حل مشكلة دبرياج 405 المزمنة

**mahmoudmatrix** · 10-11-2013 12:26 AM

انا قررت اكتب الموضوع بعد ما عرفت ان 95% من اللى معاهم 405 بيعانو من حاجة اسمها "الدبرياج"

انا اشتريت العربية فى شهر 9 2012 (405 2003 ) وكانت عاملة 77 الف كيلو ( اة 77 الف ك بس) بس اشترتها غالية شوية بس عشان كانت حالتها فوق الممتازة

و من ساعة ما اشترتها و بدات اسوقها و انا بدات اكره اليوم اللى انزل فية اسوق العربية بسبب الدبرياج و اللى بيعملو فى رجلى بعد اول نص ساعة .... بالحالة دى كانت رجلى باظت و رجل الحاج كمان بس هو بيحب العربية و على قلبة زى العسل .. بعد استخدام 10 شهور بدات ادور اشوف و اسأل ميكانيكة متخصصين 405 ...على الدبرياج

6 ميكانيكة ياريس .... كل واحد اروحلة يقولى يابية هى 405 كدة ...دة كدة كمان عندك ناعم !!... يعنى مش محتاجة سلك جديد ؟؟؟ لا لا يا بية هو كدة والله ...انت بس اللى مش متعود علية
انا بصراحة مكونتش مقتنع ان الفرنسين اللى بيعملو عربيات مريحة يطلعو دبرياج زى الحجر كدة

طقت فى دماغى يوم ان هنزل و اجيب سلك دبرياج جديد و يا اما فلوسى تروح فى الارض ... او ان انا اطلع صح و الميكانيكية اللى سالتهم هما اللى مش بيفهمو ..

وقد كان...نزلت و سالت على انواع سلوك الدبرياج ....لاقيت فية اندونيسى ب 60 و فية نوع اسمة بندكس Made in EU ( اتحاد اوربى ) 100ج

قلت اجيب حاجة كويسة عشان يبقى شغل على نضيف و جبت البندكس

وطلعت بية على مكانيكى اسمة "الدكتور" و دة بتاع قطع غيار و تصليح كل حاجة تبع 405 و فية ناس كتيير تعرفة فى المنتدى

روحتلو و جرب الدبرياج قلى هنجرب نغير سلك الدبرياج قلتلة معايا ...بدا يفك البطارية و القاعدة بتاعتها و فك السلك "بفهم" لان لو حد فكوة مش صح هيكسر فبرة موجوده مابين السلك و صاج العربية و هتجبها ب 20 او 30 ج.... طلع السلك ...السلك مش بيتحرك من الجراب!! ...يعنى انا كنت بدوس بحركة بقوة الدفع انما هو مش بيتحرك اصلا ....ركب الجديد ... و قالى تعالى جرب كدة ....ادوس !! ملبن !! زى اى عربية كورى الدبرياج بتعها ناعم ...قاللى كدة مضبوط ولا محتاج حاجة ؟؟ ...قلتلة انا مش عارف احس بية اصلا من كتر ماهو ناعم ..اهم حاجة اضبطهولى بحيث يبقى مضبوط مع الاسطوانة و الدسك .... رفعو سنة بسيطة ... و قفل على كدة و خد 50ج بس انا مفصلتش معاة لانى بصراحة كنت مبسوط لدرجة انى مش عاوز افاصل معاة

تم تغير السلك فى شهر 9/2013 و كدة بقالى 3 شهور على التجربة دى و اقدر اقول انها تجربة ناجحة بنسبة 100% بتكلفة 150ج بس هتغير حياتك من دبرياج العربية خالص

ملاحظات :
1: شراء سلك الدربياج "بندكس" لضمان جودة السلك
2: ميكانيكى شاطر و فاهم عشان يغير سلك الدبرياج صح من غير ميحك فى اى حاجة
3: عدم وضع اى اضافات على سلك الدبرياج" لا تشحيم ولا تزيت ولا فزلين..ولا اى حاجة ..من الكيس بتاعة على العربية...

