اقتباس المشاركة الأصلية كتبت بواسطة ya3mm مشاهدة المشاركة
السلام عليكم ورحمة الله وبركاته
انهارده عملت صيانة ال 10000 كيلو للنيسان صني الشكل الجديد 2013 على فكرة انا كتبت من شوية تقرير كامل عن اليوم لكن مش لاقيه سامحوني لو لقتوه متكرر
رحت مركز الصيانة اللي في الدقي حوالي الساعة تسعة ونص الصبح والحمدلله الطريق كان سهل وفاضي وكان المركز كمان رايق وفاضي واستقبالهم كان جيد جدا ، طلبت حل بعض المشاكل اللي قابلتها خلال الفترة اللي فاتت بالاضافة الى الحاجات الواجب عملها في الصيانة وهي كالآتي مع ردهم عليها علما بان المهندس اللي قابلني كان في غاية الذوق والادب والأخلاق وطولة البال
- التكييف كنت بحس ان تبريده ضعيف (قالي تم عمل اللازم من التشييك وتظبيط المكيف بس ما قاليش عملوا ايه)
- السماعة اللي في الباب قدام شمال ساعات بتقطع ( تم تظبيط السماعة ومعالجة التقطيع)
- سحب العربية كان ضعيف وخاصة مع المطالع او عند تهدئة السرعة ومحاولة استرداد السرعة مرة أخرى (تم تظبيط الموتور على الكمبيوتر)
- صوت الفرامل العالي جدا (تم تغيير الصاجة اللي موجودة في العجل والتيل والطنابير بحالة جيدة ولا تحتاج لتغيير)
استلمت العربية حوالي الساعة واحدة ونص وجربتها لمسافة صغيرة لغاية دلوقتي لسه ما حستش بحاجة لكن لاحظت ان دواسة الفرامل علت شوية لكن في المقابل لاحظت ان الكلبسات البلاستيك اللي كنت رابط بيها الطاسات زي ما هي ... مش عارف بقى ازاي فكوا العجل ولا هل ركبوا كلبسات من عندهم الله اعلم حيبان كل حاجة على الطريق
سالت المهندس عن برمجة الانذار ولوك الابواب مع السرعة قالي بفلوس لكن ما يعرفش اذا كان العربية دي فيها الاوبشن ده ولا لأ ووعدني انه حيسأل في المصنع ويرد علي
ياريت يا جماعة لو حد يعرف البرمجة دي بتم ازاي ... هل بالكمبيوتر ولا بخطوات معينة ما بين المفتاح والعربية
معاملتهم كان كويسة بصراحة وكانوا ذوق احقاقا للحق
المبلغ اللي دفعته كان 525 جنيه اللي هو الزيت والفلتر والمصنعية يبقى كده ما اخدوش حق الصاجة اللي اتغيرت في الفرامل
في حاجة بقى محيراني ومش عايزين يقولولي عليها لا في القاهرة ولا في اسكندرية ألا وهي ... ازاي اقيس زيت الجير بوكس علما بان العربية اوتوماتك قالي المهندس انهارده انهم مسؤولين عن موضوع الزيت ده ونقصه لاني مش حقدر اقيس الزيت بنفسي لكن نفسي اعرف ازاي بيتقاس
طولت عليكم ... اتمنى اي حد يستفيد من القصة دي ولو اي حد يعرف طريقة البرمجة ياريت يفدنا
شكرا لكم
محمد
مبروك الصيانة ومتشغلش بالك يزيت الفتيس ومتحاولش تلعب فيه هما ف الصيانه بيشيكوا عليه وهيغيروه فى معاده والفتيس اليابانى التقليدى ثبت كفاءته واعطاله نادره