السلام عليكم

عنوان الموضوع أنا مقتبسه من مهندس مركز فرنش موتورز.....عيب خبيث !

من شهر تقريباً كنت ماشي على طريق السويس وكنت مستعجل شوية عشان كان عندي شغل في السويس.....المهم مشيت طول الطريق ما بين 130 و150 كم ورجعت في نفس اليوم على نفس السرعة دي والعربية كانت تمام مفيش أي مشكلة

تاني يوم الصبح دورت العربية ومشيت عادي مفيش أي مشكلة.....بعد ربع ساعة لاحظت تقطيع ونتش بسيط وأنا ماشي.....وقفت وبطلت العربية ودورت تاني ومشيت وعملت نفس المشكلة تاني

المشكلة غريبة شوية.....هي مش مستمرة.....ممكن العربية تفضل ماشية كويس بدون أي مشاكل وتنتش نتشة بسيطة كده وتكمل عادي

أنا لاحظت إن المشكلة دي بتظهر أكتر لما أخف أو أشيل رجلي من على دواسة البنزين وأرجع أزود تاني.....وأحياناً لما أمور وأدوس فرامل ممكن العربية تبطل

إفتكرت في الأول إن ده عيب بنزين لأني قبل ما أسافر مونت إضطراراً من بنزينة مصر للبترول في التجمع الأول لأن الدائري كان واقف......التفويلة خلصت ومازال العيب موجود......إشتريت منظف رشاشات ودائرة بنزين ومازال العيب قائم

روحت لمركز فرنش موتورز في الرحاب والمهندس ظل حوالي ربع ساعة سايق العربية عشان يطلع العيب.....والعيب ظهر معاه.....كشف بالكمبيوتر وظهر معاه مشكلتين....
أول عطل كان في الـmap sensor ....أنا قولتله قبل كده الفيشة بتاعته حصل فيها مشكلة وصلحتها وبالتالي العطل ده مجرد تسجيل.......طبعاً المهندس عشان يقطع الشك ده غير الفيشة كلها
العطل التاني كان من الـThrottle Body .....بس هو قالي ممكن ده يكون تخزين قديم

المهم هو عمل reset ودور ومفيش أعطال ظهرت تاني

طلعنا جربنا العربية والمشكلة ظهرت تاني......كشف بالكمبيوتر تاني ووجد عطل الـThrottle body ظهر تاني.....طبعاً أنا كنت عارف إن الـTB سعره غالي جداً.....سألتوه على سعره...قالي 3500 جم جديد وممكن تجيبه إستيراد بـ 1500 جم.....قلت ربنا يستر

هو مش مقتنع إن ده عيب TB لأن مش دي أعراض تلفه.....وأنا عارف إنه لما بيكون في مشكلة أو محتاج تنظيف بيخلي الـRPM مش ثابت والعربية مبرجلة.....ولاحظت أيضاً إني لما بمشي بالعربية كتير وأبطلها وأدورها عالطول تاني لمبة الكويل إلي في التابلوه بتنور....فمجرد بطفي العربية وأدور تاني اللمبة بتطفي...فممكن تكون دي مشكلة الـ Error إلي بيطلع للـTB

المهم المهندس قالي لازم تسيب العربية عشان ده عيب خبيث ومحتاج وقت وتجارب مستمرة عشان نوصل للمشكلة..وشاكك إن ده ممكن يكون عيب رشاشات وممكن أغير مسطرة الرشاشات
أنا موافقتش طبعاً عشان أنا مكنتش أقدر أستغنى عن العربية في هذا الوقت.....دفعت 250 جم ومشيت !!

معلش طولت عليكم في الكلام.....بس إلي جاي ده عايزكم تركزوا معايا فيه شوية

أنا قولت هفضل ماشي بالعربية كده لغاية ما العيب يظهر جامد ونعرف نوصله
المهم أنا بدأت أراقب وقت حدوث المشكلة وتوصلت لشىء ثابت يحدث دائماً وهو لما أمور العربية وأسيبها ماشية شوية وتكون السرعة فوق الـ40 كم...الـRPM بيطلع وينزل والعربية تبطل وأحياناً تجمع تاني قبل ما تبطل....تمام كده ؟
العربية وهي دايرة ووقفة مفيش أي مشكلة تحصل والـRPM ثابت زي الفل والمشكلة دي بتظهر دايماً من أول الغيار الثالث.....يعني طول ما أنا ماشي في الزحمة وبجيب أول وتاني العربية زي الفل مفيش مشكلة....تمام كده ؟

أنا بصراحة شاكك في الـSpeed Sensor إلي هو بيبة السرعة إلي بيركب في الفتيس....أنا غيرته بالأصلي عند تغير الموتور لأن القديم كان بيخرف وأحياناُ عداد السرعة يشتغل وأحياناً يفصل.....

هل تحليلي للمشكلة ماشي صح كده ؟.....أنا هحاول أفك الفيشة بتاعته وأجرب ( المشكلة إن مكانه رخم تحت الفتيس )

أنا بصراحة معنديش إستعداد أظل أدفع في فلوس تجارب وتغير قطع غيار مش محتاجة تغير لأني ليا تجربة مش ظريفة في الموضوع ده قبل كده

أرجو ممن يملك المساعدة أو الخبرة في مثل هذه المشكلة أن ينصحني بما أفعل

وجزاكم الله خيراً