نداء عاجل الى مالكي نيسان صني سوبر صالون 2013

**sharaf67** · 23-05-2013 10:16 AM

الأخوة الأعزاء مالكي نيسان سوبر صالون 2013 ....
السلام عليكم ورحمة الله
لا يخفى على أحد منكم مدى الغش الذي تعرضنا له والمقلب الذي أخذناه في هذه السيارة من حيث الضعف الشديد في الصاج وعدم تحمله لأى صدمة أو احتكاك حتى لو كان بسيطا من قطة مثلا.. وأيضا ضعف البويه وبالتالي ضعف الأمان في هذه السيارة فماذا يحدث لاقدر الله لو كانت الصدمة شديدة شوية؟
والسؤال الأكثر أهمية .. الى متى سنظل صامتين عن خسارة المبالغ التي دفعت فيها؟
أقترح أن نتقدم بشكوى جماعية الى الشركة أو نتقدم بشكوى الى حماية المستهلك أو نتقدم الى القضاء لأخذ حقنا من الشركة وتعويضنا عن خسارتنا
وليكن تواصلنا من خلال الايميل.
ملحوظة: اشتريت سيارتي منذ حوالي 3 شهور وللأسف بها خدوش كثيرة وللأسف الصاج ظاهر جدا والكبوت مطبق بسبب طفل صغير جلس عليه.

**mado83** · 23-05-2013 10:32 AM

طبعا الايجابيه حاجه مطلوبه
ولكن حضرتك ماندحكش عليك فى حاجه
السعر ارتضيت بيه مقابل الامكانيات وقت الشراء

**sherif1986** · 23-05-2013 10:37 AM

بص ياباشا انا الصراحه لما جيت أشترى العربيه دى كنت بقارن بينها وبين اللوجان عشان انا كنت عاوز حاجه صالون واسع وعاليه عالارض وكنت حابب اللوجان أكتر أيام لما كانت الاوتوماتيك سعرها 79500 لكن لما الدولار استهبل وبقت العربيه ب 90000 وانت طالع قولت لأ طالما كده كده هجيب قسط يبقى خلينى فى الصنى رغم الفقر الشديييييييد فى التابلوه ورغم الكاوتش الصينى السئ ورغم عيوب التقفيل .... والله أعلم اذا كان قرارى كان صح ولا لأ ...... محدش بياخد أكتر من نصيبه

**IronHead** · 23-05-2013 11:37 AM

بص مش هتعرف فى الفئه السعريه دى تجيب عربيه فيها كل حاجه, صحيح ممكن يبقى الصاج ضعيف (شأنه شأن اغلب العربيات الجديده الكورى واليابانى) بس مقابل تكييف قوى, واقتصاديه استهلاك البنزين ونعومه العفشه
فخليك واقعى ومتتوقعش انك هتاخد كل حاجه ب100000 جنيه , ولو كان فارق معاك الصاج قوى كنت تشوف حاجه اوروبى بس كنت هتضحى بشويه حاجات تانيه زى التكييف والاعتماديه

**Ahmed_Rahem** · 23-05-2013 11:43 AM

علشان الموضوع ميفتح فى مناقشات جانبية عن العربية ، وعن المالك مفروض يكون عارف العيوب والمميزات والكلام الى هيهد الموضوع من اساسة.
خليك محدد فى افكارك والخطواط الى انت عايز تعملها والنتائج الى انت عايز توصلها، بمعنى :
- انت عايز تعمل شكوى عن اية بالتحديد (صاج سئ، دهان سئ، ...الخ)
- كتابة مقترح لصيغة الشكوى
- الهدف النهائى الى انت عايزة (تغيير قطعة غيار، تعويض مادى ... الخ).

كل دة علشان يكون الموضوع محدد وميتفرعش لمناقشات جانبية.
وبرجاء لمن يقول ان العربية قيمة مقابل سعر، الكل عارف المعلومة دى واكيد كاتب الموضوع بردة عارفها، فمفيش داعى نكررها والموضوع يطول بدون داعى.
وبكدة نخلى المناقشة فقط فى نقطة واحدة فقط وهى الشكوى ومكونتها وشكلها والنتائج المرجوة.

