الموضوع: تقرير صيانة 10000 صنى سوبر صالون وتغيير الطنابير والتيل فى الضمان

انهاردة عملت صيانة 10000 ....العربيه بعد استهلاك 9200 كم فى خمسة شهور مظهرش فيها الا صوت تصفير حاد( بس منخفض) مع بداية الفرملة والصوت كان بيظهر مرات ومرات ميظهرش وبدا يظهر عند بداية 9000 اشتكيت منه للمهندس المحترم فى اتوايجيبت ابو رواش و رحت داندى مول "خدمة عملاها اتوايجيبت ميكروباص يودى داندى مول لحين انتهاء الصيانة" رجعت المركز وقالى انهم غيروا التيل والطنابير لان التيل تاكل وعمل شفة فى الطنابير وطبعا التغيير فى الضمان الحقيقه انا كنت متوقع ينضفوا التيل وياجلوا التغيير لما الشكوى تزيد فا ده شىء ايجابى جدا انهم يغيروا حاجات ب 1400 جنيه من غير ما اطلب حتى
واضح ان التيل ده عيب نيسان معترفه بيه عشان كده بيغيروه وبيغيروا الطنابير لو كانت اتاثرت بس السؤال لحد امتى؟ هل حسنوا التيل ولا هنفضل نغير تيل كل 9000 كم؟؟؟
كان فيه صوت صفارة كده فى حوض الماتور بيظهر فى الاماكن الهاديه من ناحية اليمين وبيختفى بعد قفل الكونتاكت ب 20 ثانية ..المهندس قالى ده صوت طرمبه ال abs
تمم تغيير الزيت "توتال 10000" وفلتر هديه وخصم 15% وده عرض الصيانة اللى هيخلص يوم 12 اكتوبر وكمان فيه معطر اتوايجيبت هدية
شوفت كفر مريات باشارة ليد نازل للنيو صنى ب 278 بس مش عارف ده للاتنين ولا للواحده
لو لا قدر الله الكفرات اتجرحت ولا انكسرت يبقى الواحد يجيبهم هيدوا شياكه اكتر
غير كده العربية اداءها زى ما استلمتها
تقييمى للعربية لسه زى مهو انها صفقه رابحه وارخص عربيه بالكماليات دى معظم مشاكلها فى التيل والطنابير صحيح انه اى عيب فى عربية زيرو شىء سىء بس الحمد لله انه عيب حاجات مستهلكه وسهل تغييرها

المشاركة الأصلية كتبت بواسطة Meggieboy

ألف مبروك صيانة ال١٠٠٠٠، بالنسبة للصوت اللى حضرتك بتشتكى منه للأسف مفيش حاجة أسمها " طرمبة الabs"....يا أما المهندس مش فاهم و بيقول أى كلام و ده وارد جداً علشان مهندسين الأستقبال معلوماتهم محدودة أو أنه عارف و بيقول أى كلام علشان ميتعبش نفسه و يكشف على العيب....

الله يبارك فيك... هو مع احترامى لرايك مهندس الاستقبال استدعى مهندس مخصوص واول مسمع منى شاور ليا على جهاز abs جايز مش طرمبه بالمعنى المفهوم بس هو جهاز مربع كده وخارج منه مواسير وسلوك وفعلا الصوت طالع منه