الموضوع: شارك برأيك ، هل تفوقت السيارات الكورية علي السيارات اليابانية؟

المشاركة الأصلية كتبت بواسطة seashark

شهد سوق السيارات المصري في الاعوام الثلاثة الاخيرة تفوقا ملحوظا و ملموسا للسيارات الكورية علي نظيرتها اليابانية حيث تطورت السيارات الكورية بمعدل تطور سريع جدا في العشر سنوات الاخيرة و كان هذا التفوق بفضل التصميمات الرائعة و تحديدا من شركتي كيا و هيونداي و شيفروليه و لنكن اكثر دقة ظهر هذا التفوق مع بداية انتاج شركة كيا للنسخة الجميلة كيا سيراتو بداية من اول اصدار لها عام ٢٠٠٥ و نهاية بموديل هذا العام و اصبح المشتري يفضل شراء السيارة الكورية حتي و ان كانت بنفس سعر السيارة اليابانية او حتي اغلي ثمنا

السيارات الكورية تتفوق بالفعل في رأيي علي اليابانية حيث انها تنتج سيارات في متناول يد جميع المستويات المادية بداية من هيونداي فيرنا و افيو و مرورا بالنترا و سيراتو و ريو و كروز و نهاية ب سبورتاج و اي اكس ٣٥ و كابتيفا و هذه هي الطرازات التي يتناولها الموضوع كونها الاكثر انتشارا و مبيعا في السوق المصري

في رأيي تتطور السيارات الكورية بنفس السرعة التي تتأخر بها السيارات اليابانية و التي خيبت امال جمهورها بتصميماتها المملة و الكلاسيكية جدا و اصبحت السيارة اليابانية لا تقدر علي مجاراة نظيرتها الكورية و فقدت ثقة ملاكها بها حيث نسمع يوميا ان شكرا تويوتا سحبت سياراتها لوجود عيوب بدواسة التسارع و ان شركة هوندا سحبت سياراتها بسبب مشكلة في المكابح.....

شركة ميتسوبيشي تنتج نفس موديل اللانسر منذ حوالي ثمانية اعوام و مع كل النجاح الذي حصده هذا الموديل الا انها فشلت في الاستمرار في المنافسة امام عمالقة السيارات الكورية

شركة تويوتا تنتج نفس الاصدار ايضا مع تغييرات طفيفة و شركة هوندا و التي اعشقها انا شخصيا مثلي مثل جميع الشباب و خاصة الموديل ٢٠٠٨ و الذي توقف انتاجه و عندما انتظرنا الموديل الجديد منها فوجئنا بسيارة صغيرة لا ترتقي لسعرها المبالغ فيه و اقل كثيرا جدا من موديلها السابق

و في نفس الوقت

اتحفتنا شركة هيونداي مؤخرا بالتحفة الفنية هيونداي النترا و التي نالت اعجاب و شكر كل من تملك هذه السيارة و كيا سيراتو و بنفس السعر يمكن للمستهلك شراء سيارة يابانية مثل كورولا او لانسر او مازدا و مع ذلك اصبح المستهلك المصري يتجه الي السيارة الكورية و هو ما يعكس تأخر واضح جدا في صناعة و تطور السيارات اليابانية حتي السيارات الفرنسية اصبحت لا مكان لها تقريبا في السوق المصري

الموضوع من تأليفي و اعذروني لو في اخطاء لغوية او انشائية

أنا مختلف مع حضرتك تماما
وانا رأيى تغير عنوان الموضوع وتخليه ( هل تفوقت السيارات الصينية على السيارات الكورية !)

العربيات الكورى زى ما حضرتك قلت تمنها غالى مش رخيص على شكل مش هو دا الشكل العالى قوى يعنى
لانسر شارك أحسن من أى عربية كورى نزلت كشكل

ولو العربيات الكورى شكلها حلو ....سعرها غالى قوى على الفاضى

عربيات سمعتها .... الخفة وعدم الثبات .... يبقى أزاى تنافس وهى أساسا فاقدة أهم شئ

انا معاك ان فيه عربيات يابانى شكلها مش طبيعى أبدا زى أشكال دايهاتسو وزى صنى القديمة والجديدة ودى العربيات اللى أنا أفضل فيها الإلنترا أو السيراتو
لكن غير كدا لأ

