الموضوع: الحمد لله العربيه جابت وش سليندر :)

المشاركة الأصلية كتبت بواسطة SAMEH_FOUAD

اية ياجماعة انتوا مكبرين الموضوع كدة لية , الموضوع بسيط وتافهة جدااااااااااا , طالما اتلحق فى الاول

شوف ياباشا مبدأيا كدة عشان الدنيا تمشى معاك تمام وماترجعش تعملة تانى او يضرب بعد فترة قليلة هتعمل الاتى :

1- هيتم فك المحرك وهو بارد تماما

2- الميكانيكى هياخد وش السلندر ويروح بية للخراط

3- الخراط هيقيس الوش كويس ويشوف هل فية عالى وواطى ولا لأ

4- لو بإذن الله مالاقش فية اى عالى واطى , يبقى يسنفر الوش ( مسح كدة بالفرشة عشان يشيل اى اثر للجوان القديم ) ويبص بردة بصة كدة على البلوكة وشكرا
- اما لو لا قدر الله الوش فية تقفيع ( عالى وواطى ) يبقى يتغير بواحد استيراد فابريكة وقبل مايركب بردة يعدى على الخراط يتسنفر ويتمم علية

5- بعد التأكد من سلامة المكونات , يبقى لازم تعرف هل الجوان كان ضارب من ناحية مجرى الزيت ولا المياة

لان لو ضارب من ناحية المياة مافيش مشكلة خالص , اما لو كان ضارب من ناحية الزيت فكدة انت هتضطر تفك كارتيرة الزيت تتنظف + الريدياتير + طلمبة الزيت + المصفاة +كوعة المياة + طلمبة المياة + ثرموستات المروحة يتم سنفرتها الخراطيم , وطبعا تغير الزيت والفلتر

6- بعد عمل كل السابق ذكرة , يبقى لازم تشترى طقم مسامير جوان وش سلندر لان المسامير القديمة فقدت صلابتها نتيجة التعرض للحرارة المرتفعة عن الحد المسموح بية

7- يتم تركيب الجوان وربط المسامير بداية من الداخل الى الخارج

8- هتزود المياة بتاعتك , وتخرج الهواء من دائرة التبريد , وتسيبها دائرة لمدة ساعة بدون تحرك

9- هتشمى بالعربية طبيعى بس بدون قرص يعنى تسيب المحرك ياخد راحتة

10 - هتيجى للميكانيكى بعد عمل 500 كم او اسبوع , ويتم تربيط مسامير وش السلندر مرة اخرى

وبعد كدة شكرا مافيش اى مشاكل ان شاء الله تواجهك

تكلفة المصنعية بتكون فى حدود 300 جنية- 350 جنية

لو شغل خراط بس هتاخد العربية فى نفس اليوم لو جيبتهالة الصبح

لكن لو شغل تغير وش السلندر هتاخدها بعديها بيومين