الموضوع: ملاك لانسر شارك 2014 واهلا بالجميع

المشاركة الأصلية كتبت بواسطة amr_8800

كلام حضرتك مظبوط جدا جدا
العربيه فعلا اكتر من ممتازه وتستاهل كل قرش بيدفع فيها
والسبب في ان سمعتها وحشه هو التجار والصنايعيه الي هيموتو لو عرفو ان البومه هيتوفق انتاجها السنه دي
بس لو تلاحظ كل الي بيقول على العربيه دي وحشه او مش كويسه هتلاقيه عمرو مركبها ولا حط رجلو فيها كلو هيقلك اصلي سمعت اصلي حكولي
انما اسمع من ملاكها بقا هتلاقيهم بقولو فيها شعر عشان ميعرفش قيمة الشارك غير الي راكبها
حتى من ايام المكنه القديمه ال 1500 برضو

انا كنت راكب بومه واقدر اقولك الفارق كبييييييير اوي اوي طبعا لصالح الشارك
مع احترامي لكل ملاك البومه (البومه عربيه محترمه فعلا بس الشارك حاجه تانيه خالص)

ان شاء الله الايام الجايه ايام الشارك
لانها تعتبر ارخص عربيه ياباني في مصر

والله كلام حضرتك في الجون وبالاخص ان كنت بسال علي العربية قبل ما اشتريها كان في ناس بتقول حلوة اسالهم ايه امميزات اللي فيها يقولولي المميزات كلها الاقيها مقنعة جدا وناس تانية اسالهم يقولولي لا دي وحشة ابعد عنها طبيعي بقي اسالهم علي العيوب يقولولي مش عرفين بالظبط بس هو معروف عنها كده انها مش حلوة حتي بص عليها في الشارع وانت هاتلاقيها مش منتشرة (طبعا سبب عبيط جدا اني ماشتريهاش علشان مش منتشرة )يعني هي لو منتشرة هتبقي حلوة طب مانت عندك الفيرنا واللانوس والصني الجديدة والافيو وووو منتشرة ولو سالت علي عيوبهم هتلاقي 100عيب من ضمن العيوب اللي اتقالت برده ان قطع غيار الشارك غالية قولت خلاص يبقي اكيد البومة احسن علشان كده وبحكم طبيعة شغلي اني انا مهندس لذلك انا لا اعترف الا بالارقام فقررت اروح التوكيل واسال علي قطع الغيار واعمل مقارنة بين الشارك والبومة بالفعل لاقيت الشارك اغلي في بعض القطع بس عارفين الفرق كام 40 جنيه و50 جنيه يعني مش ارقام جامدة وعلي فكرة في قطع لاقيت البومة اغلي من الشارك فيها فعرفت فعلا ان كل اللي بيقول وحشة فهو بيتكلم بطريقة سطحية لان اسبابه كلها ليس لها اساس من الصحة وبالنسبة للنقطة التانية اللي حضرتك اضفتها دي نقطة مهمة جدا الا وهي انها ارخص عربية ياباني في هذه الفئة السعرية مش بس كده دي كمان بتتجمع في اليابان مش زي العربيات التانية اللي بقت بتتجمع خارج اليابان

المشاركة الأصلية كتبت بواسطة Omar Gamal

أستاذ عمرو، ألف مليون مبروك على العربية و ربنا يكفيك شرها و يباركلك فيها يا رب.

كان بودي اسأل حضرتك كام سؤال بس بخصوص الهايلاين 2014 اللي معاك لأني حاجزها من دايموند و عندي كام حاجة محيراني:

1. حضرتك معاك أنهي لون؟ و هل فرشها بيج؟ في التوكيل وضحولي إن كل ألوان الهايلاين فرش بيج فقط.
2. هل فيها AUX؟
3. إيه أخبار كواليتي الصوت ال 6 سماعات unique audio بعد ما اتشال الروكفورد فوسجيت؟
4. فتحة السقف بتفتح كاملة ولا بتميل فقط؟ الجدع اللي في دايموند قالي بتميل بس مابتفتحش لكن شكله مبيفهمش حاجة.

ألف مبروك العربية مرة تانية.

