الموضوع: تجربتي في صيانة الألف كيلو مع أوتو ايجبت......خطأ فني وإدارة رائعة للأزمة

السلام عليكم ورحمة الله وبركاته

في البداية أحب أن أحييكم جميعا علي إختيار نيسان صني الشكل الجديد فأنا أري حتي الأن انها سيارة جيدة ومبيعاتها هتفوق كل التوقعات....ولهذا أريد أن أشاركم تجربتي في صيانة الألف كيلو في شركة أوتو ايجيبت.
في البداية أحب ان أوضح أن هدفي الأول من الموضوع هوا الإشادة بشركة أوتو ايجيبت علي فن إدارة الأزمات الذي يمتلكونه وشجاعتهم الرائعة في الإعتراف بالخطأ دون أدني مشكلة أو تكبر لأن إرضاء العميل هو كل ما يهمهم وهذا ما لمسته منهم. الهدف الثاني هو أننا نمتلك نوع من المسئولية تجاه سياراتنا حتي ونحن نستلمها من التوكيل فيجب علينا المراجعة علي السيارة قبل الخروج من التوكيل والتأكد أن كل شيء علي مايرام . وسأحكي لكم ما حدث معي.

*ذهبت يوم السبت الماضي 25/2/2013 لصيانة الألف كيلو وهي تغير الزيت وفلتر الزيت وكان لدي بعض الشكاوي مثل اهتزاز الدركسيون عند سرعة مائة.
*اخبروني انهم سيقوموا بتغير الزيت لزيت عشرة ألاف والفلتر وسيقوموا بعمل ترصيص للعجل.
*انتظرت حوالي أربع ساعات ( ولا أعلم لماذا هذه المدة الطويلة في تغير زيت وترصيص عجل) ثم أتي لي المهندس محمد جلال وأخبرني ان كل شيء علي ما يرام وسلمني مفتاح السيارة وأخبرني أنهم رصصوا العجل الأمامي فقط ولما قولتله طيب ليه مكملتش الإتنين الباقين قالي كل شيء كويس متقلقش).
*خرجت من التوكيل واتجهت للطريق الدائري للذهاب إلي صديق في منطقة صفط اللبن ( وندمت كتير إني رحت هناك وكانت أول وأخر مرة).
* وأنا أحاول الوصول لصديقي اضاءت لي لمبة الزيت فجأة
* بصراحة مخي وقف ومبقتش عارف اعمل ايه بس حظي جه امام كهربائي سيارات عنده مجموعة محلات في المنطقة ( بجد راجل ابن حلال ربنا يكرمه) لاقاني واقف لايص جالي وسألني فيه ايه قولتلهلمبة الزيت منورة وأنا لسه خارج من صيانة الألف قالي طيب نركن بس العربية ونهدا وانشاء الله خير وراح خلاني دخلت العربية في محل فاضي بتاعه بعيد عن الطريق.
*مفيش دقيقتين وبنبص علي العربية لقينا الزيت كله علي الأرض
*الراجل نزل تحت العربية وقالي دا مفيش طبة زيت يا أستاذ اصلا
*كانت الساعة تقريبا سبعة بالليل وحاولت أكلم أوتو ايجيبت لقيتهم مشيوا. فضلنا لايصين شوية وأنا مش عارف اعمل ايه فواقف في منطقة اول مرة انزلها والعربية عطلانة والتوكيل قفل يعني بصراحة كنت عاوز اقول كلمة اعتراضة كبيرة اوي الناس كلها عرفاها.
*شوية وجه للكهربائي واحد معاه بي ام بيصلح حاجة فلقانا واقفين لايصين المهم حكيناله فقالنا انا معايا نمرة م/محمد حسن في شركة مودرن موتورز تعالوا نكلمه.....قولتله ايوة بس العربية مكنتش عنده وهوا مش مسئول قالي يا سيدي نجرب يمكن يساعدنا.
*كلمته لقيته راجل ذوق وأخلاق عالية ( الراجل ده ربنا يكرمه بجد زي موقف جنبي وساعدني) وحكيتله القصة قالي طيب ابعد عن العربية خالص وانا هتصرف وراح قافل. بعديها بعشر دقايق كلمته قالي متقلقش خالص أنا كلمت الناس في أوتو ايجيبت وهما جايلك دلوقتي (بصراحة مكنتش مصدق)
* بعديها بحوالي خمس دقايق اتصل بيا مهندس اسماعيل من أوتو وقالي خير ايه اللي حصل حكيتله الموضوع الراجل طلع غاية في الذوق وطمني وقالي متقلقش احنا معاك وهنجيلك دلوقتي وفيه ونش هيجيلك يشيل العربية ويجيبها علي الشركة.
*بعديها بحوالي ربع ساعة كلمني الونش وطلع عين اللي جابوه لحد موصل للحتة اللي أنا فيها ( بصراحة أنا مكنتش عارف انا فين اصلا ولا هخرج من المكان ده ازاي).
*بعديها بحوالي ربع ساعة تاني لقيت المهندس اسماعيل بيكلمني وبيقولي ان فيه عربية خرجت بثلاث مهندسين من المركز وجايالي علشان يطمنوا علي العربية. ( بصراحة عجبني الموقف ده بالرغم من إني عارف ان هدفهم الرئيسي هوا التأكد اني معملتش حاجة في العربية وبلبسها فيهم )
*جالي المهندس اسماعيل والمهندس محمد الرفاعي ومهندس ثالث معرفش اسمه وبصراحة كانوا مجموعة في غاية الأدب والأخلاق والرقي في التعامل معايا.....بصوا علي العربية وحاولوا يطمنوني لأني بجد كنت مخضوض ان الموتور يكون حصله حاجة.
*حملنا العربية علي الونش والونش مشي واصر مهندس اسماعيل انه يوصلني لغاية بيتي او اقرب حته منه...( بصراحة أنا مصدقت لأني مكنتش عارف انا فين ولا هروح ازاي).
* وصلت البيت وبصراحة كنت مقتول نمت لغاية تاني يوم.
*تاني يوم الصبح علي الساعة 11 لقيت المهندس محمد بيكلمني وبيقولي العربية زي الفل واحنا حطينلها زيت وكشفنا عليها واتأكدنا من كفاءة الموتور وكل شيء تمام وتقدر حضرتك تيجي تستلم عربيتك في اي وقت.
*روحت لقيت العربية واقفة وزي الفل وعرفت ان م/ اسماعيل خرج بيها وجربها حوالي خمسة كيلو وان كله تمام.
*قابلت م/ محمد وقولت بالمرة اركب سينسور ركنة مادمت خلاص هناك وكده كده يوم الشغل بتاعي اتضرب وطلبت من م/ محمد يركبهولي قالي من عنيا بس الموضوع هياخد وقت علشان عربيتي مش واخده دور في الصيانة بس بصراحة الراجل متأخرش بس قالي هتقعد معانا لحد الساعة خمسة قولتله مفيش مشكلة.
* اقعدت وصليت ودردشت مع الناس وعلي الساعة اربعة ونص جالي المهندس محمد وقالي العربية خلصت وفعلا روحت لقيتها واقفة وراكب فيها السينسور بتاع الركنة وجربهولي ولقيت كله تمام.
*بسأل المهندس محمد عن سعر السينسور علشان اروح ادفعه في الخزانة ( أنا كنت عارف انه في حدود 450) لقيته بيقولي دي هدية صغيرة مننا بنعتذر بيها عن اللي حصلك بسببنا امبارح
*خرجت بالعربية وبصراحة كويسة بس لقيت مشكلة الترصيص زي مهيا

