الموضوع: لو معاك ١٩٥ الف تجيب جديد ولا يوزد محترم !؟

المشاركة الأصلية كتبت بواسطة corolladestroyer

يا باشا انا فعلا كنت مكانك وكان معايا لحد 230 الف وبرضو نفس الكلام شويه قرايبي شويه.صحابي ورحت فعلا بصيت على المستعمل وكان قدامي بي ام 2011 ب 220 و ميني كوبر ب 190 وووو مش هعد بس في الاخر ربنا هداني وجبت الجولف ومبسوط وراضي ومقتنع جدا باختياري بالذات بعد اما ركبت العربيات دي وركبت عربيتي عربيتي....

لا انت كده اجدع منى يا عم وعرفت تاخد القرار المصيرى ده بسرعه،،،المشكله ان كان معايا بيكانتو ولسه بايعها والعربيه الجايه ان شاء الله مش حفرط فيها قبل ٨..٩ سنين فبحاول اختار احسن صفقه من كل النواحى،،،بس انا بدأت اميل لموضوع الاسترا،،،،خطوه البى ام حاسسها بدرى عليها شويه يمكن لما يبقى عندى ٤٠ سنه ولا حاجه،،،،ربنا يباركلك فى عربيتك ويديك خيرها ويكفيك شرها،،،،،سيادتك معاك جولف كام لانى كنت حاطط عينى عليها بس قولت اخد الخطوه الجريئه واجيب سيدان بعد مكنت مقتنع جداً بالاسترا الهاتش باك

المشاركة الأصلية كتبت بواسطة j a g u a r

لو حالتها نضيفه مش هاتعورك غير فى الصيانات والله اعلم اذا كان فيها حاجه مستخبيه .. ونصيحه منى لو خايف من مصاريف البى ام حتى لو قدر الله كانت نضيفه وطلع انها احتاجت مصاريف يبقى بلاش منها خالص .. يعنى بمعنى اصح لو هاتركب بى ام تبقى قد مصاريفها .. مع احترامى طبعا لحضرتك .

كلامك مظبوط طبعاً بس بصراحه انا بحب اشترى دماغى ومش غاوى فرهده انى لسه انزل والف على عربيه واكشف عليه ويطلع فيها حاجه واحتاس فى تصليحها،،مع العلم ان الحمد لله فيه القدره انى اجيب بى ام جديد مش مستعمل،،،بس النقطه فى راحه البال وانى ابقى مطمن ان عربيتى انا اول واحد يركبها،،،اتكلنا على الله،،،اوبل ان شاء الله،،،بس تعالالى بقى،،،،استرا ولا انسيجنيا هههههههههه.

المشاركة الأصلية كتبت بواسطة abdo taha

هو اكيد ركوبة البي ام حلوة و كل حاجة و هتبقى احلى من الاسترا بس لما تشتري زيرو و تبقى ريحة الزيرو في الاول و تحس انك راكب حاجة بتاعتك كأنك في بيتك ليها احساس و طعم تاني و تلاقي العربية جاية بأكياسها و متلمستش ليها ارتياح و امان تاني خالص + انك مش هتصرف كتير عليها في الاول يدوب الصيانات الدورية و كده كده انت في الضمان فلو حصلت مشكلة جامدة لا قدر الله مش هتلبس في الحيط لكن لو بي ام و طبعا قطع غيارها اغلى من الاسترا حصل فيها مشكلة كله هيبقى محمل عليك و هتبقى محتاس فمدخلش نفسك في متاهات و على فكرة قطع غيار الاسترا معمرة برضه مش سكة يعني ده عند الوالد الفيكترا سي عنده مغيرة سير الكاتينة عند ال 100 الف و لسة مغيرناش طرمبة المية اللي المفروض تتغير من 60 الف كيلو فاتو فمفيش قلق في النقطة دي يبقى كده الاسترا تكسب في نظري بس بصراحة لو انت عندك اسرة و معاك كتير في العربية بلاش الاسترا عشان كنبتها ديقة لكن لو انت شاب او معظم الوقت لوحدك خليك في الاسترا و الطابلوه الرائع بتاعها و ده كان رأي المتواضع لحضرتك و بالتوفيق ان شاء الله

