الموضوع: تقييم أوبل أسترا البرازيلي 2003-2006

أوبل أسترا موديل 2003 - 2006 والمشهورة بالأسترا البرازيلي





تم انتاجها بمصنع شيفروليه البرازيل باسم شيفروليه أسترا وتم استيرادها بواسطة منصور وتغير اسم شيفروليه لـ أوبل . (افتح الكبوت وبص على علامة أوبل من جوا وانت تعرف)
حتى تباع بسعرها المتوافق مع شريحة أوبل (وجهة نظر شخصية)

العربية نزلت شكل واحد ونفس المواصفات من أول 2003 لـ 2006
موتور ايكوتيك 1.6 اتنين كامة 16 صباب بقوة 100 حصان
فتيس اوتوماتيك بخاصية سبورت درايف

التقييم هو من وجهة نظري الشخصية: فهناك بعض الأشياء أراها عيب ولا يراها غيري كذلك والعكس صحيح

المميزات

- موتور قوي ، وحش على الطريق وشد زي مانت عايز مع أي عربية باستثناء الهوندا :)
- فتيس أوتوماتيك نادر جدا انه يعطل
- صاج متين ولكن ليس بقوة الفيكترا ولكنه أثبت متانته في مواقف كثيرة
- تكييف بيخلي العربية تلاجة بمعنى الكلمة مش هواء ساقع وخلاص
- العربية لا تعرف شئ عن مشاكل الحرارة المشهورة عن الأوبل (مشيت بيها 180 كيلوا وانا مشغل التكييف والحرارة ثابتة على 87)
- ثبات جيد جدا على السرعات العالية لـ 160 وبتجيب 190 وأكتر بس ماتلعبش يمين وشمال (تجربة شخصية:غرزة غبية عملتها في بداية سواقتي من على خط مستقيم بسرعة 130 ، انا واللي معايا اتحدفنا يمين والعربية اتحدفت شمال والحمد لله قومت من تحت الطابلوه ولاقيت العربية لسا على الطريق ! )
- عفشة ناعمة وطرية فعلاً
- امكانيات وكماليات مش موجودة في عربيات مشهورة واغلى منها:
ايموبلايزر (مانع السرق) ، 2 ايرباج ، ABS ، طارة متحركة (فوق وتحت وبتدخل لجوا ولـ برا )، أوتو سنتر لوك على 20/30 كيلوا، أربع زجاج أبواب كهرباء باللمس ومزود بزرار غلق التحكم في الزجاج الخلفي + أربع وحدات رفع ، فتح الشنطة وتانك البنزين من الداخل، مفتاح بريموت + زرار لفتح الشنطة ، فوانيس شبورة أمامي وخلفي لمبة واحدة ناحية السواق ، مفتاح تعديل مستوى اضاءة نور الكشاف العالي ، خاصية استمرار اضاءة نور الكشفات لمدة 30/40 ثانية بعد غلقه من المفتاح والعربية مطفية ، مرايات جانبية كهرباء ، زرار منبه للسرعة من أول 30 كيلوا لغاية 130 بيعمل صفارتين بس ، مش ازعاج عالطول لغاية اما دماغك تصدع! ، زرار مانع التزحلق أو winter program ، شماسات بمرايات مضاءة ، ساعة بها الوقت والتاريخ وحرارة الجو ، ثلاثة لمبات اضاءة للصالون: واحدة أمامي في المنتصف واتنين جانبي على البابين في الخلف
أربع سماعات في الأربع أبواب وصوتهم أحلى وأنقى من الأوبترا عن تجربة
مساحات التخزين :درج الطابلوه كبير وحلو ، وكمان درج طابلوه بس مساحته صغيرة جدا للسائق ، باكيتات تخزين في الأربع أبواب.
- مخدع خلفي قابل للطي مزود بـ باب للنظر على الشنطة من الداخل
- عزل العربية جيد جدا وليس ممتاز يعني لما ادخل العربية وانا كنت مشغل التكييف الاقي لس العربية محتفظة ببعض من برودة الجو ، وفي نفس الوقت بتسمع صوت موتورك وخصوصا على السرعات العالية لكن الهواء بسمعه عادي أكني على سرعة 80 كيلوا
- الكراسي الأمامية تتحرك في 6 اتجاهات ( للأمام والخلف ، تعديل ظهر الكرسي للأمام والخلف ، تعلية الكرسي وخفضه )
- الكراسي الأمامية مريحة جدا وبها مساحة جيدة جدا للأرجل خاصة لطوال القامة اكنه راكب في اتوبيس
- مساحة الأرجل للكنبة الخلفية جيدة ، ومساحة الشطنة جيدة جدا
- صالون أغلبه وليس كله جيد في التقفيل
- قطع غيارها الداخلية كلها يوجد منها جديد واستيراد
اما القطع الخارجية فلا يوجد منها استيراد ، جديد بس عشان مانزلش منها انصاص

العيوب

- العربية مانزلش منها انصاص فبالتالي بعض قطع غيارها الخارجية غالية نظرا لعدم وجود شركة منافسة لنفس المنتج (high copy)
- بالرغم من توافر قطع غيارها الداخلية (الميكانيكة والعفشة) استيراد بالكامل إلا أن اسعار هذه القطع جديدة تعتبر غالية نسبياً ( ليه ؟ انت راكب أوبل يا بيه )
- مرايات جانبية ليست ضم
- لا يوجد مثبت سرعة (وده بسبب العشم طالما مليانة كماليات )
- لا يوجد حامل أكواب ولا يوجد مخدع أمامي
- جلد الكلاكس في الطارة بيتقطع بسرعة
- بارومة في السقف عند البريبز الأمامي
- صعب تشوف كابوت العربية وانت سايق وبخاصة قصار القامة اللي زي حالاتي :)
- لايوجد تنبيه للأبواب المفتوحة ولا تنبيه لحزام الأمان مع انها مزودة بلمبة تحذير حزام الأمان
- دهان سئ للغاية بتكلح بسرعة وشكلها بيبقى جربان والأوبل مشهورة بالبوية المكلحة من الشمس
- الكراسي مش متقفلة كويس مع القاعدة بتاعتها (موبيكا مصري) وغطاء البلاستيك بتاع دراع تعلية كرسي السواق بيقع كل شوية
- الإريال متركب برا على السقف فممكن يتسرق بسهولة
- لمبة الABS اوقات كتير بتنور
- العيب الشائع والقاتل: الكنترول بتاعها بييعطل ومالوش وقت محدد
عندي مثلا عطل بعد 10 سنين استخدام نظرا لأني عربيتي كانت 2003 وفيه ناس معطلش عندها وفيه اللي عطل عندهم بدري ، انت ونصيبك
وتمنه غالي جدا في التوكيل بـ 7000 الاف جنيه و استيراد بـ 3000 لـ 3500 جنيه

موضوع هايل
انت نسيت حاجه من ضمن المميزات وهو الديد لوك
بس انت بتشغل النور العالي ازاي من الريموت ؟