ودي كانت قصتي بالضبط اليومين اللي فاتوا.....كنت الأول متضايق من اوتو ايجيبت جدا بس بصراحة اسلوب ادارتهم للأزمة عجبني وخلاني مبقاش مضايق منهم.

في النهاية تحية خاصة للمهندس محمد حسن ( مودرن ايجيبت ) علي الإهتمام والأخلاق والإهتمام اللي لقيته منه ( الراجل كلمني حوالي ست مرات يطمن عليا وعلي اللي اتعمل معايا واخر مرة كانت امبارح بعد مخرجت من التوكيل)
وأيضا تحية خاصة للمجموعة اللي جاتلي ( م/ محمد & م/ اسماعيل والمهندس الثالث الذي لم أعرف اسمه علي تعاونهم واهتمامهم بيا واهتمامهم بسمعتهم وسمعة المكان اللي بيشتغلوا فيه.

طلب أخير لأوتو ايجيبت: الرجاء التأكد من مستوي الفنين وعمل مراحل رقابة جودة علي ما يتم بداخل المركز لأن الخطأ البشري لا يمكن تلافيه بنسبة 100% ولكن مراحل الجودة المتتالية تستطيع اكتشاف الخطأ وتلافيه ( وأنا هنا اتكلم بحكم مجال خبرتي كمدير جودة بشركة أوراسكوم)......والله الموفق