الموضوع: صيانات سيارات بيجو

طبعاً فى البداية احب ابارك لكل واحد اشترى سيارة من سيارات بيجو , وعملت الموضوع ده عشان احاول اقدر افيد ناس كتييير بالنسبه لموضوع الصيانات والمراكز
- طبعاً فى البداية لازم نكون عارفين رقم خدمة العملاء 19207



ناس كتير اول مابتشترى السيارة من اى معرض غير رئيسى احيانا بيكون موزع معتمد او معرض غير تابع لبيجو
بيتم توضيح للعميل احيانا معلومة غلط ان أول صيانة هى صيانة ال 1000 كيلو ,

وثانى صيانة هى صيانة ال 5000 كيلو .
وطبعا كل الكلام ده غلط .

بالنسبة للصيانات الخاصة بسيارات بيجو :-

1- أول صيانة هى صيانة ال 2500 كيلو أو 3 شهور أيهما أقرب وبيتم فيها تفعيل الضمان والكشف على جميع أجزاء السيارة والمصنعية بتكون مجاناً .



2- ثانى صيانة هى صيانة ال 10.000 كيلو أو 6 شهور أيهما أقرب .
وبيتم فيها تغير الزيت والفلاتر.

-يعنى نفهم من كده ا ن أول صيانة مش بيتم تغير فيها لا زيت ولا فلتر لكن بيتم عمل تشيك اب على السيارة , وبيتم تغير الزيت والفلاتر فى صيانة ال 10.000 كيلو .

3- بإقى الصيانات صيانات دورية كل 10.000 كيلو .





.... طيب دلوقتى انا عايز احجز صيانة ال 2500 كيلو , هعمل ايه :-



طبعا اول حاجه لو لقيت قراية العداد الحالية حوالى 2500 كيلو , او حتى وصلت ل 3000 كيلو طالما فى نفس الرينج مفيش اى مشكلة.


هنتصل على 19207 رقم الكول سنتر عشان نحجز صيانة



- طبعاً الحجز بيتم قبل الميعاد ب 48 ساعة , ولازم يكون متوفر معانا بعض البيانات اللى هنحتاجها واحنا بنكلم الكول سنتر



هيطلب منك " نوع السيارة – موديل سنة كام – نوع الفتيس – ورقم الشاسية – ورقم اللوحة "
وطبعا مش هيتم تفعيل الحجز الا برقم الشاسية او برقم اللوحة لو معاك اى واحد منهم بيتم الحجز مفيش مشكلة المهم حاجه منهم .

وطبعا خدمة العملاء مش بتحجز الا فى مراكز الخدمة الرئيسية , لكن مراكز الخدمة المعتمدة بتحجز معاهم من خلال ارقامهم مش من خلال خدمة العملاء.


بالنسبة لمراكز الخدمة الرئيسية :-

1- مركز خدمة غمرة :-
رقم 114 ش الخليج المصري , غمرة .
24824647 / 24857684

2- مركز خدمة صلاح سالم :-
رقم 11 ش صلاح سالم بجوار مسجد الرحمن الرحيم امام دار المركبات .
24828057


3- مركز خدمة أبو رواش :-
الكيلو 28 القاهرة الاسكندرية الصحراوي , المنطقة الصناعية .
74 / 77 / 78 / 35391273

4- مركز خدمة شيل مرغم :-
الكيلو 23 مرغم طريق اسكندرية القاهرة الصحراوي .
03/2020301

مواعيد عمل مراكز الخدمة من 8,30 ص الى 4 م . ماعادا يوم الجمعة بيكون أجازة



- - لو فى اى استفسار عن قطع غيار بنقدر نستفسر عليها من خلال مركز خدمة غمرة او مركز خدمة ابو رواش .
, بالأضافة ان لو لقدر الله فى اى اصلاحات فى السيارة او سمكرة او دهان بيتم بردو من خلال مركز خدمة غمرة وابو رواش فقط , وطبعا بيتم حجز الاصلاحات من خلال مركز الخدمة نفسه مش من خلال خدمة العملاء , اما مركز خدمة صلاح سالم للصيانات الدورية والاصلاحات الخفيفة .



- - لو معاك سيارة بيجو وعايز تعمل فحص شامل طبعا هتكون ,
التكاليف للفحص الشامل 220 جنية شاملة الضريبة والمصنعية..




- طيب انا لو مش عايز احجز فى اى مركز خدمة رئيسى وعايز احجز فى مركز خدمة معتمد :-
تقدر تتصل بخدمة العملاء وتستفسر منهم على اقرب مركز خدمة معتمد وخدمة العملاء بتوضحلك اسم المركز ورقم تليفونه

انا طبعا هحاول اسهل الدنيا شوية عليكم وهوضح الاماكن اللى فيها مراكز الخدمة المعتمدة :-
" العجوزة – 6 أكتوبر – هليوبلس طريق السندباد – الجيزة – مصر القديمة – الكيلو 16 طريق القاهرة السخنة – مدينة نصر – شارع فؤاد فى اسكندرية "

وطبعا مواعيد العمل الخاصة بالمراكز المعتمدة مختلفة عن بعضها .


بالنسبة لما يخص الضمان :-

- انا اشتريت سيارة جديدة وعايز اعمل ليها صيانة بس مستلمتش كتاب الضمان هستلمه من مين ,, طبعاً انت بتستلم كتاب الضمان من المعرض اللى انت اشتريت منه السيارة

- ضمان السيارة الوكيل 3 سنوات او 100 الف كيلو متر ايهما اقرب بدايتا من سنة 2011 .

- قطعة الغيار التي يتم تغييرها داخل المراكز الرئيسية او المعتمدة ضمانها سنة ما عدا المستهلكات .

- ضمان عملية الاصلاح داخل المراكز الرئيسية او المعتمدة 6 شهور لا غير .



وأتمنى انى أكون قدرت افيد اى حد مكنش عنده علم بأى نقطه من اللى وضحتها

موضوع ممتاز ومعلومات هامه جدا

نرجو تثبيت الموضوع لأهميته



.