الموضوع: عيب كان في فيكترا 95 إيه دوخنى والتوكيل 3 شهور اللى عاوز ياخد خبرة يدخل

من حوالى خمس سنوات عربيتي الفيكترا 95 إيه 2000 اوتوماتيك كنت بسمع فيها صوت غريب كل ماجى ألف يمين أو شمال والصوت ده كان زي مايكون حديد بيخبط في بعض والعربية كانت زى الفل سرعة وسحب وثبات ومفيش سخونة ولا اى اصوات تانية.اﻷول رحت لميكانيكى عندنا في الزقازيق وبعد الفحص والتمحيص قالي العفشة مش مظبوطة روح لعفشجى كويس العفشجى قعد يربط في العربية شوية وقالي جرب ولا في اي تقدم. قلت اروح الحرفيين فرحت لواحد إسمه محمد كانوا بيشكروا فيه هناك وبعد الفحص وتجريب العربية قالي لازم تغير بطاحات وبيض دريكسيون يعنى الموضوع كله عفشة برضه قلت اكيد الحرفيين بيفهموا احسن من اللى عندنا وغيرت الحاجات اللى قال عليها وكانت العربية كويسة وانا راجع الزقازيق ولكن بعد يومين رجع نفس الصوت قلت مافيش الا التوكيل قمت رايح منصور اللى فى العبور وبعد الكشف قالولى علبة الدريكسيون بايظة ولازم تتغير والا العواقب خطر جدا وكمان قالي الفرامل ضعيفة شوية.طيب بكام علبة الدريكسيون قالى المهندس 7000 جنيه قلت ارجع الزقازيق والله منا مغير حاجة بس كنت راجع على سرعة 50 علشان خايف من العواقب وعلى فكرة العيب طلع حاجة تانية خالص..ياريت كل واحد من الاخوة الاوبلاوية الافذاذ يقول السبب ممكن يكون ايه.