اهلا بحضرتك ويا رب تستلم على خير
على فكره انا حجزت الهاي لاين واستنيتها شهرين
وكانو كده دفعه تيجي يقولولي مش فيها هاي لاين تغالى استلم الفئه الثالثه وانا كنت بقول لا

المهم بقا
بص يا سيدي انا معايا الون اسود والفرش بيج كان نفسي يكون اسود بس قالولي كل الهاي لاين بتنزل بيج
عموما هما عملو فيها حاجه حلوه عن القديمه انهم خلو الفيبر بتاع العتب الداخلي الي هو في الارض والموكيت بيبقا داخل تحته عملوه لونه اسود مش بيج زي القديمه
لان القديمه البيج كان بيبان فييها الخرابيش موووووت

اما بالنسبه لموضوع aux هو الكاسيت فيه ابشان ليه بس فعلا الفتحه انا مش لاقيها خالص في اي مكان

اما بالنسبه للصوت فهو ممتاز والتاتش اسكرين مخلي شكل التابلوه روعه عن الفئات الي قبلها طبعا
والنسبه لموضوه الصب الي محيرهم شويه يشيلوه وشويه يحطوه فانا مفرقش معايا اوي لاني كده كده عندي بازوكه كين وود 1400 وات كانت في العربيه القديمه ركبتها في الشارك تاني يوم حتى قبل ما ارخص

فتحة السقف بتميل ويتفتح كلها عادي زي اي فتحه وممكن تفتح جزاء صغير منها بس زي ما انت عايز يعني
متقلقش الفتحه عاديه زي اي عربيه بتفتح وبتعمل كل حاجه بس هيا لما بتغمل اماله او tilt طبعا بيبقا شكلها تحفه وطبعا عو انا اخري اعمل اماله عشان مبفتحهاش عشان التراب والصالون بيج هيبقا زباله

وربنا يتملك وتستلم على خير بس مدققش اوي في موضوع اللون يعني لو اي لون كويس جه استلم على طول عشان بتيجي بأعداد صعيره اوي بجد ممكن تستنى كتييييير
هما قالولك الاستلام امتى؟؟؟

متشكر جدا لرد حضرتك، أفدتني و ساعدتني كتير والله.

النهارده أنا كلمت مسئول المبيعات في دايموند أكدلي بالفعل فتح و إمالة السقف، و للأسف أكدلي إن فرش الهاي لاين كله بيج - و بقول للأسف عشان أنا حجزت الفيراني و شكل الفرش البيج عليها فعلا سيء، و حتى لو هعمله أسود التابلوه بيج برده فإن شاء الله هغير اللون لون الحجز لأسود.

في حالة الفيراني: استلام آخر شهر 4.
في حالة الأسود: استلام ممكن يوصل لآخر شهر 5 لأن على حسب كلامهم اللون ده بالتحديد قليل.

بالنسبة لل AUX، قالولي إن العربية مجهزة ليه لاكن سلكه سايب و محتاج يتعمله واصلة عند أي كهربائي فتطلع من المنطقة السودة الفاضية اللي تحت أكر التكيف..ده هبل طبعا، بس على الأقل بتتعمل.

حضرتك تصنف الصوت عالي و نقي و جودته عالية؟ سمعت من ناس معها الفئات الأقل إنه نقي بس ال bass بتاعه ضعيف شوية و هل الصوت نفسه عالي ولا واطي شوية؟

سؤالي الأخير: ازاي تحافظ على اللون الأسود في البلد الغريبة دي؟ حاجة صعبة فعلا. هل حضرتك منزعج من عزلها أو صوت موتورها أو العفشة أو الكاوتش ناشف جدا لدرجة تضايق؟ يا ريت تقولي رأيك

و أشكرك جدا مرة تانية

المشاركة الأصلية كتبت بواسطة Omar Gamal

متشكر جدا لرد حضرتك، أفدتني و ساعدتني كتير والله.

النهارده أنا كلمت مسئول المبيعات في دايموند أكدلي بالفعل فتح و إمالة السقف، و للأسف أكدلي إن فرش الهاي لاين كله بيج - و بقول للأسف عشان أنا حجزت الفيراني و شكل الفرش البيج عليها فعلا سيء، و حتى لو هعمله أسود التابلوه بيج برده فإن شاء الله هغير اللون لون الحجز لأسود.

في حالة الفيراني: استلام آخر شهر 4.
في حالة الأسود: استلام ممكن يوصل لآخر شهر 5 لأن على حسب كلامهم اللون ده بالتحديد قليل.