**حماده المصري** · 10-11-2013 02:04 AM

الحمد لله

انا سوقت كزا وحده كانوا بصراحه قرف فوق المعتاد

وكان في وحده قدامي مشترتهاش عشان خاطر الدبرياج بتاع العربيه دي فعلا كان مقرف

بس كده المشكله محلوله

ربنا يعله في ميزان حسناتك

**mahmoudmatrix** · 10-11-2013 01:10 PM

المشاركة الأصلية كتبت بواسطة حماده المصري

الحمد لله

انا سوقت كزا وحده كانوا بصراحه قرف فوق المعتاد

وكان في وحده قدامي مشترتهاش عشان خاطر الدبرياج بتاع العربيه دي فعلا كان مقرف

بس كده المشكله محلوله

ربنا يجعله في ميزان حسناتك

الف شكر.. :)

**the-hero** · 10-11-2013 02:43 PM

ال 405 وباقى انواع البيجو بشكل عام عربيات مينفعش معاهم غير قطع غيار أصلية وأى نوع تانى العربية بتتعك وبتخش فى دوامات مشاكل

**mbx4e** · 10-11-2013 05:05 PM

امال لو ركبت البيجو الاصلي ابو 225 جندي تعمل ايه او البندكس الاصلي الفرنساوي
انت على فكره مركب بندكس من نوعيه جيده بس طالما اللي انت مركبه جاب نتيجه يبقى مافيش مشاكل وزي الفل المهم الدكتور دا فين ؟
انت عارف ان واير الدبرياج اللي من نوعيه جيده ممكن يقعد اد ايه في العربيه ممكن يقعد معاك 7 او 8 سنين على حسب استخدامك وطريقة التركيب سليمه والزبط سليم ولا اي كلام ؟

**mahmoudmatrix** · 10-11-2013 05:41 PM

المشاركة الأصلية كتبت بواسطة the-hero

ال 405 وباقى انواع البيجو بشكل عام عربيات مينفعش معاهم غير قطع غيار أصلية وأى نوع تانى العربية بتتعك وبتخش فى دوامات مشاكل

انا بشكرك على مشاركتك فى الموضوع... و عاوز انا اللى اشكرك على مواضيعك اللى استفدت منها كتير ....بس يبقالك كتير مشاركاتك قليلة فى المنتدى ... اتمنى يكون المانع خير :)

**mahmoudmatrix** · 10-11-2013 05:54 PM

المشاركة الأصلية كتبت بواسطة mbx4e

امال لو ركبت البيجو الاصلي ابو 225 جندي تعمل ايه او البندكس الاصلي الفرنساوي
انت على فكره مركب بندكس من نوعيه جيده بس طالما اللي انت مركبه جاب نتيجه يبقى مافيش مشاكل وزي الفل المهم الدكتور دا فين ؟
انت عارف ان واير الدبرياج اللي من نوعيه جيده ممكن يقعد اد ايه في العربيه ممكن يقعد معاك 7 او 8 سنين على حسب استخدامك وطريقة التركيب سليمه والزبط سليم ولا اي كلام ؟

انا دور و سالت عند كل بتوع قطع الغيار الاصلية للبيجو و لقيت ان البندكس هو اللى موجود و دة الاصلى ...خد بالك ان اتحاد اوروبى داخل فية فرنسا ... و قطع الغيار الاتحاد الاوربى تكاد تكون زى الفرنساوى 90% او اكثر ...لانهم بهتمو بجودة المنتج لنفسهم اولا

بالنسبة لمحل الدكتور دة فى اول طريق الزقازيق .... اول 2 او 3 كيلو من الطريق يعنى مش سفر ولا حاجة ...من الحرفيين ميكملش 10 دقائق و ده نمرتة لو عاوز فى اى وقت تروحلة : 01117222107

**badry78** · 10-11-2013 08:39 PM

الميكانيكي اللي غيرلك السلك حسين و للا جمال ؟
اصل أنا عملت شغل كتير هناك و عارفهم كلهم :)

**mohamedadelemam** · 10-11-2013 08:53 PM

يا فندم انا فى ال405 فعلا السلك الاصلى كان فيه حته مكسوره من فتى التوكيل كانت مخلياه ناشف اوى اللى هى مكان دخول السلك فى الفبره اللى قبل مكان ربط الصاموله (تقريبا عملوا كدا فى صيانه ال5000 فى كل العربيات مش فاهم ليه) بس بعد كدا اشتريت الاصلى بتاعها كان ب175 جنيه من حوالى 4 سنوات بقت فعلا ملبن وبستغرب جدا من الناس اللى بيقولوا على دبرياج ال405 تقيل

**mahmoudmatrix** · 10-11-2013 09:11 PM

المشاركة الأصلية كتبت بواسطة badry78

الميكانيكي اللي غيرلك السلك حسين و للا جمال ؟
اصل أنا عملت شغل كتير هناك و عارفهم كلهم :)

انا بصراحة عندى زهايمر فى الاسماء بس بصراحة كلهم فاهمين... لانهم بيشتغلو فى ال 405 و 406 بس من اول السمكرة و الدكو لغايت اخر مسمار فى العربية .... التخصص حلو :)