الموضوع: عملت حادثه.. الحمد لله علي كل شيء

الحمد لله على السلامة والنجاة وقدر الله وما شاء فعل وربنا يتم شفاء الوادلة على خير وسلام

المشاركة الأصلية كتبت بواسطة eng-aggour

السلام عليكم :
انا اسمي كريم ومعايا صني الجديده
عملت حادثه والحمد لله .. والدتي بس هيا اللي دراعها اتكسر (ودي حاجه انا مش قادر اسامح نفسي عليها وهعيش بالذنب ده طول حياتي )
انا كنت عايز اقول حاجتين بالضبط ....رجاء .... واستفسار
الرجاء : مش هقول في التاني السلامه والقصه دي كلنا عارفينها بس كل اللي هقوله ان مكنتش خايف علي نفسك خاف علي اللي معاك في العربيه لان هتحس بشعور ذنب سيء سيء
انا مش هحكي القصه بالتفاصيل بس هقول بسرعه كده اللي حصل :
هو طبيعي انهم اما يعملو مطب علي طريق في حته ضلمه يحطو كاوتش ترله كبير كده علي المطب ....

انت حافظ الطريق تقريبا حته حته والله يا جماعه تقريبا عارف كل الحفر اللي علي الطريق وطبات الهوا كمان
المهم انا دخلت في الكاوتش ده ومعرفتش افاديه لان كانت فيه عربيه سابقاني علي اليمين (اللي هو مفيهوش الكاوتش ) والمشكله ان اليي ادامي ده كان ماشي بسرعه ولا بيدي حتي انتظار ولا لحقت حتي اشوف لمبة الفرامل ولا المطب ولا الكاوتش .... المهم هيا كذا حاجه كده حصلت مع بعض وطبعا انا المخطيء بدون اي تبرير لان السرعه العاليه دي يا جماعه مبتلحقش تعمل معاها حاجه حتي لو كنت معلم في السواقه ...علي فكره انا كنت معدي ال100 بحاجه بسيطه ....المهم مش هكذب وهقول اني فاكر حاجه لاني فعلا مش فاكر حاجه بعد ما شوفت الكاوتش ...كابوس اقرب للخيال او الحلم من الواقع .... المهم انا دخلت في الحتت الخرسانه اللي فاصله الطريق رايح جاي وتقريبا المطب والكاوتش رفع العربيه فدخلت فيه بزاويه كده ...تقريبا الكواتش بتاع العربيه هو اللي شال الخبطه الاولانيه لان لسه معلم علي بلوكات الخرسانه دي وبعدين العربيه راحت علي يمين الطريق ودخلت في شجره برضه من قدام من عند الفانوس كده لغاية الاشاره اللي في جنب العربيه ودي الخبطه اللي كسرت دراع والدتي ....
الاستفسار : دلوقتي انا اعمل ايه في العربيه .... (انا مش مامن علي العربيه)
اللي السمكري قالهولي ان المقصات اتكسرت والعفشه طبعا من مساعدين وكبالن و كمان الرفارف والعجل طبعا والكرتير اخرم بس قالي الماكينه متلمستش ولا الكمبيوتر والبطاريه والنور كمان كان شغال والزجاج شغال ...(العربيه علي فكره تانتها شغاله لغاية اما الناس بطلتها لما خرجتني ...
انا هحاول اصور العربيه واوريها للناس اللي هنا بس اما افوق الاول لان لسه والدتي هتعمل عمليه في اليومين الجايين
السؤال بقي ...هل قطع غيار الصني الشكل الجديد موجوده بره التوكيل ولا جوه التوكيل واصلح العربيه فين
يا ريت الناس تقولي اعمل ايه لان انا اول مره اعمل حادثه ومعرفش جامد في العربيات
؟؟؟سبحان الله انا لسه كنت عامل للعربيه صيانة الالف كيلو (مستلم العربيه في اخر شهر 12 اللي فات)
الحمد لله علي كل شيء
ارجوكم الدعاء لوالدتي بالشفاء

ربنا يشفي والدتك بجد شعور صعب

متزعلشي نفسك و ربنا يسهل و تصلحها

الحادث كان فين ؟ معلش سؤال غريب بس اظن اني شوفت حادث اخوه في المنوفية عربية صني سودة عند قرية اسمها شنوان ؟ كنت معدي من هناك و نفس الحادث بتاعك بالظبط

لو كده قولي و انا اقولك علي كذا صنايعي كويس في المكان اللي هناك و ربنا يعوضك خير

قدر الله وما شاء فعل
اللهم اشفى والدة حضرتك وعافها من كل شر
اللهم اجره في مصيبته وأخلف له خيرا منها

حمدلله على السلامه وربنا يطمنك على والدتك قريبا ان شاء الله

Sent from my LG-E612 using Forum Runner