الالتفاف للخلف (U turn) نظرة هندسيه

**fakoussa** · 28-08-2008 11:11 AM

موضوع جميل فعلا . و بالمناسبة مصر برضه هى الدولة الوحيدة اللى فيها اليو تيرن الفاشل دا . اللى مايخليش اى حد يعرف يعدى الشارع على رجليه دا غير بعده عن الشارع المراد الدخول اليه و ايضا عمل اليو تيرن من ناحية واحدة فقط و ليس من الجهتين مما يؤدى الى الدول بالعكس برضه فى اليو تيرن .
اما بالنسبة لتخطيط المدن الجديدة فهو سئ سئ الى اقصى درجة و خاصة فى القاهرة الجديدة و التى ستتحول الى القاهرة القديمة قريبا جدا .

سوء التخطيط و سوء الادارة هو مصر

**Dr. Elsaadani** · 28-08-2008 11:34 AM

متاسف لاختلافى معاكم كلكم
انا من الاسكندرية
لو حد مر من اى يوتيرن فى البلد حيلاقى ان فيه استاندات حديد عالية حمراء متركبة علشان تبعد القادم فى اتجاهك الجديد لمسافة محترمة لحد اما تدخل معاهم فى اتجاهك اللى داخل فيه

اعتقد ان اى حد مشى داخل الاسكندرية اخذ باله

اهم بيحاولوا يعملوا اللى عليهم شوية شوية وباذن الله حنبقى فى يوم من الايام زى الدول المتقدمة اللى عاملة حارة مخصوصة داخلية للقادم من اليوتيرن

هو حياخذذذذذذذذذذذذذذذذذذذذذ ذذذذذذذذذذ وقت طويل شوية بس باذن الله حنوصل

**marsguy** · 28-08-2008 04:56 PM

أحب أضيف إضافه

يا ريت لو كمان نعمل للحاره التاته دية رصيف يحدها ونخلي طول الحاره بالرصيف مثلاً 30 متر وده هايخلي اللي يعرف يحود هو بس اللي في الحاره المحدده بالرصيف، عشان اللي عاوز يحود لازم غصباً عنه وعن اللي علمه السواقه إنه يخش الحاره دية من بدري حتى لو كانت ماشيه بالراحه أو واقفه، عشان اللي بيحصل هو إن الجماعه الأعضاء في حزب الفهلوه والنصاحه المتناهيه بيفضلوا ماشيين على اليمين أو في النص وأول ما يوصلوا اليوترن يروح رامي شمال من غير أما يبص ويفترض إن الشارع كله متبع خطواته وهايخش شمال معاه.

ممكن يكون ده إختراع مالوش أي أساس من الصحه بس متلائم مع البيئه المصريه، زي إختراع الأبواب الحديدية اللي بتمنع الناس إنهم يعدوا شارع رمسيس اللي عند جامع الفتح.

**TAREK ZIAD** · 28-08-2008 09:24 PM

تسلم إيدك على الشرح و الصور .... طبعا لازم يكون عرض الجزيرة الوسطى عريض بما يكفى لتحقيق السيولة المطلوبة لليو ترن ...و إلا تحولت الى مصيدة للحوادث كما هو الحال فى مصر ...
للأسف ... كما هو العادة فى بلدنا كلها ... لا يوجد أى تخطيط ...سواء قصير الأجل أو بعيد ... كله عشوائى عشوائى ...
مين يصق إن المنطقة خلف النادى الأهلى بمدينة نصر ... التى كانت حتى وقت قريب جدا صحراء جرداء ... لا أعرف كيف تم تخطيط المهزلة الموجودة حاليا ... يعنى فى الصحرا و مش عارفين يعملوا شوارع محترمة ...
و اليو ترن بطريق السويس للمتجه الى مصر الجديدة .... مأساه أخرى من مأسى العشوائية ... يعنى لو معسكر الجيش تمت إزاحته لمسافة 10 أمتار فقط يمكن عمل حل بدل التخلف الحالى ...

للأسف ... مصر عاملة زى واحد لابس قميص قديم كل ما يتقطع يرقع مكان القطع لما بقت كلها رقع شئ مؤسف...

**ENG\AHMED** · 29-08-2008 12:14 PM

المشاركة الأصلية كتبت بواسطة casber

عيوب نظام افتقد اهم عنصرين اساسين للتقدم
عدم القدرة على التخطيط للمستقبل لشتى المجالات
عدم القدرة فى حل المشاكل بشكل جذرى وعلمى وازاله كافه المعوقات

ده غير طبعا الفساد واثاره

المشكلة انهم هنا بيعالجوا الاعراض مش اصل المشكلة يعنى عندك مثلا تقاطع عامل مشكلة بدل ميدرسوا الاسباب ويحلوها لأ يلغوا التقاطع ويعملو U بعد 2 متر يبقى هو كدة خلاص حل مشكلة التقاطع ونقل المشكلة لمشكلة العن عن ال U نتيجة الضغط الزيادة على الشارع

واحد قال كلمة عجبتنى اوى كنا بنتكلم عن الصناعة عندنا ومدى التقدم اللى احنا فية!! قال احنا لسة بنفكر نزرع القمح ولا لأ فقدامنا كتيييير اوى عبال لما نتكلم فى المواضيع دى !!!