كلام سيادتك قفل كل الكلام،،،، انا كنت باصصلها من وجهه نظر انى شاب لسه وبفكر ادخل عش الزوجيه قريباً فنوعاً ما برضه البى ام ليها وضعها ومكانتها وبريستيجها،،،،والحمد لله عندى القدره انى اصرف عليها،،بس كلامك سليم جداً لازم اكون عامل حسابى فى اى مطبات ممكن تطلعلى فى اى عربيه يوزد،،،،

اتكلنا على الله واتشرفت بردك عليا هنا وهناك يا باشا حقيقى

المشاركة الأصلية كتبت بواسطة land_cruiser

الزيرو افضل علشان هتبقي موديل السنه و هيبقي معاها ضمان لكام سنه قدام و تقدر تأمن عليها و بالتالي فهي اريح في الاختيار و في الرينج ده الاسترا حلوه و في كمان ix35 و قاشقاى و فلوانس . المستعمل اصعب في الاختيار و ان كان مهم قوي ان حضرتك تكشف عليها كويس في التوكيل و تكون ماشيه كيلومتر قليل . النصيحه لحضرتك انك تبدأ البحث علي مستعمل كسر زيرو في الرينج اللي حضرتك محدده و تشوف بنفسك و تتفرج و لو ما لقتش حاجه تعجبك يبقي عندك الزيرو .احيانا و انت بتدور ممكن تلاقي حاجات كويسه بس لازم تصبر و تكشف علي العربيه كويس تجنبا للمفاجآت الغير سعيده

متفق معاك جداً هو بس اللى كان مطمنى انى افكر فى مستعمل،،انها بى ام فبالتالى حتكون حاجه مضمونه برده ومفهاش قلق كبير،،،بس زى محضرتك قولت محتاجه انى اقعد الف كتير وادور والكلام ده مش حيبقى سهل بالنسبالى لطبيعه شغلى،،،والخيارات اللى حضرتك قولت عليها دى انا كنت بفكر فيها بس استبعدتها لما قارنت ما بينهم وبين الاسترا لانها اعلى منهم فى مواصفات الامان والاعتماديه وعوامل الرفاهيه،،،،باختصار عربيه العمر الطويل

المشاركة الأصلية كتبت بواسطة silent~dream

الامر فى الاول و فى الاخر راجع ان حضرتك مايل لايه اكثر و عايزه طبعا معظم عربيات البلد دى بتتهان من الطرق ده غير فيه ناس كثير جدا يجيبوا العربيه زيرو و ينساها فتره طويله حتى ميغيرش فيها الهوا ولا صيانه دوريه ولا اى حاجه و بعدين يبيعها والى يشتريها بقى يبدا يلبس فى الحيط فرايى خليك فى الجديد لو مش عايز وجع دماغ خالص خصوصا ان حضرتك هتجيب عربيه محترمه زى الاسترا ايوه كل الجديد غالى و سعره مبالغ فيه فى مصر بس انت مش هتجيب عربيه تعبابه و سعرها عالى و خلاص زى ما ينشوف عربيات كثير لكن الاسترا عربيه كويسه جدا و محترمه و ثباتها عالى و ادائها بشكل عام كويس و فخمه و شيك بصراحه تحفه من اوبل وممكن بردو تشوف الفلوانس 2014 فيس ليفت بردو تحفه فنيه رائعه لكن لو حضرتك غاوى و حابب bmw يبقى لازم حاجتين اولا تصبر شويه لحد ما تقع على حاجه نضيفه و سعرها معقول و طبعا كشف و فحص و تمحيص فى التوكيل و من حضرتك و من اى صديق حته زى ال bmw i320 e90

كلام سيادتك مظبوط جداً،،،،بس اعتقد ان اللى شارى بى اى بمبلغ وقدره صعب اوى ان يهمل فيها او ميعملهاش الصيانات الدوريه بتاعتها،،،ومعظم اللى بيبيع النوع ده من العربيات بيبعها عشان يجيب حاجه احدث مش عاشان يخلص منها،،،،بس انا متفق معاك جداً فى حته ان الاوبل حتريحنى وتريح بالى ولا بقى اشيل قلق ان يكون فيها حاجه مستخبيه وكده

الف شكر على النصيحه :))