وعربيات دايو أو شيفورليه مش زى هيونداى وكيا أبدا

المشاركة الأصلية كتبت بواسطة SAMEH_FOUAD

قبل مانتكلم عن السيارات , ومميزاتها نتكلم عن مدى مفهوم الشعب المصرى عن السيارات وعن مدى المفهوم دة , بيحددوا الاختيار

الشعب المصرى او علشان يصح القول 70% منهم تفكيرة عن السيارات يتلخص فى الاتى والاولوية بالترتيب

1- الشكل : ودة اهم شىء لدى المستهلك المصرى

2- الاوبشن : لازم العربية يكون فيها اوبشن كتيييييييير عشان تعجب

3- الوسع والارتفاع : لازم العربية تكون واسعة وعالية عن الارض عشان لما يحط العائلة فى السيارة تستوعب الناس دية كلها

4- لو خيروة مابين فتحة السقف وال Abs صدقنى كتييييييييييير اوى منهم هيفضل فتحة السقف

عايزين بقى تلاقوا الدليل على كلامى : اكيد كلنا بنروح معارض السيارات , وشوف الناس وهية قاعدة جنبك وعمالة تختار السيارة المناسبة , والكلام الوحيد اللى بيتقال ( انتى قاعدة مستريحة كدة - انا هرجع الكرسى على الاخر - صوت السماعات كويس - التابلوة شكلة شيك - فية اوبشن حلوة - وفية مخدع متحرك ونور - ومرايا ) خلاص توكلنا على الله ونحجزها

اية دة ياعم : هو انت كدة بتشترى عربية ولا بتشترى انترية

ولا بقى لية دعوة ماتورها بيخرج كام حصان - ولا العربية ثابتة على سرعة كام - الخ.............)

- ومن هنا بقى الكورى بدأ يلعب لعبتة , قالك بس الشعب دة تعبان تعب السنين وعارفين هو اخرة اية

نزلة ياعم الشكل الجامد واوبشن كتييييييير بسعر اول فئة من اى عربية يابانى , بس كدة احنا هنخسر يابرنس نعمل اية طيب هقولك تعمل اية

( شيل العفشة ال multi link وحط torsion beam - خلى الكاوتش كورى ولا صينى تعبان - خفف على قد ماتقدر من صاج العربية - خامات عادية مش غالية - اعملى تقفيل عادى على قد فلوسهم ياعم - شيلى وسائل الامان كلها وخليها بس فى ال high line ومش كلها كماااااااان محدش هيسأل عنها - هما بيحبوا السرعة الوهمية قولهم دة ماتور بيطلع فوق ال125 حصان وهما هيصدقوا وماتقلقش مش هيعرفوا اصلا عشان هيخافوا يجروا بالعربية عشان ثباتها هيقل بعد ال 140 كم

- ياباشا العربية مافيهاش immoblaizer وتمنها معدى ال140 الف جنية , مش مشكلة يامان نزلها كدة ولو المجموعة كلها ماتباعتش ابقى قول عليا مابفهمش , وفعلا بعد نزول العربية بكام يوم فى التوكيل او المعرض كل السيارات اتباعت , مش قولتلك يابرنس هتتباع , الشعب دة جامد مش بيهمة بيشترى اى حاجة حتى لو ب200 الف جنية هيشترى

دة اللى بيحصل بالظبط فى السيارات الكورى

عشان كدة منتشرة , والسيارات بتتحجز قبل حتى محد يجربها او يعرف عنها حاجة لمجرد شافوا الشكل فى الصور على النت بس هية دية , عربية جاااااااااااامد جدااااااااااااااا

معلش انا بس قولت اللى بيحصل على شكل حوار , لان بجد دة اللى بيحصل قدامى

ومش هنسى ابدا لما كنت فى الجامعة وكانت لسة المرسيدس e200 موديل 2005 نازلة , وراكنة فى باركينج الجامعة , واحنا بقى طلبة مبهورين بيها وانا ببص عليها من جوة وبشرح لاصدقائى وظائف كل حاجة لانى غاوى الحاجات دية من زماان , والاقى دكتور المادة بتاعتى بيقولى انت بتبص علي اية , قولتلة على الزراير , قالى رد جامد جداااااا , اذا كان انا نفسى معرفش الزراير دية بتاعة اية , انا بسوقها بالعافية اصلا , قولت فى بالى سبحان الله امال جايبها لية وانت متعرفش قيمتها

مؤيد لكلامك