سؤال عن الغيارات

**emad_2020** · 09-05-2013 09:24 PM

السلام عليكم
انا كان معايا 28 كانت 4 غيار وبعد كدا جبت 131 / 5 غيار كنت عايز اعرف امتا اجيب الغيار الخامس على اى سرعة مثلا 80 او 90 ولو جيبت الغيار الخامس قبل كدا فيها مشكلة وكمان لو فضلت على الغيار الرابع فترة كبيرة فيها مشكلة ياريت لو حد يعرفنى اعمل ايه اخوكم لسه جديد فى العربيات وشكر

**aw2100** · 09-05-2013 11:28 PM

الخامس بيجى حسب صوت الموتور زى اى غيار يعنى ممكن على ال 90 او على 80 او تحرق شوية وتجيبة على ال 110 عادى والمشى على الرابع والموتور صوتة عالى غلط ومبروك على ال 131 !!

**sammor_28** · 10-05-2013 04:59 AM

عادي ياباشا طالما مش عاوز تحرق او تجري مافيش مشكله

**svneleven** · 10-05-2013 06:23 AM

حضرتك هات الخامس في الوقت اللي يريحك طالما أن العربية مش اتخنقت يعني لما تدوس بنزين بتستجيب معاك و علي فكرة أنت كده بتقلل استهلاك البنزين.

**p r i n c e** · 10-05-2013 03:53 PM

المشاركة الأصلية كتبت بواسطة emad_2020

السلام عليكم
انا كان معايا 28 كانت 4 غيار وبعد كدا جبت 131 / 5 غيار كنت عايز اعرف امتا اجيب الغيار الخامس على اى سرعة مثلا 80 او 90 ولو جيبت الغيار الخامس قبل كدا فيها مشكلة وكمان لو فضلت على الغيار الرابع فترة كبيرة فيها مشكلة ياريت لو حد يعرفنى اعمل ايه اخوكم لسه جديد فى العربيات وشكر

انقل على الخامس على 90 أو 100 بالكتير
و بلاش تنقل على اقل من كدا عشان متجهدش الموتور
لو نقلت على أقل من كدا هتحس ان العربية مخنوقة

**borio1704** · 10-05-2013 05:29 PM

موضوع النقل ده يبقى أسهل بكتير لو عندك تاكوميتر (عداد RPM)

والعداد ده سبب وجوده أساسا هو اللي حضرتك بتسأل عليه... إمتى أنقل الغيارات؟؟؟

عموما... النقل على دوران منخفض (صوت الموتور واطي) مش حاجة كويسة لإن الحمل على الموتور بيزيد جدا.... وممكن تعرف إن الموتور عليه حمل من الأعراض دي:

1- تسمع صوت كركرة أو تسقيف لما تدوس بنزين
2- استجابة العربية تبقى ضعيفة ... بالذات لما تبقى طالع منطقة عالية
3- صوت الموتور يوطى وممكن يطفي مع زيادة الضغط على البنزين

في الحالة دي لازم تنزل نقلة (أو اتنين) في الغيار... على حسب الموقف اللي انت فيه

الكلام اللي فوق ده لو اتكرر كتير بيسبب مشاكل في الموتور... وأشهرها كسر الشنابر، يعني الموتور هيحتاج نص عمرة...
ده غير استهلاك البنزين العالي لإنك كل مرة بتدوس بنزين بدون أداء من الموتور

طيب... إيه حكاية الصوت العالي؟؟؟

النقل على دوران عالي (صوت الموتور يبقى عالي) مطلوب أحيانا... يعني مفيش مشاكل إنك تعلي صوت الموتور لما تحتاج أداء عالي من العربية... وده عادة بتحتاجه لما :

1- تحب تاخد غرزة من حد قدامك..
2- أحيانا في حالات الخطر.. بيبقى الأفضل إنك تزود سرعتك عشان تتجنب التواجد جنب مقطورة مثلا
3- تحب تستمتع بأداء العربية

ولكن عندنا شروط للموضوع ده:

أولا: دوران الموتور لازم ما يعلاش زيادة عن اللزوم عشان ما يدخلش في المنطقة الحمرا Red Zone... اللي لو فضلنا معليين الدوران لمدة بسيطة نسبيا (أكثر من 10 ثواني) ساعتها الموتور ممكن ينفجر
ثانيا: استخدم الدوران العالي للموتور لمدة قصيرة عند الحاجة فقط... لإن تشغيل الموتور على دوران عالي باستمرار معناه تآكل عالي... يعني عمرة شاملة بعد مدة قصيرة نسبيا (حوالي 100 ألف كيلو)

الأفضل والأريح للموتور هو الدوران المتوسط... ولا عالي ولا واطي

لو عايز تعرف معلومات عن كيفية استخدام التاكوميتر (عداد الـRPM).. ادخل على الموضوع ده:
=> http://www.nilemotors.net/Nile/329379-rpm.html

بالنسبة للنقل لو ما عندكش تاكوميتر (عداد RPM).. المفروض إن عداد السرعة فيه علامات بتقوللك أقصى سرعة لكل غيار

غالباً العلامات هتلاقيها كده:
عند 35... دي أقصى سرعة للغيار ألأول
عند 70... للتاني
عند 110... للتالت
مش هتلاقي علامة للرابع ولا الخامس

حسب ما أنا فاهم... أقصى سرعة للعربية الـ131 حوالي 150 أو 160
السرعة دي بتيجي على الرابع... الخامس مجرد أوفردرايف لتوفير البنزين وما بيزودش السرعة القصوى

لو افترضنا إن الدوران المتوسط للموتور على الرابع هيخلي العربية تمشي على 90... يبقى تقدر تنقل للخامس على 80 - 120

أقل من كده ممكن يكون فيه حمل مالوش داعي

...

**aw2100** · 11-05-2013 10:36 PM

المشاركة الأصلية كتبت بواسطة borio1704

موضوع النقل ده يبقى أسهل بكتير لو عندك تاكوميتر (عداد RPM)

ولكن عندنا شروط للموضوع ده:

أولا: دوران الموتور لازم ما يعلاش زيادة عن اللزوم عشان ما يدخلش في المنطقة الحمرا Red Zone... اللي لو فضلنا معليين الدوران لمدة بسيطة نسبيا (أكثر من 10 ثواني) ساعتها الموتور ممكن ينفجر
حكاية الموتور ينفجر محتاجة تفضل قارص فى الرد زون لمدة لاتقل عن 5 دقائق بالنسبة للعربيات القديمة ال 128 وال 127 لكن بالنسبة لليابانى والالمانى الحديث خدلك 1/2 ساعة فى الرد زون مافيش مشكلة طبعا انا ماباشجعش حد يقرص على موتور عربيتة زياده عن اللازم بس حبيت اصحح المعلومة تحياتى !!

ثانيا: استخدم الدوران العالي للموتور لمدة قصيرة عند الحاجة فقط... لإن تشغيل الموتور على دوران عالي باستمرار معناه تآكل عالي... يعني عمرة شاملة بعد مدة قصيرة نسبيا (حوالي 100 ألف كيلو)

الأفضل والأريح للموتور هو الدوران المتوسط... ولا عالي ولا واطي

أقل من كده ممكن يكون فيه حمل مالوش داعي

...