الموضوع: يعني إيه العربية مرشوشة؟

هو مبيعبهاش بس ممكن يقلل فى سعرها شوية ومش عارف ليه بصراحه بس موضوع انها تبقى راشه حزام ده طبيعى فى مصر المهم مبيقاش فيها حاجه فى الشنطه ولا السقف.
ولو انت بترفع العربيه فى مركز كويس هيكشف لحضرتك كل حاجه

مبدأياً اللي بيعيب العربية انها تكون مرشوشة في الأماكن الحيوية يعني الصاج والجسم الخارجي ...الاكصدام أصلاً معمول لامتصاص الصدمات والحك والعربيات اللي بتريح على بعضها ...

نصيحتي ليك ماترشهوش خليه زي ماهو , حاجة كدة مصري بيقولوا عليها خليها تاخد العين علشان اللي يبص مايلاقيش العربية كاملة من مجاميعه ويطلق عليها نيران الحسد النووية !!

ونصيحتي ليك لما تحب تبيعها بعد عمر ان شاء الله تبقى تغير الاكصدام ...كدة كدة اكصدام ورا بـ 550 جنيه , وتكلفة الرش باللون الأصلي في التوكيل 300 جنيه , يبقى ترشها ليه لما ممكن تجيب اكصدام جديد ؟ :)

وأخيراً ... احب اقول لحضرتك ان الخدوش في الجنب الشمال بتكون بسبب الركنة في شارع ضيق أو مخرج شارع ...والكل بيتفادى العربية اللي جاية في وشه عن طريق انه يخيش في عربيتك انت (اهي راكنة وصاحبها مش موجود وماحدش هاياخد باله !! ) ....فيه حد غشيم ومفتري مبهدللي الاكصدام من نفس المكان ورا وقررت اسيبها زي ماهي

الاكصدام أصلاً فايبر يعني حتى الحكة دي لما تطلع في الغسيل هاتسيب خدش في الدهان لكن مش هاتتسبب في بارومة

المشاركة الأصلية كتبت بواسطة abdulmoniem

جزاك الله خيراً الواحد بس بيحس إنه عمال يحافظ على العربية من وجع الدماغ ده

ويجي واحد يعملها كدة وهي راكنة بيضايق

عشان كدة فكرت أروح أعالج الخدوش عند زيرو بتاع الخدوش

وبعدين قلت أرشه في التوكيل أحسن

أصلها حاجة تضايق .. صح؟

ماتزعلش من الحاجات دي , أي نعم الواحد بيتضايق شوية بس بعدين بيعرف ان ربنا دفع بيها شر كبير عنه ...بحاجة بسيطة مش مشكلة كبيرة في العربية

وبعدين الواحد بيحافظ على عربيته بنفسه لكن لا دخل له ولا تحكم في اللي بيحصل وهي مركونة , هاتعمل إيه ده نصيبها ونصيبنا ...ماعلش أهم حاجة انك تكون بخير وفداك وفدا ضفر أي حد من أهلك وأحبابك

من جهة معالجة الخدوش في زيرو ...الاكصدام الفايبر ممكن يكون غير قابل للعلاج من الـ"خدش" ...يعني لو اتطبق فيه ناس بتسحبه على برة أو تحط مية سخنة وتسحبه بيرجع مكانه بسهولة ... انما حتة "خدش" دي بصراحة ماشفتهاش في زيرو ... حضرتك ممكن تكلمهم تسأل على الحكاية دي مع العلم ان اللي بيبهدل الاكصدام هو مش شيل الدهان ..لأ وجود جرح غائر في الفايبر نفسه


معاك انها حاجة تضايق بس قضا أخف من قضا