الموضوع: باركولى .. أشتريت مقطورة حمولة 3 طن .. قصدى 307 sw :)

المشاركة الأصلية كتبت بواسطة HOSSAM99

لو يسمحلي استاذي أبو يحيي
و بعدإذن حضرتك طبعا
هو ميقصدش ينزل بمستوي الحوار و لا حاجه لأنه ما شاء الله عليه من الأعضاء المحترمين اللي بتابعهم أنا و عمري ما شوفت منه حاجه وحشه
لكن هو بيوصف لسان حال فئه ضاله (الصنايعيه الفهلويه) اللي بيحبو يستنزفو أموال الزبون علي عدة مرات
يعني مبيوجهش كلام لي أو لحضرتك أو لأي عضو علي لسان حال نفسه و لكن بينقل طريقة تفكير الفئه دي من الناس
أرجو إن الموضوع يكون وصل و ده اللي أنا فهمته من كلام الأستاذ أبو يحيي
و طبعا هو الأجدر علي توضيح ما يقصده

و يلا بقي عايزين تجمع لبيجو يكون عالمي مين اللي يحدد ميعاد و يجمعنا :)

أستاذ منير. أخبار حضرتك أيه..
أنا متفق مع كلام استاذ حسام أن أبو يحي فعلاً بيتكلم بصيغة الصنايعية وتفكير أصحاب مراكز الصيانة والتوكيلات ومقصدش يوجه لك كلام خالص.
راجع مشاركات اأبو يحي في المنتدي هتلاقي أنو إنسان محترم وخدوم وتاني بوضح لك انك فهمته غلط وهوا ميقصدكش يوجه الكلام ليك. وأمسحها فيا المرة دي ياسيدي عشان اخنا كلنا أخوات هنا.

وبالنسبة لجزئية ان البيجو محتاجة صرف ودلع دي انا متفق معاك فيها ومفهاش كلام.
بس الصرف يكون بالصح وبالمعقول. يعني لما يكون تغير زيت الفتيس فك طبة وتصفية زيت وتملاه من جنب البطارية فوق ب ٥٠ جنية عند أي مركز خدمة أو فني شغال في بيجو بس. وعند مستر ماهر عمارة ب ٢٠٠ جنيه.!!

أنا هتكلم عن نفسي ومش عنك ولا عن اي حد عشان محدش يزعل برضه. بس انا كدا هبقي أضربت علي قفايا. ومش من العدل إني أدفع ٢٠٠ جنبه مقابل خدمة متستحقش أكتر من ٥٠ ل ١٠٠ جنيه. إلا طبعاً لو مكنتش بتعب في الفلوس اللي بكسبها مش هتفرق معايا.!

لو انا مش فاهم الحاجة دي تتكلف كام تقريباً ورايح عارف انا عايز اعمل ايه ممكن يغير لي اي حاجة مش عايزة تتغير. ويحاسبني عليها قطع غيار ومصنعية. وممكن يقولي تغير الزيت ب ٣٠٠ او ٤٠٠ لأني بيه بالنسبة له وأفندي مش فاهم حاجة بس معايا فلوس عشان معايا عربية نضيفة وبقيت مصلحة بالنسبة له. دا توضيح للي أبو يحي يقصده.

أنا روحت مركز عمارة ٣ مرات. وصلاح سالم مرتين وغمرة مرتين واسكندرية مرغم مرتين. ليا تجارب وحشة في كل مرة مع كل مكان. بس هقول الخاصة بعمارة دلوقتي من باب الملام عنه علي أنه مكان يستخق دفع الفلوس فيه والكلام دا.

