الموضوع: تقرير اول سفرية بالامجراند بعد صيانة الالف

بسم الله الرحمن الرحيم

ازيكم يا جماعة النهاردة عملت اول سفرية بالايمي بعد صيانة الالف وبقول ايمي لاني الحمد لله راضي عن العربية ...

السفرية كانت زي المرة الي فاتت 239 كيلو مسافة اجمالية
الطريق يتقسم ل 4 اجزاء رايح وزيهم راجع ...
الذهاب .اول جزء من السفرية علي متوسط سرعة من 60 ل 80 وطبعا معا توقف كتير عشان الزراعي للاسف
الجزء التاني . كانت السرعة من 80 ل 100 وبرضو معا توقف بس مش زي الجزء الاول
الجزء الثالث . سرعة من 5 ل 10 لمدة نص ساعة لان الطريق كان واقف
الجزء الرابع . سرعة من 100 ل 120
العودة ..
متوسط سرعة من 100 ل 110 اول جزء
الثاني الطريق واقف من 5 ل 10 لمدة ربع ساعة
الثالث من 60 ل 80 وقليل اوي وصلت ل 100
الرابع سرعة متعديش 5 لان الطريق واقف نص ساعة

تقييمي للعربية ..
السحب . افضل شوية بعد صيانة الالف وفي المجمل قبل 3 ار بي ام متوسط من 3 ل 3 ونص اخري في النقل جيد جدا معا ملاحظة ارتفاع صوت الشكمان اوي كأني مركب شكمان الي بيعمل صوت عالي
الثبات . ما شاء الله ممتازة وعملت غرز كتيييييييييير وزي الفل ما شاء الله
العفشة . مازالت ناشفة وبحس بكل هبدة في الطريق وحاسس اني راكب مرجيحة
الفرامل . ما شاء الله جميلة جدا رغم اني بحس كتير اني هلبس معا اني بقف قبل العربية الي قدامي بمسافة كبيرة بس الفرامل جميلة جدا وبتوقف بسرعة
الكراسي . هية طريت شوية لاكن ما زالت زبالة انا نازل من العربية ظهري واقف
التكييف . كنت مشغل الساخن ما شاء الله جميل جدا بس ماعرفش الساقع عامل اية انا حكمي علي الساخن بس و في الصيف ان شاء الله هقول تقييمي النهائي للتكييف
العزل . ما شاء الله ممتاز لحد 3 ار بي ام بحس ان الشكمان بيقلي نحن هنا وبيمسي عليا
الحجات الي زعلتني في السفرية الكاسيت ابن التيت علق مني مرتين وشغلتة تاني غير كدة كل حاجة تمام ما شاء الله
تقييمي الاجمالي عن العربية الحمد لله جميلة جدا وراضي عنها حتي الان ودعواتكم ربنا يديمها عليا نعمة ويباركلي فيها ...
السحب 7/10
الثبات 9/10
العفشة 5/10
الفرامل 9/10
العزل 8/10
التكييف 8/10
الراحة في الكراسي 6/10
الكاسيت 3/10
استهلاك البنزين 8/10
( انا محسبتش الاستهلاك بالظبط بس جوة البلد معقول وعلي الطريق السريع ونقل علي 2 ونص ار بي ام الحمد لله جميل جدا ) وتقييمي دة لاني بفول كل 3 ايام بالكتير وبشوف اخدت بنزين قد اية ودي حسبة تقديرية مني

ان شاء الله التقرير الجاي علي صيانة ال 5000 بأذن الله تعالي