ملاك لانسر شارك 2014 واهلا بالجميع

**محمد سمير حسين** · 19-07-2014 02:06 PM

المشاركة الأصلية كتبت بواسطة mido102

استاذ محمد سمير بس هيا فقيره اوي من جوا مجدا يعني بس والله ده مش معناه حاجه وولي هيغير رءي في الشرا لاني مش هركب كوري حتي لو بيتكلم

استاذ ميدو ربنا يوفقك للاصلح وكل واحد بياخد نصيبه حتي لو حضرتك غيرت رايك لحاجة انت مقتنع بيها فده في حد ذاته خير باذن الله موضوع بقي ان العربية فقيرة من الداخل بيالفعل هي فقيرة مقارنة بالكوري او حتي بالياباني (كورولا اقصد) بس لاحظ حضرتك حاجة ان الكوري (السيراتو مثلا) لما حب ينزل اوبشن في العربية وصل السعر ل 150 الف جنيه ودي اول فئةاوتوماتيك والكورولا لما نزل اوبشن وصل سعر اول فئة اوتوماتيك ل180 الف جنيه قارن الفروقات وانت هتلاحظ الفرق ده كده السيراتو(الكوري) اغلي من الشارك (الياباني من اول المسمار لحد الفتيس) ب15 الف جنيه في اول فئة والكرولا اغلي بحوالي 45 الف جنيه فنصيحة لو حضرتك تقدر تجيب الكورولا توكل علي الله لو حضرتك مش فارق معاك كوري او يابني ومهتم بالاوبشن هات سيراتو (بس هتزود شوية فلوس) لكن انا بصراحة بحمد ربنا ان اشارك مافيهاش اوبشن لان لو كان فيها اوبشن كانت هتغلي مش اقل من 20 الف جنيه وماكنتش هتبقي ارخص عربية ياباني في مصر في هذه الفئة السعرية)وبصراحة انا رايي ان انا اقدر اتعايش مع اي اوبشن ناقص وممكن ازوده براحتي بعد كده

**ahmedarefsaad** · 20-07-2014 05:19 PM

انا بفكر فعليا فى الشارك ادعولى و قريت ال 59 صفحه اللى كانت بيتلخص الكلام فيهم عن مواصفات العربيه و مقارنتها بفأتها مع العلم ان العربيات اللى معروضه من فئتها اقل منها بكتير بس كل الخوف فى ان الشارك بقالها فتره ماتغيررتش من 2008 يعنى فمعنى كده ان ميتسوبيشى ممكن تنزل لانسر تانى قريب و ده مش عندى خبر واضح بس بالنسبه للناس اللى بتحاول تقاررن بين " دايموند - الرواس - هاى تريد " انا دورت فى الموضوع ده ف لقيت ان دايموند هوه الوكيل الرسمى لميتسوبيشى فى مصر ف هوه الأحسن لاكن الرواس اكبر منافس ليه و انه نازل بالموديلات الخليجى و خدمه ما ببعد البيع لاكن هاى تريد مفيش اى معلومه عنه واضحه غير انه فرز تالت و فى موضوع حبيت اشاركم فيه على شان اطمنكم

غضب فى «ميتسوبيشى - مصر» بعد تخفيضات «الرواس» على السيارات الخليجى وخدمات ما بعد البيع - جريدة البورصة

**ahmedarefsaad** · 20-07-2014 05:24 PM

كل فئات اللى نازله مصر بس كل اللى محيرنى هل فى فرق بين الفئه التانيه و التالته فى عفشه العربيه ولا لا و هل الفئه التالته فيها طاره مالتى ولا لا

**p.p.p** · 20-07-2014 05:43 PM

سؤال ؟
ازاي اقدر الغي صوت تنبيه حزام الامان اصله مزعج جداً ؟

**محمد سمير حسين** · 21-07-2014 12:23 PM

المشاركة الأصلية كتبت بواسطة p.p.p

سؤال ؟
ازاي اقدر الغي صوت تنبيه حزام الامان اصله مزعج جداً ؟

يفضل يا باشا تعود نفسك تلبس الحزام ولو حد قالك افصلك الصوت ماتفصلوش ده امان ليك

**محمد سمير حسين** · 22-07-2014 09:44 AM

المشاركة الأصلية كتبت بواسطة ahmedarefsaad

كل فئات اللى نازله مصر بس كل اللى محيرنى هل فى فرق بين الفئه التانيه و التالته فى عفشه العربيه ولا لا و هل الفئه التالته فيها طاره مالتى ولا لا

مافيش فرق مابين العفشة كلهم واحد وماتقلقش شكل الشارك غالبا هيستمر لان لانسر ايفو 2015 نزلت بره بنفس الشكل بتاع القرش والله اعلم

**hasan_m7** · 23-07-2014 07:04 PM

يا رجاله بما اني ان شاء الله مقبل على الانضمام للشركاويه..يا ريت لو حد معاه هاي لاين او الفئه اللي قبلها يحوطلنا شوية صور كدا للمقصوره الداخليه مثلا و الكماليات و كده و شكرا

**n_salamaly** · 25-07-2014 11:40 PM

سؤال للاعضاء الكرام
هل الشارك يابانى بالكامل و لا تجميع تركى او اردنى او جنوب افريقى زى الكورولا؟؟؟؟

مع الشكر

**عمرو السويس** · 27-07-2014 04:17 PM

السلام عليكم جميعا، انا الحمد لله اشتريت عربيتي الجديدة لانسر شارك الفئة التانية ، عامل بيها دلوقتي 1300 كم و عندي كام ملحوظة
1 صوت الماكينة عالي شوية بعد 120
2 الفرامل بحس انها تقيلة
3 السحب بيتأثر و التكييف شغال
ممكن اعرف رأيكم ايه في الملاحظات؟ و ازاي اقدر اعالجها
غير كده العربية ماشاء الله ممتازة

**heshhesh** · 27-07-2014 06:16 PM

المشاركة الأصلية كتبت بواسطة عمرو السويس

السلام عليكم جميعا، انا الحمد لله اشتريت عربيتي الجديدة لانسر شارك الفئة التانية ، عامل بيها دلوقتي 1300 كم و عندي كام ملحوظة
1 صوت الماكينة عالي شوية بعد 120
2 الفرامل بحس انها تقيلة
3 السحب بيتأثر و التكييف شغال
ممكن اعرف رأيكم ايه في الملاحظات؟ و ازاي اقدر اعالجها
غير كده العربية ماشاء الله ممتازة

هو ماكينه الشارك صوتها عالى حبه
قلهم على الفرامل فى صيانه و هتتظبط
انا برده كان التكييف ماثر معايا بس بعد ملينت ووصلت لل 2000 كيلو بيتحسن