في مركز عمارة اتركب لي حشو فلتر زيت خاص ب ٤٠٦ من غير ماحد يعرفني قبل التركيب عشان مكنش عندهم بتاع ٣٠٧ مع انه ارخص وحاسبوني علي سعر ال ٣٠٧ الأغلي ومعرفتش الكلام دا غير بعدها وانا بغير الزيت ف صلاح سالم.
في مرة كنت بعمل شغل في العفشة وبعتو العربية عن ورشة برة من غير ما يقولو لي برضه عشان تظبط زوايا
المهم العربية كانت مرفوعة علي اتنين جاك من قدام . الافندي الصنايعي لما خلص شغله رفع بالكوريك ونزل جاك منهم بعدين المفروض يرفع بكوريك من الناحية التانية ويشيل الجاك التاني قبل ما ينزل العربية براحة.
المهم شال جاك ونسي التاني ونزل الكوريك مرة واحدة والعربية مرفوعة عال جاك التاني فاكانت هتقع علي جنبها واتهزت جامد وانا قلبي وقع ف رجلي.
متكلمتش كتير عشان معملش مشكلة للولد وطلعت اجيب مية لاقيت العربية طالعة ومشيت بسرعة.!
لما بسأل عليها قالو لي انها خرجت طيب راحت فين. راحت ورشة تظبط العفشة بالكمبيوتر عشان مش عندهم، طب مش يسألوني.؟ لا مانا أفندي بقي. وطبعاً قلقت عليها وفضلت مستني وهيا جاية لقيت اللي كان واخدها واحد تخين جداً وبغض النظر عن شكله وحجمة داهل بيحري بالعربية ودخلة مركز عمارة مكسرة شوية لاقيت الافندي جاي بيجري بيها وبياكل كل الحفر ولاقيت الكساحة اللي تحت الاكصدام الأمامي بتحك في الأرض جامد وهتتخلع من مكانها وهوا ولا همة ماهي مش عربيته.. بشتكي لمستر ماهر بقوله ينفع كدا يجري في الدخلة المكسرة دي وكلنا بمشي فيها براحة بعربياتنا حتي حضرتك بتدخلها براحة قالي معلش.!

بستلم العربية منه لاقيت الدركسيون ملووح شمال لوحة ملحوظة. قلت له ايه دا الدركسيون مش مظبوط أيه اللي عمل فيه كدا. قالي هوا كان كدا. !! بكل بروود. دا الراجل التخين.
قلت له لأ مكنش كدا. قالي لا كان كدا. المهم زعقت شوية جه مستر ماهر قال فيه ايه قلت له الدركسيون.
يدوبك بص عليه لاقاه باين ملووح وقاله روح أظبطه وخلينا نخلص.! لاقيت الراحل بيبرطم بكلام مش غريب مسمعتوش واخد العربية تاني وجري بيها من نفس الشارع المكسر وانا اعصابي شايطة وبقول أخر مرة أجي هنا.

قبل ما يروح يظبط الدركسيون اخر مرة كانو مجهزين لي الفاتورة وكان فيها ظبط زوايا ٧٠ جنيه.!
وشوت بالصدفة ورقة من مركز الخدمة اللي اتعملت عنده جنب الفايس انها اتظبطت عند مركز فلان والتكلفة ٤٠ جنيه.
بقوله ليه كدا يا مستر ماهر. ولما مش عندكم ظبط زوايا مقلتليش ليه وكنت عملتها انا وانا مروح.
قالي احنا بنظبطها المهم قلت له انا مش دافع المبلغ دا ولا مستلمها وهيا جايالي بالمنظر دا.
فبعت الراجل بيها تاني. وطبعاً دفعت ال ٧٠ جنبه في الاخر وانا قرفان ومتضرر نفسياً ومش فاهم انا ليه دفعت المبلغ دا بعد ما ربطت عفشة عندهم ب ٤٠ جنيه و ٧٠ ظبط زوايا اللي كان ممكن اعملها فاحسن مركز متخصص من ٢٠ ل ٤٠ جنيه للعربية كلها والراجل طالع يجري بيها مرتين رايح علي ارض مكسرة ومرتين راجع. روحت بالعربية معكنن
ورحت عملتها بعده في مركز خدمة ظبط زوايا بالكمبيوتر وبقت أحسن.
وأستعوضت ربنا في ال ١٣٠ جنيه اللي صرفتهم عنده. وقلت الحمدلله انها جات علي قد كدا.

انا حبيت اشاركك بتجربتي بس من ناحية ان البيجو عايزة تدلع اه. ومتسترخصش فيها أه.
بس محدش يضحك عليا. ويعاملني علي أني بيه أو زبون.
يعني انا بروح مركز الخدمة او التوكيل وأطفع أمتر عشان أخد مستوي خدمة اعالي. صح.؟
بس لما أدفع اكتر عشان اخد مستوي خدمة زي اللي هاخدة من برة من حد فاهم برة. او ادفع اكتر واخد مستوي أقل من برة زي ما حصل معايا. دا مش عدل..

تحياتي ليك واتمني النفوس تبقي صافية.