الموضوع: اتخانقت مع سواق تاكسى ورحنا القسم

المشاركة الأصلية كتبت بواسطة beshomilan

انهارده الضهر الساعة 2 ونص كنت فى نفق احمد بدوى فشبرا وفى اتجاهى طالع كوبرى اكتوبر

سواق تاكسى شاهين سته حوالى 60 سنه ماشى ومحتكر النفق لوحده والنفق بياخد عربيتين جنب بعض وكل ما اجى جنبه يكسر عليا

جيت بعد النفق كلكستله جامد فوقف وبيقولى ايه هو انت مبتشوفش والنفق بياخد عربيه واحده ووووووو.....المهم رديت عليه وشتمنا بعض ووقفنا السكه وشتمنى وجاى ماشى قمت شتمته جامد فوقف ونزلى وانا نزلت ومسكنا فبعض بس زق فقط وطبعا الطريق واقف ورانا

وبعد شويه زق فبعض قام داخل التاكسى وجايبلى مفك وجاى عليا وفيه ناس كانت واقفه لقوا الموقف هيتطور جم حاشونا وانا اتجننت بقى لما لقيت المفك فأيده فرحت عربيتى وهجيب رول كرتون مقوى جامد جدا وكل ده قدام قسم مهمشه بالظبط فلمحت امين الشرطة جاى فقفلت الباب ومطلعتش حاجه

وطلب الامين الرخص بتاعتى وبتاعته وقلنا اركنوا على جنب واتفضلوا معايا وانا لما جه الامين قلتله شايف اللى فأيده اعمللى محضر اثبات حاله وتعدى

المهم دخلنا القسم لظابط بنجمين استقبلنا بابتسامه وقللى ايه اللى حصل وانا كنت منفعل جدا فقاللى اهدى مفيش حاجه وحكيتله وحكاله سواق التاكسى كل واحد اللى حصل وقعد يهظر معانا وقاللنا ياجماعة الموضوع مش مستاهل وطالما انتوا بخير خلاص وهكذا

وعملنا مذكرة تصالح ومضينا عليها احنا الاتنين واعتذرنا لبعض وخلاص مشيت

وبعد ماخرجت قلت ايه اللى انا عملته ده؟؟انا اتجننت؟؟الموقف مش مستاهل كل ده؟؟ليه وقفتله من الاول وليه شتمته وليه نزلتله وليه وليه؟؟

وفعلا اكتشفت انى الغلطان فكل حاجه وانا اللى ابتديت المشكله ولو كان عندى صبر مكنش حصل كل ده وربنا ستر ان السواق معملش حاجه بالمفك اللى فأيده وانى لسه عايش وربنا يسامحنى على اللى قلته وعلى قلة ادبى وانى عطلت الناس كلها بسبب غبائى وتهورى اللى ملوش اى مبرر

لفت نظرى ان الظابط بيقول للسواق من حسن حظك انك اتخانقت مع حد محترم وصبور جدا لانه لو حد تانى بعد ماشافك رفعت عليه المفك كان جاب سكينه او كوريك وخلص عليك وقتها وعيالك تتيم ومحدش هيستفاد حاجه فخللى بالك مش كل الناس زيه

دلوقتى انا ليا استفسار..مذكرة التصالح دى نقطة سودا فى تاريخى؟؟يعنى ليها محكمة او حاجه زى كده؟؟ولو جيت اسافر برا ممكن تسببلى مشكله ويبقى كأنى سوابق؟؟محتاج رد على السؤال ده اوى لحسن قلقان جدا وانا عمرى مادخلت اقسام

اولا السبب الاساسي سواق التاكسي اللي ماشي في حارتين هو اللي غلطان ، ثانيا للاسف الواحد بيبقي مضغوط جدا في الشارع و لحد دلوقتي ده عاملي مشكله اني ببقي حد تاني في العربيه و انا سايق ممكن ابقي نازل رايق و مبسوط و موقف واحد ينرفزني و يخليني بخانق دبان وشي ، علي العموما انا غالبا لما بتنرفز قوي و ممكن اعمل مشكله او اشتم حد بارد في الشارع بفكر في اللي حصل و بحس اني افورت و ان هو اه بارد و رخم و غلطان بس ميستحقش كل الانفعال ده -ربنا يرحمنا بجد لان الموضوع مبقاش ضغط من الشارع بس هي تحس ان السواد اللي بنعيشه في كل حاجه تعليمك شغلك بيتك حالتك الاقتصاديه ... الخ بيتجمع و يطلع في المواقف دي - ..... ردا علي سؤالك لا مظنش ان ده بيمثل اي حاجه و بيتهيألي عادي يعني ده حتي محضر تصالح مش عدم تعدي مثلا

احنا اعصابنا بقت مشدودة بشكل مبالغ فيه جدا
و اي موقف صغير تلاقيه كبر في لحظة
ده بسبب الاحوال السياسية و الاقتصادية للبلد