الموضوع: ..:: التقرير الشامل النهائى لتويوتا كورولا 2014 ::..

اولا كل سنة وانت والعائلة الكريمة بخير
ثانيا تعال نتكلم براحة ونحلل الموضوع بموضوعية وسلاسه كدة وانت في الاخر قرر

نمسك الكورولا ونحللها بالنسبة لظروف حضرتك :
1 - الكورورلا عجباك علشان الامكانيات الى نازله فيها والاوبشن والشكل الجديد
2 - الكورولا عربية اعتمادية ودة معروف عن التويوتا
3 - الكورولا ماركه قديمة ومسمعة جامد في مصر وتبتبع كتير بهبل
4 - الكورولا توكيلها كويس ومحترم وموجود في كل حته وليه فروع في اى مكان
5 - سعر اعادة البيع كويس جدا ولصالح التويوتا
6 - عربية حمالها قاسية ويشهد ليها بالكلام دة كل الى ركب انواعها المختلفة
7 - عيوبها قليلة لان بسيطة في التصنيع ومفيش تكلف ولا فزلكه زى ما بيسموها بروبلم فرى
8 - ان كان ظهر عيوب في موديل سابق وعلاقين المشانق له فالمشكلة اتحلت في التوكيل علشان محترم وبيتغير الفتيس بالكامل دلوقتى بدون اى فلوس حتى لو العربية بره الضمان واقرب واحد زميلنا مغيره في ابو رواش يوم 3 اكتوبر في العالم الحالى بدون اى مصاريف ( اتكلم عن تويتيا جنوب افريقا )

بعد الماخد عليها من الناس والمالكين للسياره :
1 - اكتر حاجة مقلقة الدنيا والشعب المصرى خاصة انخفاض العربية على الارض انا اتكلمت في النقطة دى وقولت ان مش هضحك عليك واقولك العربية عالية لا طبعا العربية منخفضة عن الارض ودة زى اى نوع سابق بردة كانت العربية بتحك منى بس الغريب الى انا شوفته انا معايا كورولا 2009 خليجى وبردة كانت منخفضة وبتحك في الارض بس انا ببلع ليها العيب دة في مقابل ان كل حاجة في العربية كانت كويسة .. شكل .. اداء ... فرامل ... اعتمادية حدث ولا حرج ... ثبات ممتاز في اليابانى واحسن من الكورى مليون مره ولكن الالمانى يتفوق طبعا في الحته دى باكتساح
ولكن زى ما قولتلك موديل السنة دى اليايى المستخدم اقوى من الانواع السابقة يعنى مش بينضغط اوى مش بيخلى العربية بطة مرفوعه من قدام ونازله من ورا لا ودى انا عملت مقارنة بين الموديلين والعربية مصفحة من تحت يعنى متقلقش ومش هتحك لو لقدر الله حكت الا في علبة الشكمان وكمان عاملين حديده بالعرض كدة علشان تحمي العفشة والشكمان يعنى مش تقلق ان شاء الله من دى .. وتاكد ان العربيات لازم يبقى فيها عيب مفيش عربية كاملة واتمنى ان دة يبقى العيب بس وانا عن نفسى راضى وموافق علية جدا

2 - بيقولك ان العربية تركى
طيب ما الفلوانس دلوقتى تركى برضة .. تركيا مش بلدة متخلفة .. بالعكس دى بقت بلد اوروبية دلوقتى وبتصدر لكل حتة في الدنيا بس تويتيا اختارتها لقربها من اوروبا والشرق الاوسط والايدى العاملة فية ارخص من اليابان في التصنيع علشان تقدر تحط الاوبشن والامكانيات دى كجودة كويسة وكسعر حنين ومقابل فئات كتير من الناس وتظل تويتيا متربعة بردة على عرش المبيعات قبل ما الكورى يسحب منها البساط




ناتى بقى للجوك واقول الى انا شايفة بس مش هقدر اقولك كل حاجة عنها لان مركبتهاش فممكن تسال في قسم النيسان وهما يفيدوك اكتر من بس انا هعمل مقارنة بسيطة خالص بينها وبين الكورولا

1 - الكرورلا اوسع داخليا منها في الشنطة والمساحات الداخلية
2 - الجوك اعلى طبعا ودة مقارنة صعبة بين الاتنين بس في بلدنا العربية العالية جميلة ومريحة بس انا من راى الشخصى المتواضع ان لو هركب عربية عالية هركب عربية تقيلة اعتقد الجوك خفيفة الى حد ما تقريبا في نفس وزن الكيا السبورتاج ... ولكن للامانه العربية العالية ركوبة تانية واحساس تانى في المطبات تحس انك داخل على المطب مش خايف لا من حك ولا من اى حاجة وممكن تنط من على المطب ولا اى اندهاش (( بهزر في حكاية النط دى ))

3 - الشكل الخارجى بالنسبة للجوك فية ناس كتير مش مستحبة الشكل خصوصا الفانوس العلوى الى فوق الكابوت دى بيقولوا انه عرضة للخبط بسرعة وفية منطقة ملطش ... بالنسبة ليا مش عجبنى شكلها اوى ودى طبعا اراء

4- توكيل نيسان ( السبع ) من احسن التوكيلات في مصر طبعا دى لا جدال عليها ماشاء الله عليهم ( الحق يتقال يعنى )

5 - سعر اعادة البيع زى ما قولتلك كفه التويوتا ترجح في الحته دى

6 - استهلاك البنزين عالى شوية عن الكورورلا



طيب بعد كل الكلام الكتير الى انا قولته دى اتمنى تكون كونت فكره
ابسطهالك شوية
انت بين مطرقة وسندان في التفكير

تجيب عربية اعتمادية وماركتها محبوبه وواسعة داخليا وفيها اوبشن كتير السنة دى بس وتقدر تاخد العيلة 5 افراد مرتاحة من غير ما يبقى فية حتة مزنوق في الركوبة وتوكيل كويس ولما تزهق منها هتبيعها مش هتخسر كتير اوى واقتصادية في البنزين ....... بس مشكلة انها واطية شوية على الارض ( ولكن لن تزحف على المطب بس هتاخدة بشويش وحنيه ) .................. يبقى هتجيب كورورلا وانت مغمض


يا تجيب عربية عالية .. ماركه معروفة برضة ... توكيل كويس ... مش هتتعب في المطباات ولا هتبقى في دماغك ... بس هتاكل بنزين عن الكورولا من كتير اوى ... الكنبه ضيقة حبتين يعنى افراد الاسره مش مرتاحين بنسبة 100 في المية



ان كدة فتحتلك كل حاجة وانت اختار بقى وانا برضة معاك في اى معلومة او اى استفسار انا تحت امر حضرتك

جزاك الله خيرا وفعلا ساعدتني على إتخاذ قرار إن شاء الله .. بس أستشارة أخرى أشترى خليجى ومواصفات الخليج معروفة وأعلى أنا مقيم بالسعودية ... ولا من مصر ..عشان الجمارك والمشاكلها وشحن السيارة وخلافه ...بارك الله فيك