الموضوع: استلمت العربية وعملت حادثة

قدر الله وما شاء فعل وإحمد ربنا إن العين جت على قد كده , خد بالك من نفسك يا باشا ومن عربيتك ويا سلام لو تخودها معاك البيت وإنت طالع

أنا نزلت: آسف ، كنت بفادى الراجل ومخدتش بالى.
هو: وأنا أعمل ايه؟.
أنا: مش عارف ، أنت عاوز ايه؟.
هو: العربية مش بتاعتى وانا شغال عليها.
أنا: طب فين صاحبها؟.
هو: فى السيدة.
أنا: وانا المفروض استناه؟ خد كلمه.
هو: أيوة يابو هدير ، فيه واحد ملاكى خبطنى من ورا وعجن الحتة اللى ورا دى خالص.
أنا: عجنت ايه يا عم انت هتمثل.
هو: آه .. طيب طيب ماشى يابو هدير (وراح قافل وادانى الموبايل).
أنا: انت بتقول للراجل عجنت ايه بس دة الرفرف ممكن تعدله بإيدك.
هو: يا باشا الرفرف داخل لجوة خالص والحتة اللى وراه معادتش نافعة خالص.
أنا: ازاى بس يا عم ، طب انت عاوز ايه دلوقتى ، قالك ايه؟.
هو: معرفش يا بيه انت تصلحها.

هو اظاهر كان مستنى اديله 100 جنيه ولا حاجة ، انا فعلا كنت ناوى اديله فلوس لو كان طلب أو حدد مبلغ معين بس لما لاقيته بيستهبل ...

أنا: طب اطلع بينا عالبنزينة نصلحها.
هو: لا يا باشا مش طالع فى حتة.
أنا: يعنى مش عايز تصلح ، طيب ماشى (رحت مكلم ابو هدير).
أنا: دلوقتى يا ريس كل اللى حصل فى عربيتك كذا وكذا ، مش عارف بقى الراجل بتاعك بيقول عجين ايه وبتاع ايه وبقوله اطلع عالبنزينة اصلحهالك مش عايز ، فخلص معاه عشان انا مش هفضل واقف مستنى كتير (ورحت مديله الموبايل).
هو: ماشى يابو هدير .. حاضر .. والله العظيم ما غلطتى حتى اسأله .. خلاص يابو هدير .. مع السلامة (وراح قافل معاه وادانى الموبايل) ، خلاص يا بيه.

ورحت ماشى