الموضوع: تغيير شنابر ديل لجيربوكس الميجان ii...أفهم و أعرف حقك و أثبت مكانك!!!

المشاركة الأصلية كتبت بواسطة hany saad

هذا الموضوع لأستفادة كافة الأعضاء....

بداية من حوالى أسبوعين كده...أنا من أسكندرية أصلا و السكة كانت زحمة جدا و مش بتتحرك و بعد مسافة طويلة و بعد ما وقفت فى أشارة جاى بطلع لقيت كأن العربية محطوطة على n و الrpm بيعلى و العربية مش راضية تتحرك....و بعدين هوب هبده خفيفة و الأول عشق و نطت و طلعت عادى و الكلام ده متككرش تانى.

من 3 أيام كنت راجع من القاهرة و السكة قبل البوابات و اقفة و درجة الحرارة كانت فوق ال37 و قوم أيه يحصل نفس الموضوع و تكرر كذا مرة فى نفس المنطقة اللى كنت فيها....المهم رجعت السكة كلها على 140 كم/ساعة و مكنش فيه مشاكل....كلمت التوكيل و أنا فى السكة و حجزت أول ميعاد صيانة بدرى، الكلام ده كان يوم الخميس، الجمعة هما أجازة و السبت صيانات دورية فقط مفيش إصلاح، حجزت الأحد 9 صباحا

يوم الأحد قبل 9 صباحا كنت هناك 2 عربية، جه المهندس يستلم العربية، خير إيه المشكله؟ طبعا قولتله الفتيس فيه lag و عايز أغير شنابر ديل بالسلطات بالبابا غنوش...يعنى مع غيار زيت فتيس مع إعادة برمجة كنترول الفتيس مع reset لل oil aging counter....

هو: جميل سيبها و تاخدها بكره
أنا: بعد الصدمة...ليه ده موضوع ساهل ياخد 3 أربع ساعات...و أنا جايلك بدرى و الورشة مش زحمة

هو: راسه و ألف سيف ما هى خالصه النهارده....طبعا لأن من طبيعتى ماخدش كلام الناس مسلمات...قولتله بعد أذنك ممكن تفهمنى ليه هتاخد يوم....الأجابة: هبعت حد بالعربية يخبط مشوار محترم علشان يسخن الجيربوكس و يشوف العيب و بعدين يصلح و بعدين يتأكد أن العيب أتصلح تمام...

ردى كان كالأتى: هى التكلفة كام؟
هو: فى حدود 1000 جندى
أنا: هل فى أى خطورة لو غيرت شنابر الديل و مطلعش العيب منها؟
هو: مفيش أى خطورة على العربية...لكن أنت هتخسر 1000 جم على الفاضى
أنا: جميل جداً....أتكل على الله و غير و أنا مسؤول و عوضى على الله لو مش هو
طبعا داخليا أنا متأكد أنه هو العيب...ده غير أنا مش هيزعلنى تغيير زيت جير بوكس جديد و شنابر تحكم الضغط و إعادة برمجة كمبيوتر الفتيس و reset للoil aging counter
يعنى عملنا صيانة للجيربوكس بعد 7 سنين و دى حاجة جميلة

لاحظ الأتى....يوجد تمن كشف 250 جم للكشف عن العيب و ده كان المفروض يتم خصمهم لأنى محددله العطل و مش طالب كشف

و لأن الفلوس الحلال ربنا بيبارك فيها و لأنى عارف أيه هى حقوقى و واجباتى كويس كنت متذكر و أنا بشترى ميجى حبيبتى أن ضمان الجيربوكس 100 ألف كم غير محددة المدة...أيون زى ما سمعتم كده 100 ألف كم مصرى غير محددة المدة أنا فاكر كويس لأن كان ساعتها فى إشاعات كتير طالعة على الميجان و مشاكل الجيربوكس و ده طمنى لحد كبير و أنا بشتريها لأنى فى العادى بغير العربية قبل ال100 ألف كم

طبعا أول ما قولتلهم كده و كأن عقربه لدغتهم....تتنيح فى الأول و بعدين أبتدى دور الهذيان و الأنكار....مين قال كده، مفيش الكلام ده، ده كلام مش مظبوط، الضمان 100 ألف أو 3 سنين و أنت بقالك 7 سنين (لاحظوا أن عربيتى عاملة 72 ألف فقط)....

و لأن العبد لله عامل كل صياناته الدورية فى التوكيل حتى الأن فى مش قادرين يجادلوا إلا فى موضوع أنه 3 سنين فقط مش غير محدد المدة.....

