الموضوع: البلد امتى هينصلح حالها

المشاركة الأصلية كتبت بواسطة mody112

استكمالا لموضوع الرشاوى وخصوصا فى المرور انا هقولكو على حاجة تانية حصلت معايا اول ما اشتريت عربيتى الجولييت ودى كانت اول عربية فى حياتى وكنت لسه جديد فى السواقة ولاول مرة بتعامل مع السواقين وامناء الشرطة وغيره وبصراحة كان عندى قناعة ان كل حاجة بتمشى بالفلوس المهم انا كنت ماشى بالعقد والرخص كانت منتهية والنمر الامامية مكنتش باينة كويس(انا والله اشترتها كده ومخدتش بالى ومعرفش انها فيها مشكلة مش بقولكو لسه جديد ) المهم كان قانون المرور الجديد ده لسه فى اوله وانا كان بقالى شوية ومش عارف ليه كنت مكسل اجدد الرخصة ( مش فاكر بصراحة ) وفى يوم مالوش ملامح اتمسكت فى كمين الكيتكات ( نقطة ثابتة ورخمة ) وبصراحة انا ياما اتمسكت هناك فاميه وبدفع 20 ج وبعدى ولا كان حد بيقولى الرخص منتهية ولا حاجة ال 20 ج ساعتها كانت بتفوتك من الحديد المهم وقع حظى مع ظابط مخله ( اللى هما كانو امناء شرطة وبيذاكرو ويبقو ظباط بس سنهم بيبقى كبير ورتبتهم صغيرة ) وكمان كان شكله وكلامه من الاقاليم(مع كامل احترامى لكل الناس) يعنى كملت وانا كنت ساعتها بتكلم فى التليفون ومش رابط الحزام والنمر المطموسة والرخص المنتهية والفاميه كمان عشان تكمل .
المهم وقفنى رخصك اتفضل ايه ده دى منتهية قلتله اه قالى طب اركن على جنب المهم ركنت وكل ده وانا بتكلم فى التليفون وخلصت التليفون وروحتله وبصراحة هو كان قليل الذوق فانا اتعاملت معاه بقلة ذوق قام قايلى عندك طمس لوحات ورخص منتهية ومحمول وحزام وفاميه قلتله ايه كل ده ما البلد كلها ولا بتربط حزام وبتتكلم فى المحمول وبتفيم قالى ما هو القانون الجديد بيمنع الحاجات دى قلتله قانون جديد ايه ده واتعمل امتى مانا بقالى فترة كبيرة بسوق وعادى يعنى قالى هو ده القانون الجديد قلتله طب شوف التصالح الفورى بكام وخلصنى (بصراحة هو نرفزنى جدا وكان لازم اعامله بقلة ذوق متناهية وخصوصا ان معظم ظباط المخله بيبقى عندهم عقدة تخيل واحد عنده بتاع اربعين سنة ويادوب معلق نجمتين وبيكلم خلق الله من طراطيف مناخيره وكانه لواء ) المهم شدينا مع بعض ودخلت اتكلم مع رئيس النقطة وكان عقيد وقلتله اللى حصل وانى مستعد للتصالح الفورى ودفع كل الغرامات دلوقتى قالى شوف الظابط اللى بره هيقولك ايه .
المهم الظابط اللى بره انا مديتوش وش فقام فاقعنى محضر او مذكرة حاجة كده مثبت فيها كل المخالفات اللى عندى وقالى هتروح تعمل فحص وتستلم النمر من المرور وموال وكل ده وانا برضه مش مديله وش .
المهم بعد ما مشيت روحت عملت النمر عند خطاط وظبطها وابتديت رحلة البحث عن الرخص ومالهاش اى اثر اسبوع واتنين ومفيش لا حس ولا خبر عن الرخص وانا ماشى بالبركة بالعربية لغاية ما لقيت واسطة وواسطة جامدة جدا جدا فى الداخلية وابنه كان لسه جاى الشركة عندنا جديد قلتله ع اللى حصل قالى تمام هات الايصال وجابهالى بعد يومين من غير لا فحص ولا اى بتاع ( برضه عشان الواحد يعرف ان البلد دى مفيش حاجة بتمشى فيها من غير وسايط )
المهم اخدت الرخص وروحت عشان اجدد تخيلو لقيت المخالفات اد ايه ؟؟؟؟؟؟؟؟؟؟ لقيت مخالفات 3000 ج طبعا مش هتصدقونى قلتله 3000 ج ليه ان شاء الله قالى هو ده المكتوب عندى قلتله طب انا هدخل لوكيل النيابة وعملت افلام هندى وزعقت وصوتى على وقتله انا عاوز اعرف المخالفات دى كلها ايه لقيته بيقولى انت ازاى الرخص معاك من غير ما تدفع المخالفات لما اتسحبت منك قلتله الواسطة وش (وساعتها كانت الواسطة مشيت من الشركة عندى ) قالى طيب ولاقيته بيساومنى على المبلغ وبينزل بالاف جنيه والله ده حصل وهو كل ما ينزل ازعق واعلى صوتى وهو ينزل وكده لغاية ما وصلو 320 ج اه والله 320 ج من 3000 ج ومرديش ينزل ولا مليم تانى بعدها ودفعت ساعتها 350 ج وهو قالى متشكرين ع الواجب يا باشا ( يعنى مفيش باقى ) .وده كان فى مرور تانى خالص غير بتاع المشاركة اللى فى الاول .وغيره وغيره وغيره .

يا راجل ده انتا شايل بلاوى ربنا يكون فى عونك