اقتباس المشاركة الأصلية كتبت بواسطة abo-yousef مشاهدة المشاركة
اقولك انا بقى على حوار البحر الاحمر ده ... انا ليا ناس صحابى ليهم قرايب بيطلعو الطلعة دى بس بيبقو مجموعة حوالى 10 افراد والرحلة بتتكلف ايجار المركب تقريباً حوالى 7000 او 8000 جنيه فى الثلاثة ايام وبيجيبو سمك احجام ماشاء الله بيبيعو منها كميات هناك للمراكبية اللى قاعدين عالشط مستنينهم وبيغطو تكاليف الرحلة وبيرجعو كمان بسمك




انا بصطاد ياباشا من حوالى 20 سنة ( صياد قديم يعنى ) وعندى خبرة جامدة فى الصيد وعندى كل ما تتخيله من عده للصيد مكلف عدة صيد جامدة من زمن الزمن وحوالى 4 فيبر بأحجام مختلفة وفيبر صب للبحر ومكن لكل فيبر و العياشة وشنطة مخصصة بشيل فيها كل الكلام ده غير بقى كشاف رأس عشان بحب اصطاد بالليل غير السنون والمداور وبكر خيط جميع الاحجام وسنون الشمط وكل كل كل ما تتوقعه الحمد لله مجهز عندى بزيادة لانى دايما بصطاد بس فى النيل بس مش بحب اطلع لوحدى بحب يبقى حد معايا يونسنى واتمنى ياباشا لو تشرفنى يوم تنورنى
زى الفل:) أنت طلعت راجل خبير, أنا عكسك تماما, خبرتى كلها فى البحر ألأحمر من عشر سنيين بصطاد و فى ألأسبوع مرتين على ألأقل بنزل أصطاد و لو حضرتك جيت جنوب سينا أبقى قوللى قبليها بفترة و ننزل نصطاد ان شاء الله بالنسبة للطعم فى البحر ألأحمر بلا منازع الماكريل و بعديه السردين و بعديه السبيط البلدى اللى بيبقى طالع من البحر ألأحمر "مش السبيط بتاع السوبر ماركت" و الماكريل ليه طريقة ظريفة جدا بتخليه يمسك كويس فى السن و بيجيب نتايج جميله جدا..تستنى لما الماكريل يفك من التلج و يسيح خالص و تجيب السمكة تقطع بعد الديل بكام سنتى كدة و تسيب الجزء ده سليم لأنه جزء مميز فى السمكة للصيد و تيجى على بقية السمكة و تفليها"تعملها فيليه" و تتشيل الراس و المصارين فى كيس لوحديهم علشان بتزفر بيهم فى المكان اللى بتقعد تصطاد فيه. المهم نرجع للفليه و الديل اللى أنت خرجتهم من السمكة. بتجيب جرنال كامل و تحط عليه طبقة ملح خشن و تحط السمك عليه و تحط فوقيه كمية تانية من الملح الخشن و تحطه قدام مروحة متسلطه عليه و بعد شوية هتلاقى السمك نزل ميه تقوم مغير الجرنال اللى تحت السمك و تشيل الملح المبلول و تدى طبقة ملح جديدة..المهم أنك بتغير الجرنال ممكن تلات أو أربع مرات فى خلال 5-7 ساعات و بعدين بتطلع السمك من وسط الملح و بتلاقى جلده شد و السمك بقى زى الكاوتش:) وبيبقى زى الفسيخ و بتلفه فى جرنال و تحطة فى التلاجة و لو نازل فى نفس اليوم أو بعد يومين حتى السمك المملح دهده مابيحصلوش حاجة و ميزتة أنه حتى لما بتروح تصطاد مش بيفسد لو هاتقعد 8-9-10 ساعات على البحر و نتايجه فى الصيد جميلة جدا.