##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
################################################## ############
الجزء الرابع:
موضوع الزينون:
فى يوم الصبح وأنا بدور العربيه،لقيت صوت تكتكه عاليه كانها صوت حاجه فى التاكيهات ففتحت الكابوت أشوف ايه الحكايه.
مفاجأه رقم 2:
طبعا بسبب الحراره داخل الكابوت لقيت الورق اللى على الـ 4 وحدات الزينون قرب يقع،حاولت ان الصقه بيدى لكن لقيته بيقع ،فاشلت الورقه اللى مكتوب عليها MADE IN GERMANY لقيت الورقه الأصليه مكتوب عليها باللغتين "صنع فى الصين MADE IN CHINA "
هذا بالأضافه اللى المنظر المقزز للسلوك بتاعة الزيتون المبعثره فى الكابوت و لحام الشيكارتون ،فلو بصيت على اى سلك فابريكه فى العربيه حتلاقيه داخل انبوبه.، دا أنا لو كنت رحت لأى كهربائى سيارات لكان المنظر أحسن من كده
ومن هنا نسأل ،هى المنظر ده بيقول ان العربيه مجهزه للزينون؟ ،ده فى الصيانه ما بيعرفوش يطلعوا فلتر الهوا بسبب انهم لازقين Module منهم خلف فلتر الهواء بلصق Double face لضيق المكان،فمعنى مجهزه يعنى يوجد اماكن لل Modules دى يعنى بلغة الكمبيوتر Plug and play
وهل سوبارو تضمن وحدات الزينون اللى بترفع الفولت من 12 الى 35000 فولت صناعه صينى.
أكيد لو سوبارو شافت المنظر حتسحب التوكيل نهائيا
وكلمت مدير المبيعات فى أبوغالى قالى حشوف وأرجعك،ورجع كالمنى وقعد يعتذر ويقولى المورد هو السبب مش أحنا.
وفى أخر مقابله مع تانى رأس بعد المهندس غالى لما قلتله على الزينون قاللى : يا باشمهندس الزينون اللى موجود فى السوق اما كورى أو صينى حانجبلك ألمانى منين؟؟؟؟؟؟؟!!!!!!!!!!!!!!!!!
لاحظ انهم بيبيعوا الmodule الصينى الواحد بحوالى 1000 جنيه،والكورى بيتباع فى السوق بحوالى 900 جنيه .
################################################## #############
##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
################################################## #############
تابع الجزء الرابع:
ورحت جسر السويس علشان رعشه الدركسيون،وقابلت م/ايهاب ورفعنا العربيه.
مفاجاه رقم 3:
انا: تعالى شوف يا باشمهندس ..المساعد الشمال ضرب زيت ومنقط كمان و اليمين اللى مغيرينو معرق زيت.
هو:ورينى...اه اليمين معرق بسيط ..عادى ....الشمال أه منزل زيت بس الزيت مش نازل من قاعدة السوسته.
أنا: لأ اهو شوف نازل من قاعدة السوسته.
هو: لأ
أنا:لأ
هو:طيب نغسل المساعد وننزل الزيت ده المرة دى ولو المساعد نزل زيت تانى نغيره
*************ولأنى عارف انى فى مصيبه جاييه سكت مؤقتا
أنا:طب كمان أغسل المساعد اليمين بالمره
هو:طيب
أنا: مش حنشوف موضوع رعشه الدريكسيون؟
هو:ماشى حقيس الطنابير دلوقتى
................
هو:أة..المشكله من الطنابير الأثنين ،حنفكها ونخرطها
أنا:بتقول ايه يا باشا
هو:نخرطها ..عادى...وأنا قستها لقيتها تتحمل الخرط طالما انها ماوصلتش للــ Minimum Thickness "أقل سمك مسموح به"،كل ما تعمل كده ممكن نخرتها لغايه ما نوصل للــ Minimum Thicknessوبعدين تغيرها
أنا:لأ لأ..انت بتهزر معايا .....صح؟
هو:ابتسم وقال : لأ ..ده عادى
أنا:"ضغطى على ووشى احمر" ..نعم نعم دا محدش بيخرط طنابير قدام (اللى هى ديسكات) و مفيش مخرطه تقدر تخرط ديسكات كويس ،وأياً كان ما فيش أى حنطور بيخرط طنابير عند 8600 كم،بالأضافه انه عيب اللى بتقوله، الــ minimum thickness بتاعة الديسكات تعنى انها تفضل شغاله عادى و تتأكل عادى حتى تصل للــ minimum thickness دى وبعدين تتغير من غير خرط ولا زفت،وبعدين لما تخرطهم بتقلل عمرهم كتير كانهم كانوا شغالين أنا ذنبى ايه، كده حاتقولى نغير طنابير على حسابك عند مثلا 20000 كم.