المهم و لأنى مستعجل و عايز العربية تخلص، قلت للمهندس أشتغل أنت دلوقتى و بعدين نشوف الموضوع ده بعد ما تخلص

أنتظرت من حوالى 9 صباحا لغاية 2 مساء لغاية لما العربية خلصت و أتبرمجت و كله بقى ألصتا...

جت المهندسةتسلمنى العربية....

أنا: كام الحساب
هى: 995 جندى
أنا: بمنتهى الهدوء...حضرتك العربية فى الضمان
هى: ضمان إيه؟

نسيت أقول بأه أن كرم ربنا كبير....قلت أفتح الطابلوه علشان أنا محتفظ بالشنطة الجلد بتاعة العربية اللى فيها كل الورق و كتيب الصيانة.....و يشاء السميع العليم ألاقيهم كتبنلى بخط أيديهم فى التوكيل علشان أنا كنت شارى من التوكيل هذه العبارة:

ضمان ضد عيوب الصيانة 3 سنوات أو 60 ألف كم أيهما أقرب
ضمان على ناقل الحركة (الجيربوكس) 100 ألف كم غير محددة المدة

و كمان إمضاء و ختم المصرية العالمية للسيارات eim

هى: اللى كاتب الكلام ده كاتبة على أساس أيه...ده غلط
أنا: حضرتك الكلام ده تقوليه لزميلك مش للعميل
أنا: العيب اللى أتغير مكانه فين؟
هى: فى الجيربوكس
أنا: و العربية عاملة كام كم؟
هى: 72 ألف كم
أنا: جميل جدا...يبقى أنا كده عدانى العيب و أزح و شروط الضمان تنطبق عليا علشان ده مش عيب إستخدام
هى: بس ده مش مضبوط
المهندس: أنا عمرى ما عملت ضمان بعد 7 سنين
أنا: أهو جه الوقت اللى تعمله :c_laugh[1]: ....دى مش مشكلتى...أنا معايا ورق رسمى و محتفظ بحقى...زميلكم غلطان، أنتو بينكم و بين بعض بأه تصفوا الموضوع...مش قصتى أنا
هى: مينفعش حضرتك
أنا: جميل جداً و أنا هطلع من عندك على حماية المستهلك عدل و emails على رينو فرنسا و رينو دبى و هقول أنكم رافضين تعملولى الضمان و معايا ورق رسمى و صياناتى الدورية كلها متسجلة

المهندس: يا باشا أتفضل معايا على المكتب

رحنا المكتب

هو: أيوه حضرتك؟
أنا: شوف يا هندسه...أنا محبش أضرب على قفايا أبدا....حقى و هخده...أنا عمرى ما جادلت قبل كده فى سعر صيانة...لكن ده حقى و محدش بيدينى حاجة من جيبه و العربية هتتعمل ضمان

طيب أنتظرنى

5 دقائق عمل تليفون أستأذن من مديره و رجع معاه أذن خروج و فاتورة ضمان....

الجزء المهم...ملاحظاتى على العربية بعد التغيير....

1-طبعا الفتيس بقى أهدى و أنعم من الزيرو حتى و سلاسة غير معهودة فى النقلات
2-إحساس النقلات و حتى النتشة اللى بين الأول و التانى بقت خفيفة و ناعمة جدا جدا
3-الengine brake بقى أنعم بمررررااااااااااحل.....الأو� � كان الrpm بيعلى جدا على لما تنقل لل3 بعد engine brake...
4-كان ساعات من سنة مثلا بيحصل هبده بسيطه مع الفرامل عند الوقوف التام على فترات متباعدة....أختفت تماما
much much better feeling now
الخلاصة: الفتيس أرتاح جدا و سواقة العربية بقت ممتعة بكتير عن الأول...تجميع أحسن كمان و العربية بقت فايقة قوى معايا

نسيت أقول أن ال life time بتاع القطعة دى و على حسب كلام التوكيل فوق ال5 سنوات

أسف للإطالة....و أرجو أنى أكون أفدتكم و رديت جزء من جميلكم عليا
شكر خاص لأستاذ شوقى لطفى لأن أعراضه و مشاركته هى اللى خلتنى أعرف عندى إيه....مشكور أستاذنا الكبير

انا شاري عربيه ميجان 2006 مستعمله عامله 93000 كم وتقريبا فى مشكله فى الفتيس لانه بيتاخر فى النقلات وبيحصل هبده عند الفرمله ومش معايا اى اوراق للضمان فهل كدا ممكن اعمل صيانه فى التوكيل علي حسبهم ولا هيكون اثبات حقي صعب

انا شاري ميجان 2006 مستعمله وعامله 93000 كم ومش معايا اوراق الضمان وعندي هبده وتاخير فى النقلات هل كدا اروح اصلحها فى التوكيل علي حسابهم ولا مش هعرف اثبت حقي