**Chicco** · 30-08-2008 02:14 AM

ألف شكر يا باشمهندس ..الشرح و الصور في قمة الأحتراف ..السهل الممتنع

المشكلة إن تصميم ال-u turn في القاهرة وليد اللحظة ...يعني الشارع ما كانش معمول حساب ال-u-turn فيه و بعدين تفتق ذهن احدهم إنه يلغي تقاطع و يعمل u-turn بداله ...و هوب كسر يا جدع في الرصيف و النتيجة تلاقي نفسك عشان تلف لازم تبقي في عرض الشارع المقابل حتى لو التزمت باقصي اليسار

**boty50** · 26-10-2008 04:08 PM

العجيب هنا بالكويت أن احسن ناس بتخطط طرق
هم مصريين بأدارة المرور أو وزارة الأشغال

شوف مثلا كورنيش الأسكندريه واللفات اللي فيه
تلاقي بداية اليو تيرن تسع ٢ سياره ولكن في
منتصفها بقدرة قادر تلاقيها صفصفت علي
حاره واحده للي يلحق
وده علشان انك لا يمكن تلفها في حارتك بدون
ما تدخل في الحاره الي جنبك
(يو تيرن الشاطبي مثلا)

طبعا دا غير انك تكون ماشي في أمان الله
وتلاقي نفسك ولا بيك ولا عليك داخل في
يو تيرن بكل بساطه

**MoToRiZeR** · 26-10-2008 04:16 PM

الله ينور عليك موضوع و شرح ممتاز
انا بتشل و انا باخد أي يو تيرن علي ما حد يتكرم و يقفلي أعدي لأن لااازم أخش في الحارة الشمال "السريعة" .. إلي جانب الناس اللي بتيجي تلف من جنبي و تكسر و تلاقي 3 و 4 بيلفوا مع بعض .. شوارع مسخرة و الله

خطأ أخر بيضايقني وهي عندما ينقسم الطريق لإتنين واحد بطئ و واحد سريع زي عالمحور مثلاَ .. المفروض جوة الطريق البطئ قبل الفتحة يكون فيه مطب عشان متخشش بسرعتك عالناس اللي داخلة من الفتحة و تلبسوا في بعض .. خاصة إن و إنت داخل بسرعتك من الفتحة بزاوية بيبقي الطريق اللي إنت داخل فيه كله blind spot في المراية فا مفيش حل غير إن اللي وراك يهدي .. مش معمولة غير في فتحة واحدة يتيمة في إتجاه من أكتوبر إلي الحي المتميز .

المشاركة الأصلية كتبت بواسطة boty50

العجيب هنا بالكويت أن احسن ناس بتخطط طرق
هم مصريين بأدارة المرور أو وزارة الأشغال

بالعكس ده شئ لا يدعو للعجب .. إذا عشت في مصر بسهولة جداَ تقدر تخطط الطرق .. ببساطة هتشوف في إيه معمول في مصر و متعملوش :k37:

**Mystique** · 26-10-2008 08:27 PM

موضوع شيق جدا والرسومات ممتازة فعلا..

أنا مع كل الملاحظات اللي اتقالت من الأعضاء الأفاضل اللي قبلي وهضيف عليهم كمان حاجة عملوها جديد عندنا ف أسيوط..المفروض انها شكل جمالي أو لزيادة السيولة المرورية..صحيح هي ليها بعض المزايا بس للأسف ف أحيان كتيرة بتؤدي للعكس.

الشوارع عندنا معظمها قسموها اتجاهين وعملوا كل 200 او 500 متر U-turn

الشوارع أصلا ضيقة ولما اتعملت من 40 ولا 50 سنة مكانتش مصممة لكدة خالص..فالملف لا يمكن بأي حال من الأحوال يتاخد وانت ماشي أقصى الشمال..لو عملت كدة لازم ترجع بضهرك وتظبط تاني..وساعات لما بيبقى في عربيات راكنة صف تاني أو أول حتى وطالع عن الرصيف سنة..بيخللي الواحد يرجع كذا مرة عشان يظبط نفسه..وف الحالة دي بيقفل الشارع اللي رايح واللي جاي..ومين بقى اللي يستنى..؟؟

الطريقة الأخرى انك تاخد يمين خالص وتاخد الملف على واسع عشان يادوب تعدي من غير ما تجيب مارشيدير..وبرضه بتواجهك نفس العطلة..انك غالبا بتفضل واقف يمين وبتكون قفلت حارة من الاتنين اللي رايحين..والناس تبتدي تتكدس وراك وعايزة تطلع منك..وانت مستني اللي جايين على شمالك لما يخلصوا..وبرضه المقابل وتكبس وتحشر وش العربية عشان تعدي.. وبكدة وانت واخد الملف من اقصى اليمين هتقفل الشارع من الناحيتين برضه وانت بتلف.

بستغرب فعلا من التخطيط ده.

**madoo** · 26-10-2008 08:50 PM

استاذذذذذذذذذذذذذذذذ كبيرررررررررررررررررررررر رررررر

بس انا نفسى اعرف بجد حكايه الطرق فى الاماكن الواسعه والجديدة ليه مش بيعملوا جساب الزمن والزيادة فى اعداد الناس والسيارات

كمان انا لاحظت ان فى طريق القاهرة السويس الصحراوى عاملين جزيره كبيرة اوى ممكن تكفى انهم يزودا حارتين فى كل اتجاه . ومش مستغالينها ابدا