أنا: يا نهار أسود...ده الناس مابتعملهاش فى العربيات الكورى.....ده انا اعرف واحد صاحبى عانده اوبل كان مره بيشتم فى التوكيل علشان بيقولوله على فكره حتحتاج تغير طنابير قريب والعربيه عامله 160000 كم ومابيشتكيش من حاجه.
################################################## ###############
##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
################################################## #############
تابع الجزء الرابع :
مفاجأة رقم 4:
لما فكينا الديسكات والتيل لقينا التيل الشمال اقل فى السمك عن التيل اليمين بمقدار النصف تقريبا ،وده يؤكد ملاحظتى من ساعة ما أخذت العربيه "راجع الحوار بتاع الجنط الشمال بيسود من بودرة التيل و اليمين لأ "
أنا:شايف التيل.. التيل الشمال اقل فى السمك عن التيل اليمين بمقدار النصف تقريبا
هو: أة...عادى
أنا:مش ده اللى أنا قولته قبل كده ,قولتلى حنشوف ويبقالك الحق.
هو:أة ...بس ده عادى.
أنا : المهم حتعمل ايه دلوقتى فى المصيبه السوده دى.
هو:حنخرطهم
أنا:لأ يا باشا أنسى خالص الكلام ده.
هو :أومال انت عايز ايه؟
أنا: الديسكين وطقم التيل قدام يتغيروا على حساب الضمان .
هو:ما ينفعش..ونغير التيل كمان ليه؟
أنا: ممكن تقولى ايه اللى عمل كده فى الديسكات؟
هو:مش عارف ...ممكن يكون عادى أو ممكن يكون التيل.
أنا:بس اديك قولتها..يبقى فى خطأ فى المجموعه كلها ،فلازم كله يتغير ،ولا حتركب تيل قديم على طنابير جديده
هو: التيل تغيره على حسابك علشان ده قرب يخلص دلوقتى انته عامل 8600 يعنى كده كده حتغيره عادى عند 10000كم
انا:وهى بتغير تيل قدام بــ550 جنيه كل 10000كم ان شاء الله ...يا نهار اسود ومنيل.
هو : أه..علشان اوتوماتيك
أنا: ولو، المهم ايه رايك فى اللى أنا قولته؟
هو:ما ينفعش؟
أنا: "سخنت قوى وخبطت على الكابوت وقلت" ،ده الصح اللى المفروض يتعمل ،وبلاش ندخل فى مشاكل .
هو:طب..انا حسأل الاداره وأرد عليك
أنا:أسأل زى ما يعجبك
ولطعنى ساعه...........
أنا: ايه الأخبار
هو:"وهو بيضحك" حنعملك اللى انت عايزه.احنا مش عايزين نزعلك
أنا:طب كويس
وراح للمخزن يصرف طنابير وتيل
هو لمسئول المخزن:التيل ده بتاع امبريزا 2008
مسئول المخزن :أة...
هو:مش شكل اللى طالع .. هو مختلف شويه
مسئول المخزن : أة صحيح ...سوبارو غيرت الــ part number بتاع تيل الامبريزا 2008 وبعتولنا بذلك.
أنا: ممكن اقارن ما بين القديم والجديد.
ومسكت الأثنين ولقيت أن التيل القديم سبيكته خشنه فى ملمسها ولونها يميل للسواد و الجديد ناعم ومضاف عليه برادة نحاس ولونه تقريبا رمادى.
أنا:كده يبقى التيل هو السبب،القديم كان خشن و شرط الديسكات ،علشان كده غيروا البارت نمبر لنوعية تيل تانى ناعم ،ومضاف اليه برادة نحاس علشان يعادلوا النعومه ومن المعروف ان براده النحاس فى التيل بتكون حنيينه على الديسكات وتتأكل بسهوله وبتقلل مسافة الوقوف لكن بتخلى التيل يصفر
هم: ممكن
وأخيرا ...غير الطنابير والتيل.
