البنزين في التنك بتروح للعلبة دي ثم الصمام يتحكم في وصول هذه الأبخرة إلى المانافولد

دي صورة الصمام :



دي صورة فيشة الكهرباء ووصلة البنزين إلي بتروح للمانافولد :



دي الناحية التانية من الوصله إلي راكبة في المانافولد :



الكارثة إلي وجدتها هي إن الصمام ده كان مفكوك من مكانه وواقع في الحوض إلي خلف الفانوس وعلبة الكربون دي هي إلي كانت مطلعة رائحة بخار بنزين خفيف......كل ده ميعملش المشكلة إلي أنا بعاني منها

المشكلة إن الضفيرة إلي رايحة للصمام ده إتعرضت للقطع ( السلك الموجب ) بسبب إحتكائها بسير الكومبريسور لأن الكليبس إلي بيثبت السلك ده كان واقع من مكانه...زي الصورة :



طبعاً موجب مع سالب ( جسم الموتور ) هو إلي كان بيعمل القطع ده.....إزاي؟؟؟؟

السلك المقطوع ده كان سايب في الهواء....فمع حركة الموتور والهواء السلك بيلمس جسم الموتور ويعمل القطع إلي يخلي العربية تنتش......إنتوا عارفين إن موتور الكليو بيتحرك للأمام والخلف مع الشد والرخي في دوسة البنزين......ده إلي كان بيخلي النتش ده يبان لما أشيل رجلي من على البنزين فالموتور بيتحرك للأمام ويقرب من السلك ويحصل الماس......ولما أمور العربية عامل الهواء هو إلي كان بيقرب السلك من جسم الموتور ويخلي العربية تبطل

شوفته الموضوع بسيط إزاي....بس في نفس الوقت خطير !

أنا عارف مين السبب في فصل هذا الصمام من مكانه وهكتب تفاصيل ما حدث لاحقاً

الخلاصة : عليه العوض ومنه العوض في الصنايعية.....والمهندسين كمان !

الحمد لله على عظيم فضله وكرمه

وأشكر جميع الذين دعوا لي بصدق لأن إكتشاف المشكلة بهذه الطريقة هو إلهام من عند الله وحده

إنتظروا تفاصيل سبب حدوث هذه المشكلة

بارك الله فيكم جميعاً وجزاكم الله خيراً

مبروك يا كبير الكليو.

السلام عليكم

مشكلة الصنايعية اليومين دول هو الإهمال وليس عدم معرفة إصلاح الشىء

ما تعرضت له هو نتيجة لإهمال شديد جداً وليس خطأ فني أو عيب في الإصلاح

بداية المشكلة بدأت بظهور العيب في كوعة الثرموستات ( أنا ذكرتها في موضوع تغير الموتور ) إلي البيه الميكانيكي إفتكس وشالها

أنا لم أروي لكم تفاصيل ما حدث بعد أن غيرت كوعة الثرموستات......بعد التغير بإسبوعين تقريباً كنت قدراً فاتح كبوت العربية بشيك على الموتور وفوجئت بجسم غريب واقع على المصفحة....شيلته ولقيته الكوعة الكاوتش القديمة إلي كانت راكبة في الثرموستات القديم......لقيتها منحولة جامد من الجمب وجزء منها سايح.....بصيت على السيور ولقيت سير التكيف نصه منحول وبلية الشداد بتاعته سايحة وعليها جزء من الكاوتش بتاع الكوعة.....السير كان بيلف عادي بس البلية هي إلي مزنوقة......مشيت بيها كده حوالي إسبوع عشان كنت مشغول لغاية ما السير إتقطع وحسيت ده عالطول عشان بارو الدركسيون فصل
البيه الميكانيكي نسي الكوعة القديمة على الموتور وقفل الكبوت على كده.......والكوعة وقعت على السيور وخربت الدنيا
المهم أنا إحتفظت بالكوعة السايحة دي عشان أروح بيها لمحمد الشرقاوي كإثبات على إهمال صبيانه.....طبعاً روحتله وقلتله ينفع يعني إلي حصل ده ؟.....هو عمل فيها من بنها وقالي هاتلي السير والبلية أركبهملك......السير والبلية كانوا بـ 270 جم ورفض ياخد مصنعية

وللأسف البهوات وهما بيركبوا السير أكيد لطشوا الكليبس بتاع الضفيرة وخلوعوا الصمام ده من مكانه للأني رأيتهم وهما بيحاولوا يركبوا البلية بصعوبة عشان المكان كان ضيق جداً
ده التفسير الوحيد لما حدث

أرايتم ما يمكن أن يحدث نتيجة لإهمال الصنايعية......بجد والله الواحد مش عارف يعمل إيه.....لازم تبقى واقف فوق دماغ الواحد

الحمد لله على كل حال ولعله خير إن شاء الله

المشاركة الأصلية كتبت بواسطة Amr_Moh

مبروك يا كبير الكليو.

الله يبارك فيك يا جميل

الف مبروك على حل المشكله
و مشكور على تفاصيل المشكله بالصور فيها معلومات حلوه
نفسى الاقى صنايعى بيفهم فى اوقات كتير انا بساعد الصناعيه فى تقفيل حاجات كتير لأن شغلهم شغل عافيه مش بيشغلوا دماغهم فى التركيب ابدا كله بالزق
الله يخرب بيت الترامادول بوظ دماغ الصنايعيه

الحمد لله انه وفقك انك تلاقي المشكلة وحلها , اعتقد لو كنت لفيت بيها على اكثر من ميكانيكي كنت هتضيع وقت ومجهود وفلوس على الفاضي . وربنا يباركلك في عربيتك الاصيلة :)

مبروك يا جماعة أنا كنت راكب العربية فى مرة وكنت لما بلمس صاج العربية بحس بكهرباء خفيفة زى اللى بتحصل لما تلمس شاشة التليفيزيون كدا الكاثود