الموضوع: قصتى مع كلية الشرطه

المشاركة الأصلية كتبت بواسطة ahmed_dinamo

بص يا باشا انا هعلق على 3 حاجات اول حاجه فكرة الشرطه فى خدمة الشعب وليست خدامة الشعب

فى ناس فاهمه الكلمه غلط انا بأدى دورى ودورى هو حمايتك وأمانك يبئا هنا انا بئيت فى خدمتك فى ناس فاهماه انا خدام عندك يعنى المفروض تفهم انى باخد مرتبى من فلوسك ال هى ضرايبك يبئا من الاخر ابئا خادم عندك وده انا بقوله فى وشه طظ فيك انا مش خدام عند حد انا بشتغل عشان ارضى ربنا الاول .

تانى حاجه

فكرة السجون قد تكون صحيحه وقد تكون غير صحيحه وانا الصراحه مقدرش اتكلم فى حاجه انا مش متأكد منها وده مجرد رأيى ان صعب الشرطه تخرج مساجين هترجع تلمهم تانى


تالت حاجه

فكرة ان انا دخلت الكليه فببرر لحد
لا انا الحمدلله مببررش لحد انا ال شايفه صح بقول عليه وال شايفه غلط بقول عليه مين قال ان انا شفت الشرطه صح قبل او بعد الثوره لا الغلط فيها كبير وكبير جداً ولازم يتصلح انا كل ال بعمله بتكلم وبقول ال انا شفته انا اولاً لا انا فلول ولا انا اخوان ولا انا شايف ان الدكتور مرسى هيقدر يغير حاجه فى الشرطه لان هو عاجبه الحال كده بالوزير الموجود دلوقتى


وبس ....

مشكووور جداً على مرورك وكلامك

ربنا يوفقك

وأنا مشفتش حد في مصر فاهم كلمة الشرطة في خدمة الشعب غلط نهائي
والفهم الخطأ اللي إنت وضحته أنا شايفه مش موجود واقعاياً
ولما تخلص كلية وتتعامل مع العامة وتاخد خبرة حقيقية هتتأكد من ده

الناس منتظرة من الشرطة أداء عملهم فقط

مش إن عربيتك تتسرق فتروح القسم والظابط يعطيك رقم العصابة أو ياخد رقمك يديه للعصابة

وربنا يوفقك

-

انا هاكلمك من الواقع اللي بيحصل قدامي..

1- مبقاش فيه وجود لجهاز إسمه الشرطة.. و ده باين في السرقة وحالات التحرش اللي بتحصل في عز الضهر.. بدون اي تواجد أمني..
2- لما واحد يتصل بالشرطة و محدش يرد.. ده إسمه إيه بجد؟؟ يعني انا افهم ان مصلحة الكهربا متردش، شركة المش عارفة ايه.. انما الشرطة !! رقم الطواريء !! يا لهوي ! امال لو حصلتلي مصيبة اكلم مين؟؟
3- الشرطة فيها الكويس و فيها الوحش.. و احسبك من الناس المحترمة اللي فيها و فيه واحد قريبي عارفاه و عارفة انه من الناس المحترمة.. بس الإغلبية عايزين الحرق !!

أمثلة : سايقة في الشارع واحد أمين كل مهمته في الحياة انه يشوح بإيده عشان العربيات تعدي "كأن من غيره هانقف مش عارفين نعمل إيه" .. و كنت سايقة بشويش اصلاً ففيه ناس عايزة تعدي الشارع فوقفتلهم يعدوا.. راح الباشا جيه يتخانق معايا !!
مثال تاني: و انا راجعة من المطار جيه 2 مالهومش لازمة من شرطة المطار يفتشوا الشنطة الكبيرة.. ماشي مفيش مشكلة.. الجميل في الموضوع انه فتحها و بص فيها و سابها مفتوحة " و اصلاً و الله العظيم لو كنت مهربة فيها 2 كيلو هيروين مكانش عرف !!" و بعدين قال لصاحبه بالنص " خلاص خليها تعدي شكلها بنت ناس !" انا سبحان من سكتني عليه اصلاً ساعتها عشان كنت ملخومة باقفل الشنطة تاني.. و بعدين بحاول اشيلها احطها على العربية اللي بجرها عليها و شكلي اصلاً مش عارفة اشيلها.. الاقيه بيقوله " ساعدها مش عيب يعني" رحت طحت فيه و قولتله هو ايه اللي عيب !! انتوا اصلاً لازمتكم ايه غير انكم تساعدوا الناس !! و طبعاً انا اللي كنت شلت الشنطة و مشيت

المغزى من القصة.. معظم الظباط و الأمناء مش عارفين يعني ايه تعامل مع المواطنين.. فيه قلة منهم كويسين و محترمين بس للأسف الباقي................. !!