عملت حادث بالسيتروين بتاعتي أرجو النصيحة

**ashraflotfy1** · 21-06-2013 12:28 AM

السلام عليكم يا شباب نايل موتورز
اليوم عملت حادث بالسيتروين سي4 بتاعتي و خبطت فى تاكسي فيرنا و العجيب انه لم يصب بخدش فى حين عربيتي اتظبطت.
اللى حصل ان الكبوت و الشبكة الأمامية و الصدر و الفانوس الأمامي شمال و الرفرف و الاكصدام اتبهدلوا خصوصا الكبوت و باقى الحاجات ممكن تتصلح.
المهم مين يفيدنى فى واحد نظيف و أمين و يرجع العربية تانى زى ما كانت لأنها كانت بحالة الفابريكة و عاوزها ترجع تانى باذن الله و يا ريت أسعار القطع المصابة بالسيارة دي تتكلف كام و الدوكو و المصنعية
العربية سي4 موديل 2006
الحمد لله مفيش مشكلة طالت السربنتينة أو الرادياتير أو الموتور و قدر الله و ما شاء فعل
أشكركم و منتظر الردود
أخوكم أشرف لطفى

**pido132** · 21-06-2013 01:10 AM

بص يا باشا فى سمكريه كتير فى الحرفيين نضاف
اما عن قطع الغيار فا ان شاء الله بوكره بعد الصلاه هكتبهم ليك بس انت اكتبلى قطع الغيار الى انت عاوزها وان شاء الله ربنا يقدرنى واساعدك والف حمد لله على سلامتك

**el diesel** · 21-06-2013 01:20 AM

ألف سلامة عليك وفداك اى حاجة وان شاء الله شباب السيتروين يظبطوا معاك أسعار الحاجات اللى باظت

**aldesha989** · 21-06-2013 01:28 AM

قدر الله وما شاء فعل والله يخلف عليك

**SERGIOOO90** · 21-06-2013 01:39 AM

قدر الله و ماشاء فعل ,, قل اللهم آجرني في مصيبتي و اخلف لي خير منها و ربنا يعوضك و إن شاء الله تبعد عنك حاجة اوحش عموما كله يتصلح و أهم حاجة إنتا , و الشباب يساعدوك في موضوع قطع الغيار و أي خدمة

**buddha** · 21-06-2013 01:44 AM

الله يعوض عليك
والف سلامة

اتصل باستاذ كريم منير
وهو هيخلصلك العربية على المفتاح إن شاء الله.... ولا تتعب نفسك خالص

**Ahmed Amin** · 21-06-2013 01:59 AM

حمدلله علي سلامتك,
وقبل ما تشتري الحاجات دي, أنا كنت عامل حادثة زي بتاعتك.
ولما جيت أجيب الحاجة جديدة خصوصاً الأكصدام كان غالي وكان من غير الشبكة لسه ولا الفوجات.
يعني كنت لسه هجيبهم وأركبهم عليه وأرشهم.
ناس نصحتني أنزل وكالة البلح, وهيا فيها قطع غيار أكتر من الحرفين ومش متعبين زيهم ومعظم قطع الغيار هناك أستيراد من عربيات متقطعة أو عربيات عاملة حوادث توتال لوس وبياخدوا منها السليم فيها,

جبت الاكصدام من هناك والرفرف الأتنين بنص سعر الاكصدام الجديد واللي كان أسباني كمان مش أصلي,
لأن الصيني كان عره أووي.
وكان عندي فانوس مكسور, لاقيت حاجات برضة بس كانت قواعدها مكسورة وهما لاحمينها أي كلام كدا, وكان بنص تمن الجديد, دي أبعد عنها, لأن اللي قاعدت ملحومة دا ممكن يتكسر تاني من المطبات الكتير وهيبقي مش مريح في السواقة..

في فوانيس أسمها ديبو مالية السوق, نوعها تايواني تقريباً بتعمل نفس الفوانيس الاصلي وبيبقي أخوه بالظبط, بس عيبة أنة لما جيت اشتريه مكنش فيه الماتور اللي بيعلي ويوطي النور, فعشان كدا مجبتوش,
وفضلت أدور لحد ما لاقيت فانوس كويس وجبته وركبته.

فنصحيتي ليك أنزل بنفسك بص بصة هناك ولف, وإن شاء الله تلاقي كل اللي أنت محتاجة

**Mohab.Nabil** · 21-06-2013 02:56 AM

قدر الله و ماشاء فعل و الحمد لله جت بسيطة

ممكن تكلم بشمهندس ايهاب جلال يشوفلك قطع الغيار بأسعار كويسة او تشوفها فى التوفيقية و تروح ورشة استاذ كريم منير فى الحرفيين يخلصلك العربية سمكرة و دوكو وترجع احسن من الاول كمان ان شاء الله

**hamaka** · 21-06-2013 03:20 PM

بص يا باشا ، أولاً حمد الله على سلامتك ، فداك 100 عربية المهم ان انت كويس

ثانياً بقى ، دى أسعار للحاجات اللى اتخبطت عندك من أمير و جوزيف اللى هو مركز معتمد من التوكيل يعنى زيه تقريباً فى الجودة ، طبعاً بره الأسعار أرخص و لو جبت استيراد هيبقى أرخص و أرخص....

الكبوت :1500
الاكصدام: 1000 بس فاضى من غير حاجة خالص (ولا فوجات ولا شبكة)
الفوج لايت: 350
الفانوس الأمامى كامل بالموتور بتاع رفع مستوى النور: 1500

الراجل بتاع خدمة العملاء فى أمير و جوزيف قاللى ان عز العرب هيبقى أغلى من كده عشان بيجيب الحاجة بال Part number على رقم شاسيه العربية يعنى بتبقى القطعة الفبريكة بتاعة المصنع ، طبعاً احنا عايزين نلم الليلة فا مفيش مجال لعز العرب خالص دلوقتى...

الكبوت طبعاً بيبقى أسود و بيترش حسب لون عربيتك

فا زى ما بقولك لا ينصح بالتوكيل خالص فى حالة اصلاح تلفيات الحوادث نظراً لارتفاع التكلفة مقارنة ببره بدون فارق يذكر فى الشكل لو عملتها عند حد نضيف ، بس برضه لما تبقى عارف الأسعار عامله ازاى هترتاح و انت بتدور بره أو لو جبت استيراد اللى أنا بنصحك بيه بشدة عن تجربة ناس صحابى....و ربنا معاك ان شاء الله و يعوضك و يحميك و يحمينا جميعاً من الحوادث و العين....

-

الموضوع: عملت حادث بالسيتروين بتاعتي أرجو النصيحة

LinkBack

أدوات الموضوع

عرض

عملت حادث بالسيتروين بتاعتي أرجو النصيحة - انشر الموضوع فى :

-

-

-

-

المواضيع المتشابهه

عملت حادث أليم جدا بالكورولا بتاعتي +صور الحادث

عملت حاددثه بالجولف 4 بتاعتي...ارجو المساعده؟

عملت حادث , والحمد لله على كل شئ

عملت حادث بس الحمد لله على كل شىء

انا كمان عملت صينة 1000 كم للصني بتاعتي امبارح برضه

الكلمات الدلالية لهذا الموضوع

المفضلات

المفضلات

ضوابط المشاركة