والسلام ختام

**miceg** · 23-05-2013 11:44 AM

بص ياباشا
مع احترامي الشديد لإيجابية حضرتك
لكن دعنى أقولك ان الايجابية ليست في هذا الموقف لسبب
دلوقتي ايه فائدة منتدى نايل موتورز
فائدتها انها بتفيد ألاعضاء عن تجارب واستفسارات
طيب ليه معملتش ريفيو محترم قبل ماتفكر تشتري الحاجة
إذا الشركة ليست مسؤلة الا في حالة انها غشت السلعة
وهى لم تقوم بموضوع الغش نهائيا
هي باعت عربية فوجهة نظري إمكانيات رائعة من إسم عريق
الصاج فالعربيات الحديثة معظمه كدة وفعلا ناس كتير إشتكت من ضعف الصاج
أخيرا الموضوع مش هيوصلك لحاجة للأسف
وإستمتع بعربيتك وتقبلها على كدة
بالنسبة لإزاله اثار الخدوش في مكز اعرفة لو عاوز تعمل عندة حاجة ممكن أدلك عليه
تحياتي لحضرتك

**abdulmoniem** · 23-05-2013 02:20 PM

1 - أنا شايف إن الشكوى ليس لها أي فاعلية ولن يكون لها مطلقاً إلا في المساهمة ممكن في التطوير إن قبلت أصلاً وتم وضعها في الـ QA Queue

2 - نيسان مغشتش حد .. لأنها معملتش إعلانات وقالت مثلاً: "أقوى صاج في العالم" .. أو "الدهان الذي لا يخدش!!" إذن الشكوى لا محل لها من الإعراب

3 - الناس إللي اشترت العربية عارفة إن فيها عيوب زي أي عربية في الدنيا .. الكمال لله وحده. وبالتالي زي مبنقول إحنا المصريين .. بنشتري على عيبه. بما إن العيوب مش مؤثرة.

4 - ضعف الصاج .. ليست سمة للأمان .. أو حتى ليست سمة للفخامة. هي سمة للشعب المصري المتربي على اللادا والبولونيز!!!!

**the_air_devil** · 23-05-2013 03:21 PM

أحب بس أضيف إضافة صغيرة من ناحية "ضعف الصاج" وعلاقته بالأمان

الصاج كل ما تزيد قوته كل مايزيد وزن العربية , وتقل فرص السيطرة عليها وقت الفرامل وتطول المسافة عند الفرملة , يعني مش أمان

الصاج التقيل يعني لو لا قدر الله حصل حادث كبير ومضطرين نخرج الناس من العربية مش هانعرف لو اتطبق عليهم واحتمال يكون سبب في إصابة شديدة أو وفاة لا قدر الله , يعني مش أمان

الصاج التقيل يعني لو نسيت نفسك - وساعة القدر يعمى البصر - وخبطت حد من المشاة لا قدر الله , يبقى احتمالية وفاته بسببك كبيرة , يعني مش أمان

الصاج التقيل يعني محتاج موتور كبير قوي يعني محتاج سعة لترية أكبر ومحتاج استهلاك بنزين أكبر

الميزة في الصاج التقيل هو عدم تأثره بالحكات والصدمات المتكررة الموجودة في شوارع مصر المحروسة , يعني الميزة النسبية ليه هي انخفاض تكلفة صيانته مقارنة بالصاج الخفيف اللي في جميع العربيات في السوق حالياً

الصاج الخفيف معمول علشان تخفيف الوزن وتقليل استهلاك البنزين , ومعمول انه يتفرتك تماماً ويمتص الصدمة إلى نهايتها ومايتسببش في نقل الصدمة إلى الركاب , الصاج التقيل بيعمل كدة

بيكون عوامل الأمان متوزعة بين وسائل حماية داخلية زي الوسائد الهوائية وفرامل الآي بي إس ونظام توزيع الفرامل , وبين امتصاص الصدمة بواسطة جسم السيارة بالكامل

العربية بتصمم انها تتحطم كلية وقت الصدمة , لكن تسبب أقل ضرر مادي على البشر اللي جواها , دي بتزود التكلفة بشدة عند الحوادث لا قدر الله , لكن مافيش عربية متصممة علشان تعمل حادثة !

ماهياش حاجة حلوة ان الصاج يكون خفيف ... لكن أعتقد بعد التحليل اللي فات كذلك ماهياش حاجة حلوة ان الصاج يكون تقيل ... وبالفعل انا مش شايف غش تجاري مطلقاً , وإلا كان كل شركات السيارات صاحبة المبيعات القوية في السوق المصري والتي تتميز بخفة الصاج لدرجة المرض اتعمل عليها قضايا واتقفلت من بدري

الحكم على العربية عمره ماكان من ناحية الصاج , لكن كل واحد له وجهة نظر تحترم ... ومن حق كل واحد يشتري العربية اللي بتسوق لنفسها ان صاجها حلو .... في الناحية دي هاتلاقي كيا ريو (فئة الـ 100 ألف وطالع ) , مش هاتلاقي فيها باقي مواصفات الصني أو وسائل أمان الركاب ... هاتلاقي أفضل أنواع الصاج "متوسط المتانة" في البي إم دابليو , المرسيدس, فولكس فاجن , فولفو ... وكل حاجة ولها تمنها , وأؤكد تاني ان الصاج فيهم مش بالغ القوة زي ما الكل متخيل ومتصور

دمتم بخير