ملحوظه هامه جدا:
لاحظوا انه لم يدخل معى فى حوار سوء استخدام ،ممكن كان يقول الطنابير قفعت بسبب التبريد المفاجئ علشان نزلت بيها فى ميه وهى سخنه ،لكنه ما قالش كده علشان الطنابير مش مقفعه ،الطنابير كانت مشرطه دائريا بسبب الأحتكاك الدورانى للتيل ،بالأضافه لأنه عارف انى عارف الكلام ده.
هو:تعالى نجرب ونطبع التيل
أنا : يا له
################################################## #############
##مأساتى مع أبوغالى و سوبارو امبريزا Rk 2008 # هل 2008 غير مصممه لمصر###
################################################## ##############
تابع الجزء الرابع :
وأثناء التجربه
أنا: على فكره صوت الماتور على عن الأول و أنا بسمع صوت تكتكه عاليه فى الموتور كانها صوت تاكيهات أو كستبانات الصبابات بالذات ناحية البستمين الشمال وبيبقى عالى جدا أثناء الدواره الصبح ولكنه مستمر،بالأضافه الى انى حاسس ان سحب العربيه قل، فى الأول كنت بجيب ال 140 دى على الدائرى وانا مش واخد بالى لكن دلوقتى بوصلهم بعد لما اقرص جامد بالستب ترونك .
هو: "برئلى..وقال" أنت بتحط بنزين كام؟
أنا: "على الفور وقبل أول قلم "، والله با باشا بحط 95 من بنزينه امارات مصر واحيانا شل المعادى،والله يا باشا أتخرب بيتى بفوول ب160 جنيه
هو:كويس امارات مصر انظف بنزينه فى مصر..لما نرجع حسمع الصوت
أنا:أنا بس خايف لا نعمل عمرة ماتور عند ال 10000كم ولاحاجه!!!!!!!!!!!!! فاكر عربيه أ/خالد ال 2007 "Recommended 92"
هو:"بيضحك" ،مش احنه ساعتها حللنا البنزين بعد كده وطلع 91 مش 92
انا:طبعا لازم يطلع 91 علشان رسميا و واقعيا (خارج مصر طبعا) مفيش حاجه اسمها بنزين 92 فـ 92 عندنا هو 91 وشوف الكلام ده فى كتالوج مرسيدس و فولفو ومازدا بيقولوا 95 recommended لكن ما تحطش اقل من 91 ،احنه فى مصر بس اللى بنقول عليه 92،وبعدين كلمة Recommended تعنى المفضل لكن المفروض انها ممكن تشتغل ب 90 عادى.
هو: لأ.. Recommended octane يعنى الأوكتين اللى لازم تحطه
أنا: على حسب كلامكم ان سوبارو قالت فى موضوع الموتور بتاع الأخ خالد أن السبب اما اوكتين واطى أو اسلوب سواقه المهم انى لو حصل معايا زيه مش حيكون لهم حجه لأنى حطلع من السببين لأنى بحط 95 والعربيه اوتوماتك يعنى اللى بينقل النقلات software وغير وارد اطلاقا أن ادخل فى Red Area لأنها بتطنش مهما حرقت حتى على الستيب ترونك فأول ما ال RPM يحاول يلمس الRed Area بتنقل لوحدها على الغيار الأعلى .
هو :"بيضحك" كلامك صح.. بس ان شاء الله مش حيحصل حاجه
أنا:ولاحظت ان لما بشغل التكيف صوت الكمبريسور على قوى عن الأول
هو:لأ…ده عادى ..هل البروده قلت؟
انا:لأ
هو:يبقى عادى
أنا:بس انا حبيت أسجل ده علشان تفتكرنى لما نغير الكمبروسور عند ال 10000كم
هو:"بيضحك" لأ ان شاء الله عادى
ورجعنا و سمع صوت الماتور وقال:
هو:أة..صوت التكتكه دى اللى ناحيه شمال الماتور دى عاديه ،علشان الماتور ده كامتين والكامه الشمال ***شغاله على رمان بلى نصه عسل و النص التانى طحينه فلما بتشتغل بتعمل الصوت ده*** أسف جدا الكلام اللى بين النجوم من عندى و هو شبيه جدا بالكلام اللى قاله ساعتها بس أنا مش فاكر لأنه لا يمت بصله للميكانيكا.
أنا: ادينا مع بعض ..حتروحوا منى فين
و زى كل مره ..أصرييت على أن يسجل تغيير الطنابير و التيل الأمامى فى كتيب الضمان ..وقام بذلك على مضض.
################################################## ##############