الموضوع: قصتى مع كلية الشرطه

السلام عليكم ورحمة الله وبركاته

هو موضوع طويل شويه بس لل عاوز يقرأه ويفهم قصدى

اولاً انا أسمى احمد عطيه
طالب بالفرقه الاولى كلية الشرطه وبمتحن حاليا امتحانات اخر السنه
عضو فى المنتدى من 24 نوفمبر 2011
الحمدلله على صله كويسه جداً بناس كتير فى المنتدى


القصه تبدأ من ثالثه ثانوى ونيتى انى اقدم شرطه والحمدلله قدمت وقدمت حربيه وانا كنت جايب 94% فى سنه تانيه علمى رياضه جبت 74% فى تالته مجموعى كله بالمستوى الرفيع 85% المهم قدمت هندسه خاصه وكنت حاجز هندسه والحمدلله نجحت شرطه ونجحت حربيه بدون واسطه حتى الحمدلله كان حصلى اصابة فى ظهرى لكن الحمدلله دلوقتى احسن وكانت هى السبب فى انى اقنع اهلى بدخولى شرطه ال كانت اساساً رغبتى لفكره كانت فى دماغى وهو ان لو كل واحد شايف فى نفسه ان هو محترم الحمدلله قال مش هدخل ابنى شرطه او مش داخل شرطه يبئا هنسيب شرطه لناس فعلاً متستاهلهاش.
المهم الحمدلله دخلت وانا معلوماتى عن شرطه ان هى اكل وشرب ونوم وضغط وعقله وبطن وبلاى ستيشن اه والله كنت فاكر فى بلاى ستيشن المهم دخلت لئيت حاجه مختلفه تماماً حياه نظاميه الى ابعد الحدود عسكريه بكل المقاييس من طوابير لصحيان بدرى لنظام وعقوبات وحبس وحاجات كده مكنتش متوقعها خالص المهم الكليه طبعاً من جوه غير ال الناس فاهماه تماماً دى حاجه تانى حاجه ان السنه دى كان فى عندنا حملة اعرفنى صح ال طبعاً جالنا فيها كذا كليه وكذا مدرسه والحمدلله كنت مشارك فيها من ضمن ال 20 طالب ال كانو موجودين بجد الناس ال بتيجى بتغير فكرها تماماً عن الكليه وعن طلبة الكليه وعن الشرطه كماااان .

الحاجه ال انا عامل عشانها الموضوع اساساً : هى كلمه غريبه بئيت اسمعها كتير وهى الشرطه بتعاقب الشعب فمبتشتغلش يا جماعه فى 192 شهيد شرطه من الثوره مبيشتغلوش ازاى محصلتش فى دوله قبل كده وفاة العدد ده يا جماعه الناس بتعترض على موت بلطجى حتى وان اطلق رصاص على الظباط بيقولك فين حقوق الانسان بلطجى وضرب نار على ظباط بيقاوم بنى ادم وهيموت وبيضرب عليه نار لما يضرب البلطجى يبئا فين حقوق الانسان لما الظابط يموت يبئا ده شغله وبيأديه وانت خادم عند الشعب لا معلش انا مش خادم عند حد ومفيش حد يستاهل انى ابئا خادم عنده انا بعمل شغلى برضى بيه ربنا زى بالظبط الرجل ال شغال فى المكتب فى التكييف ما بيعمل شغله بيرضى بيه ربنا ده شغله الموظف او الرجل ال شغال فى شركه مش خدام عند الناس ال بتتعامل مع المصلحه او الجهه او الشركه دى ده بيمارس عمله عشان يرضى ربنا .

انا عامل الموضوع ده عشان فكرة بسيطه بسمعها كل يوم الشرطه هربت المساجين ايام الثوره كنت انا بقولها قبل ما ادخل الكليه واتعامل مع الناس دى .

هو انا لو مربى اسد وحبسه وعارف انى لو خرجته هيأكلنى قبل ما هيأكل الناس التانيه هطلعه نفس الفكره البلطجى همه ان ينتقم من الظابط قبل ما ينتقم من الشعب .