بالنسبة لل AUX، قالولي إن العربية مجهزة ليه لاكن سلكه سايب و محتاج يتعمله واصلة عند أي كهربائي فتطلع من المنطقة السودة الفاضية اللي تحت أكر التكيف..ده هبل طبعا، بس على الأقل بتتعمل.

حضرتك تصنف الصوت عالي و نقي و جودته عالية؟ سمعت من ناس معها الفئات الأقل إنه نقي بس ال bass بتاعه ضعيف شوية و هل الصوت نفسه عالي ولا واطي شوية؟

سؤالي الأخير: ازاي تحافظ على اللون الأسود في البلد الغريبة دي؟ حاجة صعبة فعلا. هل حضرتك منزعج من عزلها أو صوت موتورها أو العفشة أو الكاوتش ناشف جدا لدرجة تضايق؟ يا ريت تقولي رأيك

و أشكرك جدا مرة تانية

استاذ عمر بالنسبة لل aux هو موجود فعلا في المكان اللي حضرتك قولت عليه لكن مش محتاج تعمه وصلة عند الكهربائي انا اشتريتها جاهزة علي طول من محل بتاع اكسسوارات موبيل بركب فيها الموبيل علي طول

المشاركة الأصلية كتبت بواسطة محمد سمير حسين

استاذ عمر بالنسبة لل aux هو موجود فعلا في المكان اللي حضرتك قولت عليه لكن مش محتاج تعمه وصلة عند الكهربائي انا اشتريتها جاهزة علي طول من محل بتاع اكسسوارات موبيل بركب فيها الموبيل علي طول

لو سمحت يا فندم عايز حضرتك تصورلي مكان ال aux
وكمان صورة الوصله الي حضرتك اشتراتها
معلش بتقل على حضرتك بس فعلا مش لاقي aux خالص
وشكرا مقدما بجد

المشاركة الأصلية كتبت بواسطة amr_8800

لو سمحت يا فندم عايز حضرتك تصورلي مكان ال aux
وكمان صورة الوصله الي حضرتك اشتراتها
معلش بتقل على حضرتك بس فعلا مش لاقي aux خالص
وشكرا مقدما بجد

استاذ عمرو اسف علي التاخير بالنسبة للaux موجود تحت زراير التكيف في الجزء اللي داخل لجوه (غاطس للداخل) في التابلوه وراء ولاعة السجائر وعليه غطاء اسود افتح الغطاء وهتلاقي مكان الوصلة
وبالنسبة لشكل الوصلة اللي هاتشتريها من بتاع الموبيلات عبارة عن طرفين الطرف اللي بيدخل في الaux في العربية عبارة عن سلكتين حمراء وصفراء (زي بتاعة التليفزيون بالظبط) والطرف الاخر اللي بيدخل في الموبيل عبارة عن فاردة سلك عادية بتدخل في مكان السماعة بتاعة الموبيل

المشاركة الأصلية كتبت بواسطة محمد سمير حسين

استاذ عمرو اسف علي التاخير بالنسبة للaux موجود تحت زراير التكيف في الجزء اللي داخل لجوه (غاطس للداخل) في التابلوه وراء ولاعة السجائر وعليه غطاء اسود افتح الغطاء وهتلاقي مكان الوصلة
وبالنسبة لشكل الوصلة اللي هاتشتريها من بتاع الموبيلات عبارة عن طرفين الطرف اللي بيدخل في الaux في العربية عبارة عن سلكتين حمراء وصفراء (زي بتاعة التليفزيون بالظبط) والطرف الاخر اللي بيدخل في الموبيل عبارة عن فاردة سلك عادية بتدخل في مكان السماعة بتاعة الموبيل

السلكتين دول بقى حضرتك بيتلحموا في سلكتين زيهم ورا الغطاء الأسود و يتلزق ولا إزاي بتركب في سلوك العربية بالضبط؟ و بكده أنا هحتاج أعمل خرم في القطعة السوداء دي عشان مقعدش أفتح و أقفل فيها كل شوية، مضبوط؟

و معلش سؤال بيلح عليا: الساوند سيستم الستوك بتاع العربية إيه مميزاته و عيوبه لو حضرتك تقدر تقولي؟

أشكرك