الموضوع: ليه التويوتا مش بتنزل العفشه بتاعتها تورشن بييم مش مالتى لينك؟؟

كلامى غلط يا سيدى ومعلش لو جه كلامى على قلبك وجرح مشاعرك الحساسه

الى انتا شايفه انى كلامى غلط

بس ركز فى كلامى وركز فى الى قولته وماتتسرعش فى الرد

انا بقول طرق مصر التورشن احسن ليها
ليه ؟؟؟

التورشن عباره عن عمود واصل بين العجله اليمين والشمال
يعنى العفشه الخلفيه ملهاش مقصات زى المالتى لينك

ودا معناها ان العجلتين الخلفيتين محمله على 2 مساعد و 2 سوسته
ودا معناه برضو ان العجله اليمين لو اخدت مطب هتاثر على العجله الشمال بنفس المقدار

يبقى لما المطب يخبط فى العجلتين ايه الى يحصل هتحس فيه بالعربيه اكتر
يعنى التورشن دا مش مريح طبعا ومقرف فى المسافات

انما ليه هوا ينفع لمصر ؟؟
لان معظم المطبات عندنا جبليه وذات معالم بريه والطرق عندنا غير ممهده للاستهلاك الادمى

فاى مطب هييجى فى العجل هيرفع العربيه كلها واى نقره هتيجى فى العجل هترفع العربيه كلها
كما ان صيانه التورشن بيم تقريبا معدومه لعدم وجود جلب مقصات وزوايا واتزان وكلام كتير

يعنى تكلفتها فى الصيانه صفر الا لقدر الله حصل حادثه يعنى لما هروح اظبط زاويا هدفع نص الفلوس الى بيدفعه واحد معاه لانسر سوبر اكشن
فاذا استحمال التورشن على الطرق اكتر من المالتى لينك

يبقى الخلاصه ليه تورشن ومش مالتى لينك
1-علشان طرق مصر الجميله
2-علشان اوفر فى الفلوس
3- علشان لما احمل على العربيه ماتنزلش اوى
4-معظم التورشن ارتفاع عربياته اكتر من المالتى لينك


طيب نيجى للمالتى لينك
المالتى لينك معناه العجل اليمين منفصل تماما عن الشمال وكل واحد متصل بمقص منفصل

ودا هيدى عندك هدوء اكتر فى القياده وثبات اكتر لان اى مطب او حفره جت على العجله اليمين مش هتاثر على الشمال
ودا هيدى ثبات اكتر علشان المقصات ليها زوايا يعنى مع تغير الحمل المقصات بتتغير زواياها على حسب التصمييم

فدا بيزودا الثبات والسرعات العاليه

طيب يبقى العربيات الغاليه الى الناس بتقول عليها ثابته على الطريق وسريعه واتزانها حلو وهاديه كل دا هتلاقيها مالتى لينك ودا بيختلف طبعا العفشه الرياضيه عن المش رياضيه

لكن بيعيبها ان المالتى بيحتاج صيانه كتير ظبط زوايا وتغيير جلب مقصات كل فتره
دا غير ان لقدر الله المقص حصله حاجه بتغيره لو اخدت مطب جامد او حفره واتعوج منك

يبقى انا اجيب ليه مالتى لينك وما اجيبش التورشن
1- ثبات اكتر
2-هدوء اكتر
3-راحه اكتر وسرعه اكبر


علشان كدا هتلاقى معظم العربيات الغاليه مالتى لينك
ومعظم العربيات حماله الاسيه تورشن بيم

مثال على التورشن ( اى 4x4 تورشن بيم - تويوتا هايلوكس - برادو - جيب - لادا - بعض انواع الفيات - الشاهين - الياريس علشان المنتدى هنا - اوبل كورسا علشان ما تزعلش - الخ)



وعلى فكره التورشن بيم اتلغت خلاص فى الصناعه فى العفشه الاماميه فى اى عربيه دلوقتى مالتى لينك امامى

كلامى كله على العفشه الخلفيه

ودا كله علشان يزودوا الثبات فى القياده مع تغير الاحمال لان التورشن بيم اثبت فشله امامى لسوء التوجيه والملفات والاحمال

انما خلفى فهو ممتاز للطرق الوعره


وكلام كتييييييييييير عن الزوايا عايز اقوله

بس انا بعشق التكنولوجيا والتعقيد وبالنسبالى المالتى لينك فيه كل الهندسه والاتزان واللعب كله فيه انما البيم غبى مافيهوش ابداع

واختلاف كل عربيه عن التانيه فى الغلاء فى تصميم المالتى لينك

عرفت ليه بقى انا بقول الفرافير بيحبوا المالتى لينك مش تجريح والله انا معايا اوكتافيا واكيد انتا عارف انها مالتى لينك بس اكيد مش بعاملها معامله العبيد زى الياريس

وعلشان كلمه انا مش فاهم

فاعرفك بنفسى المهندس عاصم جاد
متخرج من هندسه المنصوره قسم ميكانيكا قوى بتقدير جيد جدا مرتبه شرف
اتدربت فى تويوتا العباسيه والعبور ومرسيدس الاسكندريه الزراعى و مراكز خدمه كتير
وبشتغل دلوقتى مهندس تحليه مياه فى خليج العقبه

والدى استاذ دكتور فى هندسه قسم ميكانيكا قوى واسمه د/حلمى جاد لو مش مصدق اعمل سيرش على جوجل

وعامل كتاب من 600 صفحه عن تكنولوجيا السيارات اسمه ماذا تفعل اذا توقفت سيارتك فى الطريق

فيه شرح مفصل عن كل قطعه فى السياره وجميع الاحتمالات الى ممكن تحصلك لو عطلت بيك العربيه فى الطريق

وباب الزوايا فيه فيه شرح مفصل جدا عن الزوايا والى هتعرف منه ظبط الزوايا ازاى

طولت عليك يلا تحياتى لك يا سيدى