السلام عليكم ورحمة الله وبركاته
النهارده شفت فيديو على موقوع youtube حاجه فى منتهى قلة الادب والقذاره والسفاله
وطبعا مش هاقدر احطلكو اللينك بتاعو عشان مليان الفاظ قذره
الفيديو مش جايب القصه من اولها
بس الموضوع ان شاب وبنت كل واحد بعربيته فى شارع فيصل بالنهار
والبنت تقريبا خبطتله عربيتو وبتقول انها اديتلو فلوس عشان يصلحها قام شتمها وبلطج عليها
الله اعلم اذا كان الكلام ده حصل ولا لأ عشان الصراحه البنت شكلها صايعه ومش هاممها حاجه وعماله تشتم والواد شكله محترم
قامت مطلعه العصا الكهربائيه دى وبتهدده قدام كل الناس عادى كدا وبتقوله يلا اركب عربيتك وامشى
المهم الموضوع كبر وقالتله انا واقفالك مش هامشى وانت كمان لو راجل و ....... خليك واقف
قامت مطلعه موبايلها وبتكلم واحد وبتقوله ابعتلى ظابط دلوقتى على شارع فيصل عشان واحد ..... خبطته واديته فلوس ومش عاجبه وقامت قايله للشاب على فكره ده ابويا وعميد فى مديرية امن الجيزه وهييجى يطلع ......... وكمية شتايم مهوله حتى انها ( استغفر الله العظيم ) سبته بربه
كل ده ادام الناس عادى جدا وكله واقف يتفرج فى شارع فيصل فى عز الظهر
الصراحه الفيديو ده استفزنى جدا ومش عارف بجد امتى هاتنتهى الحاجات دى