من الاخر الشرطه ما هى الا عباره عن جهه حكوميه عامله فيها الكويس وفيها الوحش والحمدلله مصر كلها مفيهاش جهه كامله كويسه سواء خاصه او حكوميه.

من الاخر مفيش حد هيغير رأيه عن الشرطه غير لما يتعامل معاهم بدون حساسيه انا كنت على طول بتعامل وانا حاسس ان البنى ادم ده بيتنطط عليا وان فاكر نفسه ايه والكلام ده لما دخلت الكليه عرفت انى بجد فى ناس كتير جداً محترمه مظلومه فى الفكره ال كانت متاخده عن الشرطه سابقاً وال بجد دلوقتى الظباط بيحاولو يغيروها

المشاركة الأصلية كتبت بواسطة aft

مش عارف اقوللك ايه,,,,شكرا ليك على السرد الجميل
وكل حاجه في الدنيا فيه منها الكويس ومنها الوحش,,,,,

انا ضد التعميم,,,,بس الواحد في حياته بيتعامل مع الشرطه في مواقف كتير جدا,,,,
والصراحه نادرا لما يقابل معامله محترمه - وده ينطبق برضه على كل الهيئات الحكوميه,,,

بس الاختلاف,,,,ان الواحد ممكن ممكن يتخانق مع الموظف ويشتكيه,,,
بس ظابط الشرطه ,,,تخاف انك تشتبك معاه لأنه ممكن يلبسك 100 مصيبه :(
وكون ان اسلوب التعامل ده ممكن يكون نتيجة تعاملهم مع الحراميه والبلطجيه وضغط العمل المستمر,,,,فده في نظري مش مبرر عشان تعامل انسان محترم باسلوب البلطجيه,,,,ديه شغلتك وانت اللي اخترتها.

اواعتقد ان ده نتيجة ان مفيش اسس علميه بتشتغل بيها الشرطه - او يمكن اسس راجعيه - وده برضه ينطبق على كل حاجه في مصر.... بس التعامل مع الشرطه بيكون حساس نظرا لامتلاك السلطه والقوه,

والصراحه,,,,فئة امناء الشرطه هي اللي بوظت وبتبوظ وتسئ سمعة الشرطه كل يوم لاعتمادهم على البلطجه و التلفيق والرشوه,,,,,,الا من رحم ربي

وفي الاخر اكيد في ناس كتير محترمين زيك في الشرطه والناس كلها تتمنى ان يكون ليهم دور فعال واليد العليا في الداخليه.

مشكووور يا باشا على كلامك الجميل ومرورك الطيب على الموضوع

انا هقولك على حاجه واقسملك بالله ما قصدى انقص من حد او استهين بيه او اقل منه

احنا دلوقتى فى مصر بئا امناء الشرطه ياخدو فرقه فى الاكاديميه ويبئو ظباط وده شئ انا اعترض عليه بشده لان معلش ده واحد عايش طول حياته امين شرطه صعب وهو عنده على الاقل 35 سنه يبئا ظابط برتبة ملازم ويقدر يتعود على اسلوب الظباط فى التعامل

تانى حاجه انا معاك ان فعلاً التعامل مش كويس وانا مش بدافع عن الاسلوب ده بس انا عن نفسى مبعرفش امسك نفسى وال بشوفه بيكلمنى وحش بدخل فيه شمال ( قصدى على الظباط قبل ما ادخل الكليه )

بس والله فى اتجاه حقيقى للتغيير فى الشرطه سواء فى الكليه او بره الكليه وان شاء الله هبنئا احسن من كده كتير

بس كل الشعب يحاول ميضغطش اكتر من كده على جهاز يهمه اكتر ما يهم حكومه او غيره لان ده الجهاز الاول لمصر يا باشا فى كلمه بتتقال دلوقتى بتوجع بجد

يا بلد ارخص ما فيكى دم ال حاميكى