الموضوع: >>>> ظهور skoda rapid بالاسكندرية ... اسعار ... مواصفات ... صور حصرية <<<<<

بسم الله الرحمن الرحيم
السلام عليكم ورحمة الله وبركاته

اصدقائي الاعزاء
امس كنت في جولة بالاسكندرية انا والمدام واثناء توجهي لكارفور قررت اقف عند نور الدين الشريف والرزق موزعي سكودا المعتمد علشان اشوف الجديد

ركنت العربية ونزلت ولسة بلف وشي الاقي باش مهندس هيثم مدير المعرض ادامي
سلامات واحترامات واللذي منه

وسالت عن اكتافيا وقال لسة شهرين علي الأقل
وسالت عن سوبيرب الشكل الجديد وقال مفيش اي اخبار عنها
ومعندوش حاليا غير رابيد قطعة واحدة رحت اتفرج عليها وحنعملها دلوقتي تقييم مبدئي

اولا الشكل الخارجي

ب

صراحة العربية تحفة تحفة
رغم اني مكنتش حاببها في الصور اد كده انما العربية في الحقيقة جميلة فعلا والموجودة اللون بتاعها ابيض وفعلا تاخد العقل الخطوط بتاعتها ممتازة وكل حاجة مربوطة ببعض بشكل ممتاز

الصالون

بالنسبة للحجم ده هي تعتبر مثال للاستخدام الامثل للمساحة
منسقة حلو جدا والكراسي واسعة وممكن تشيل 5 افراد مرتاحين حتى ولو في سفر لمسافة بعيدة
طبعا رجعت كرسي السائق لاقصى درجة لان طولي 188 سم وفعلا المسافة تكفي اي حد حتى لو طوله 2 متر ومساحة الراس ممتازة
وبعدين سبت الكرسي راجع للخلف ونطيت قعدت في الكنبة الخلفية والمفاجأة ان ركبي مخبطتش في الكرسي اللي ادامي انا كنت لامسه بس مكنتش مزنوق
فرش الكراسي قماش بس خامة كويسة زي اللي كانت بتنزل في الفانتازيا اول فئة
الكنسول بسيط مش مبهرج لكن فيه بعض تطعيمات خفيفة بالكروم تفكرك انك في عربية من سكودا لكن بشكل عام نقدر نقول عليه كنسول اقتصادي بحت لكن عصري ومناسب
الابواب زي ابواب الفانتازيا واسعة وتحس انها تقيلة (وصف ايجابي) ونفس تصميم الفانتازيا ونفس كاوتش الابواب والخامات تقريباً

المحرك

طبعا TSI 1400Cc 122 HP
الفيتيس مانيوال

الكماليات

العربية نازلة فئتين مانيوال
الاولى
كمبيوتر رحلات - ايرباج - ABS- EBD

الفئة الثانية بتزيد حساسات وجنوط
وبصراحة مش فاكر ايه تاني بس هيثم قالي ان الفرق الاساسي بينهم زي الفرق بين الفانتازيا البيز لاين والسبورت

واخيرا السعر وهو ده المفاجأة

الفئة الاولى
139000 جنيه

وهو قال ان سعرها نزل بعد نزول الدولار وان سعرها الاول كان 155 الف واعتقد ان ده سعر معقول وحينافس الاكسنت والريو بشدة في الفئة السعرية دي

الفئة الثانية 147000

يعني في الفئة السعرية بتاعة الالنترا واول السيراتو ومعاهم الكروز

الانطباع العام
العرية حلوة واكبر ميزة فيها انها شبه الاكتافيا الجديدة ولو الاتنين ماشيين جنب بعض محدش حياخد باله الا اللي فاهم اوي

العربية بشكل عام جيدة ولو قارنتها بالاكتافيا حتتظلم لكن كسيارة اقتصادية واعتمادية فهي صفقة تستحق التفكير فيها

اترككم مع بعض الصور

الصورة الاولي للكنسول حصريا لنايل موتورز من تصويري

[sor2]http://www.imageuploaddirectlink.com/uploads/13676129021.jpg[/sor2]

بعض الصور الاخرى الرسمية للسيارة

[sor2]http://photo.netcarshow.com/Skoda-Rapid_2013_photo_01.jpg[/sor2]

[sor2]http://photo.netcarshow.com/Skoda-Rapid_2013_photo_03.jpg[/sor2]

[sor2]http://photo.netcarshow.com/Skoda-Rapid_2013_photo_05.jpg[/sor2]

[sor2]http://photo.netcarshow.com/Skoda-Rapid_2013_photo_08.jpg[/sor2]

[sor2]http://photo.netcarshow.com/Skoda-Rapid_2013_photo_1e.jpg[/sor2]

[sor2]http://photo.netcarshow.com/Skoda-Rapid_2013_photo_22.jpg[/sor2]

[sor2]http://photo.netcarshow.com/Skoda-Rapid_2013_photo_27.jpg[/sor2]

هذا الموضوع حصري لنايل موتورز وغير مسموح بالنقل الا باذن صاحب الموضوع