الموضوع: تقرير عى byd f0 بعد 20 الف كيلومتر

احب اشارك تجربتي مع السيارة byd f0 بعد استخدام 10 شهور و قطع مسافة 20 الف كيلومتر.

عربية فوق الممتازة من حيث الاداء و الشكل و الاعتمادية , الله اكبر عليها , ثبات على الطريق ومش بتعبي هواء او بتعوم على السرعات العالية وده بسبب التصميم المسروق من تويوتا ايجو و مميزاته مثل وجود حاجز هواء تحت الاكصدام الامامي و كذلك العفشة الرياضية , تكييف محترم جدا لسيارة 1000cc و شكل شيك وواسعه من جوه و موفره للبنزين و لو مركب فيها اربع افراد و انت الخامس مش هتحك معاك من تحت.

انا متعود اربط عفشه في كل مره اغير فيها زيت و الله اكبر مفيش مره لقيت مسمار مهوي او محتاج تقريط.

تقفيل صيني و خامات ممتازه و شياكه من جوه او بره , كاسيت و سماعات محترمه.

سعة التانك 30 لتر و بتعمل 300 ك في الصفيحة.

في ملحوظه في مؤشر البنزين, هو مكون من ستة شرط او تدريجات, اول شرطه تساوي 10 لتر, الشرطه الثانيه و الثالثة تساوي 10 لتر, اخر 3 شرط تساوي 10 لتر , يعنى لو المؤشر على النص (3 شرط) يبقى فاضل في التانك 10 لتر ... روح فول يا استاذ :)

مفتاح بصمه و ده انفراد في الفئة بتاعتها, بتيجي بمفتاح كارت و مفتاح ريموت, انا بستخدم الكارت و حاطه في المحفظه و بفتح الباب من الزرار الخارجي و الحياه سهله جدا من غير ميدالية مفاتيح.

لحد دلوقتي مشفتش منها غير المشاكل دي:
- عضه رهيبه في الفتيس ظهرت بعد 10000 ك و دي اتحلت في خمس دقائق بعد عمل رجلشه لماستر الدبرياج.
- صفاره دائمه في التيل الامامي بعد اول 3000 كم و بعد الكشف طلع ناشف و غيرته و المشكله انتهت.
- موضوع الشباك الشراعه اللي وره مش فارق معايا و لا مضايقني و لاحد ركب معايا اشتكى منه, و خصوصا ان التكييف ممتاز و لو حتى فتحت الشباكين اللي قدام اللي قاعد ورا هيطير من الهوا.
- لازم تربط حزام الامان و الا هتعيش مع صفارة انذار الحزام طول ما انت سايق, علشان كده اربط حزامك على طول و ده شخصيا شايفه ميزه مش عيب.
- التنك و الشنطه نظام مفتاح مش فتح من الداخل.
- مقاس الكاوتش الاصلى مش مسبب معايا اي مشكله و مش محتاج اعرض او اكبر.
- العفشة ناشفه شويه (رياضيه) و ده برضه شايفه ميزه لانه بيحقق ثبات ممتاز.
- قطع الغيار متوفره في التوكيل و مفكرتش ادور عليها بره - بعض الاسعار:

فلتر بنزين 38.50 جنيه وهو نفس بتاع ال f3
فلتر زيت 27.50 جنيه وموجود بره ارخص شويه
فلتر هواء 19.80 جنيه
تيل فرامل امامي 121 جنيه
طقم بوجيهات (3 بوجيه) 66 جنيه و ده يعتبر غالي شويه

غالبا محتاج باب و عتب شمال جديد و دول لسه مسألتش على سعرهم لان واحد محترم بموتوسيكل دخل فيهم و الحمد لله ربنا قدر و لطف.

وان شاء الله معاكم اول بأول بالجديد

المشاركة الأصلية كتبت بواسطة ahmed_lada

اولا اشكرك على التقرير الممتاز ده
انا كمان عندى السيارة دى وهى زى ما بتقول عنها كده لكن انا بالنسبالى لسه شاريها ولسه عاملة لحد دلوقتى 400 كيلو فقط
وبالنسبة للدهان زى مانت بتقول ودى مشكلة مضايقانى اوى
يا ريت تنصحنى وتقولى اعمل ايه بالنسبة لمشكلة الخدوش ديه لانها فعلا عاملة خطوط بيضاء ومضايقانى اوى

الحل يا استاذ احمد انك ترشها رشه محترمه. و محدش طبعا هيعمل كده في عربية زيرو.
انا شخصيا هستنى لحد ما يكون شكلها مش مقبول و بعدين ارشها.